Iesu ena Mauri bona Gaukara

Hahenamo Bada Idia Davaria Iesu Ena Parabole Amo

KONE dekenai hutuma ia haroro henidia murinai ena diba tahua taudia be Iesu dekenai idia mai, idia ura dikadika iena hadibaia dalana matamatana idia diba. Io, idia ese Iesu ena parabole idia kamonai vadaeni to guna inai bamona ia siriua lasi. Unai dainai idia nanadaia, idia gwau: “Badina be dahaka parabole dekenai oi hadibaia?”

Ena badina be peroveta tauna ena hereva do ia hagugurua: “Lau hadibaia neganai parabole do lau gwauraia. Tanobada matamaia nega amo ia mai bona hari, hunia gaudia do lau gwauraia hedinarai.” To unai sibona lasi. Iena parabole ese taunimanima ia durudia edia kudouna ena mamina idia diba totona.

Ena sivarai gwaurai dalana bona ena hoa karadia dainai, taunimanima ese Iesu idia ura henia bada. To, idia ura idia halohiaia eiava mai edia ura bada danu ia murinai idia raka. Danu, idia ura lasi edia lalohadai eiava edia mauri idia haidaua. Lasi, idia ura lasi iena hereva ese ia hametaudia. Unai dainai Iesu ia gwau:

“Inai dainai parabole dekena amo lau hereva idia dekenai, vadaeni edia matana idia negea, to do idia itaia diba lasi. Bona idia kamonai gwauraia, to do idia kamonai diba lasi bona edia lalona be do ia kehoa diba lasi. Idia dekenai Isaia ena peroveta hereva ia momokani vadaeni, ia gwau, ‘. . . Badina be inai bese taudia edia lalona idia dibura.’ ”

“To,” Iesu ia gwau, “umui be emui matana idia namo vadaeni, badina umui itaia diba. Umui taiana danu idia namo, badina be umui kamonai diba. Umui lau hamaoroa momokani, peroveta taudia bona kara maoromaoro taudia momo idia ura be umui itaia gaudia do idia itaia, to idia itaia diba lasi, bona umui kamonai herevadia idia ura kamonai, to idia kamonai diba lasi.”

Io, ena diba tahua taudia, gwauta-rua bona idia kamonai henia taudia be lalo-parara taudia. Unai dainai Iesu ia gwau: “Guba Basileia ena hunia herevana umui dekenai be idia hedinarai, to idia dekenai be lasi.” Ena diba tahua taudia idia ura ma diba haida idia abia dainai, Iesu ese ma uhe parabolena ena anina ia hadibadia.

Iesu ia gwau: “Uhe be Dirava ena hereva.” Dala dekenai idia moru uhe be taunimanima edia kudou dekenai idia moru. Dala badinai nadi aukana dekenai ia moru uhena be ma ia gwauraia: “Satani be ia mai, edia lalona dekena amo hereva be ia abia siri, do idia abia dae bona do idia mauri garina.”

Tano mai nadi momo dekenai idia moru gaudia be taunimanima ese hereva idia kamonai bona hereva idia abia dae mai moale danu, to edia ramuna be lasi. Unai dainai idia abia dae to nega daudau lasi dibagani ese ia abidia, vadaeni kerere ia vara idia dekenai.

Bona haida be ava ginigini lalonai hegeregere. Inai taudia be hereva idia kamonai vadaeni to tanobada gaudia dekenai laloa momo, bona kohu ura henia bada, bona ura dika idauidau dainai hereva ena tubu dala idia koua. Bona au huahua idia atoa lasi.

To haida be uhe ia moru tano namona ai hegeregerena. Hereva idia kamonai, idia abia dae goada, au huahua idia abia.

Ena diba tahua taudia ese hahenamo bada idia davaria badina idia ese Iesu idia nanadaia ena hahediba herevadia edia anidia ia gwauraia hedinarai dainai! Iesu ia ura momokani ena parabole ese taunimanima ia durudia hereva momokani idia abia dae totona. Iesu ia nanadaidia: “Lamepa ita abia neganai ita atoa uro lalonai, o mahuta patana henunai?” Lasi, “lamepa ena gini gabuna dekenai ita atoa.” Bena Iesu ia gwau: “Umui kamonai gaudia umui laloa namonamo.” Mataio 13⁠:​10-23, 34-36; Mareko 4⁠:​10-25, 33, 34; Luka 8⁠:​9-18; Salamo 78⁠:2; Isaia 6⁠:​9, 10.

◆ Dahaka dainai Iesu ese parabole amo ia hadibadia?

◆ Iesu ena diba tahua taudia ese edena bamona idia hahedinaraia idia be idau taunimanima hutuma edia amo?

◆ Iesu ese hadoa tauna parabolena ena anina be edena bamona ia gwauraia hedinarai?