Iehova Ena Orea Badinaia

John Barr ena sivarai

JUNE 1986 ai, egu taoni Aberdeen lau vadivadi henia. Aiemai peleini be Glasgow ia rakatania bona ia roho lao neganai, peleini amo lau roha diho bona Scotland ena tano namona bona Clyde sinavaina lau itadia. Unai neganai lau be lagani 1906 1au laloa lou bona unai sinavai ena south kahanai ia noho hanua maragina ta, Bishopton lau laloa danu.

Unai gabu dekenai bona unai lagani lalonai, egu tubuna hahinena Emily Jewell ese Charles T. Russell ena buka The Divine Plan of the Ages ia duahia hamatamaia. Kara haraga ia ese hereva momokani ia abia dae, ia lalo-parara lahi lalonai taunimanima hahisidia hahediba herevana be Bible ena hahediba herevana lasi. Daudau lasi murinai ena natuna kekeni badadia ruaosi, Bessie bona Emily (gabeai Emily be egu sinana ai ia lao) ese hereva momokani idia lalo-pararalaia bena idia diba United Free Church of Scotland ese hahediba herevadia koikoidia idia hadibalaidia. Lagani 1908 ai, egu tubuna hahinena ese bapatiso ia abia ena gwauhamata Dirava dekenai ia hahedinaraia totona, bena daudau lasi murinai ena natuna kekenidia ese bapatiso idia abia danu.

Bishopton ai, egu tamana be mai ena dagi United Free Church lalonai. Nega ibounai ia ese Toi Tamona ena hahediba herevana ia daradaralaia, unai dainai haroro tauna ia gwau Sunday dinana dekenai unai hereva do ia harorolaia ia lalo-pararalaia totona. Vadaeni, ena hereva ia kamonai murinai egu tamana ia daradara lasi, ia diba momokani unai Toi Tamona hahediba herevana be ia koikoi. Unai tomadiho oreana amo ia doko bona lagani 1912 ai bapatiso ia abia ena gwauhamata Iehova dekenai ia hahedinaraia totona. Daudau lasi murinai egu tamana bona sinana mai edia natudia rua, Louie bona James, idia lao Aberdeen dekenai idia noho totona, bona gabeai lagani 1913 ai unuseniai lau vara.

Lauegu tamana bona sinana ese idia hekwarahi lau bona egu kakana rua be ‘Iehova ena hadibaia hereva dekenai ai idia hadibaia totona,’ unai dainai peleini ese Aberdeen dekenai ia diho henia lalonai, lau tubu daekau gabuna ena ororo, sinavai bona koura lau roha diho henidia neganai, egu tamana bona sinana edia hekwarahi lau laloatao lou. (Efeso 6:4) Unai daba dekenai dina ia tara namo herea, bona lau moale Iehova dekenai, egu tamana bona sinana ese lau idia hadibaia namonamo dainai! Lau diba unai ese lau ia durua Iehova ena orea lau badinaia noho totona.

Maragi Neganai Hadibaia Karana ena Namo

Nega ibounai aiemai ruma bese be mai lalo-tamona bona mai moale danu ai Bema egu tamana bona sinana edia lalohadai gau ta dekenai be idia idau, edia natudia vairanai unai idia hahedinaraia lasi. Unai dainai emai tamana bona sinana ai matauraidia, bona emai ruma bese lalonai maino bona noho namo ena mamina ia noho.

Lau tubu daekau negana lau laloa neganai, lau laloatao hanuaboi dekediai ai moale hebou. Aiemai ruma bese taudia ese miusik ai gadaralaia bona ane ai abia hebou, bona ma gadara haida ai karaia hebou, ta ena ladana be Monopoly. Danu, ena be emai tamana be ia bisi momo, to dina ta ta iboudiai nega ia atoa, Bible bona Watch Tower Society ena buka bona ma buka idaudia edia sivarai ia duahidia ai kamonai totona. Ai tubu daekau lalonai unai bamona karadia ese aiemai ruma bese ia hatamonaia.

Unai nega lalonai Scotland ena north kahana dekenai, aiemai ruma bese taudia sibona be “hereva momokani” lalonai ai vareai. Unai dainai Watch Tower Society ena laolao taudia momo idia mai aiemai ruma dekenai. Idia haida edia ladadia be, Albert Lloyd, Herbert Senior, bona Fred Scott. Haida be Society ena hedikwota, Brooklyn, New York dekena amo idia mai; idia rua be W. E. Van Amburgh bona A. H. Macmillan. Lau mero neganai unai taudia edia vadivadi be mai anina bada lau dekenai, bona lau laloaboio diba lasi.

Lauegu tamana bona sinana edia heabidae karana dainai lau moale ia mai hari. Edia kara ese aiemai ruma bese ia hanamoa, bona ena be lau be do maragi, to orea lalonai idia noho tadikaka ibounai lau lalodia momo hamatamaia. Momokani, tama bona sina ese edia natudia idia durudia bada diba, orea lalonai idia noho tadikaka ibounai idia lalokau henidia totona!

Lauegu Hekwakwanai ta Lau Hanaia

Lauegu mauri lagani be 13 idia hanaia neganai, lau hemarai momo taunimanima vairadiai. Lauegu mauri laganidia idia bada idia lao, to taunimanima lau hedavari henidia bona lau hereva henidia be do auka lau dekenai. Lauegu hemarai karana be hekwakwanai gauna badana, lauegu abidadama be Basileia ena sivarai namona harorolaia gaukara amo lau hahedinaraia neganai.

Tanobada Ibounai Tuarina Ginigunana ia ore bena nega sisina murinai, lauegu tubuna bona egu sinana be ruma ta ruma ta gaukarana idia karaia matamaia, Aberdeen dekenai unai gaukara idia karaia Witness taudia ginigunadia unai. Ai natudia be Bible ena sivarai pepapepadia ai haridia, to lau ese ruma taudia edia ruma dekenai lau hereva henidia garina lau gari! Unai be hekwakwanai gauna lau dekenai. To unai hekwakwanai lau hanaia. Unai dina do lau laloaboio diba lasi; ia be Sunday ta, November 1927 ai, egu tamana lau hamaoroa lau ura ia danu ruma ta ruma ta gaukarana do ai karaia. Unai lau herevalaia neganai, egu tamana ia moale dainai ia tai!

Dika ta Ia Vara Dainai Egu Kara Lau Haidaua

Adorahi kahanai, June 25, 1929 ai, lauegu mauri laganidia be 16 neganai, aiemai ruma bese ese dika ta idia davaria. Egu sinana bona egu taihuna be unai dina ibounai lalonai haroro gaukara idia karaia, bena egu tamana ena aniani idia hegaegaelaia totona ruma idia lao henia negana lalonai, ia sipidi motabaik ese egu sinana ia bampaia bona dala dekenai ia veria lao mita 37 bamona. Madi, kwarana dekenai bero dikana ia davaria dainai doketa idia laloa do ia mauri diba lasi. To, hua momo lalodiai egu taihuna Louie ese ia naria namonamo dainai ia mase namo murinai egu sinana ena mauri ia namo noho ia mai lagani 1952, bena ia mase.

Lauegu sinana dekenai ia vara gauna ese lau ia hagaria dikadika​—lau ia doria egu mauri lalonai dahaka do lau ura karaia lau lalohadailaia namonamo totona. Unai nega amo lau ese Bible lau stadilaia goadagoada, guna unai bamona lau karaia lasi, bena hereva momokani lau abia dae momokani. Lauegu lalona lau hadaia egu mauri do lau gwauhamatalaia, Iehova ena hesiai gaukara do lau karaia totona. Bena lagani haida idia ore murinai dala ia kehoa egu gwauhamata be bapatiso amo lau hahedinaraia.

Pioneer Gaukara Lau Abia Dae

Lagani 1932 ai, sikuli lau rakatania bena kosi ta lau karaia mota karaia bona naria gaukarana lau dibaia totona. Unai nega lalonai Britain dekenai, memero kekeni idia hagoadadia lasi hari idia hagoadadia bamona, pioneer gaukara do idia karaia totona. To lagani idia heau noho lalonai, lau diba egu goada be pioneer gaukara dekenai lau negea be namo.

Lagani 1938 lalonai ai stadilaia herevana ta lau laloa lou. Unai hereva ese ia hahedinaraia dahaka hahenamo do ita davaria diba bema Iehova ena orea lalonai do ita noho bona ena hahegani do ita badinaia neganai. Unai hereva be Gima Kohorona magasin lalodiai, Iona ena sivarai idia gwauraia gaudia unai. Iona ese ena hesiai gaukara ia dadaraia dainai ia dekenai idia vara gaudia idia gwauraia hedinarai. Unai sisiba herevana lau abia dae momokani, bona lau laloa namona be Iehova ena orea dekena amo lau abia gaukara iboudiai do lau karaia, herevana idia be dahaka dahaka. Unai neganai lau diba lasi gabeai lau do idia henia gaukaradia momo ese lau do idia tohoa.

Lau guriguri dahaka do lau karaia lau diba totona, bena haere lau davaria. Society ena hedikwota London dekena amo leta ta lau davaria, idia ura London ena Betele dekenai do lau vareai. Mai moale danu lau ura unai gaukara lau karaia egu hesiai gaukara lau habadaia totona. Unai dainai, April 1939 ai, lau be Harold King ida ai gaukara hebou, unai tau be gabeai misinari gaukara ia karaia China dekenai, bona ena haroro gaukara dainai komiunis dibura gabunai idia atoa bona unuseniai ia noho lagani momo lalodiai. Pikap masini karadia gaukarana ai karaia hebou. Bible ena sivarai be rekodi dekenai idia atoa bena rekodi bona pikap idia laohaidia ruma ta ruma ta dekenai, taunimanima ese Bible ena sivarai idia kamonai henia totona.

Harold bona lau ese unai pikap ai karadia noho lalonai, unai pikap amo Basileia ena sivarai do idia kamonaia taudia idauidau ai herevalaidia. Unai ese ai ia durua, badina ai diba aiemai gaukara be mai anina bada. Unai nega ia mai hari Betele dekenai gaukara idauidau lau idia henia, bona lau diba unai gaukara iboudiai be mai anina bada. Unai dainai mai moale danu lau gaukara, badina lau diba unai gaukara ibounai ese Basileia harorolaia gaukarana ia durua.

Gaukara Idauidau Lau Karaia

London ena Betele dekenai lau ginidae, bena nega sisina murinai kongregesen ta mai ena pablisa 200 mai kahana gunalaia dagina lau idia henia. Guna lau naria kongregesen ena pablisa be 10 sibona! Gabeai, 1941 ai, hebouhebou badana ta Leicester dekenai, Maikrafon Masini Depatmen lau naria. Ema bona unai negai lau ese maikrafon masini gaukaralaia dalana lau diba sisina mo.

Murinai lau idia siaia sekit naria gaukara lau karaia totona. Lagani 1943 ai unai gaukara be Britain dekenai idia hamatamaia neganai, sekit naria taudia 6 sibona ese unai gaukara idia karaia. Lau idia siaia unai gaukara be hua tamona sibona lalonai do lau karaia totona, to lagani toi mai kahana lalodiai kongregesen lau vadivadi henidia. Unai hekwarahi bada laganidia lalodiai, Tanobada Ibounai Tuarina Iharuana idia do tuarilaia noho laganidia ai, lau ese hebouhebou badadia toi lau naridia​—guna unai bamona gaukara lau karaia lasi.

Unai neganai, sekit naria gaukarana be idau, hari idia karaia bamona lasi. Hanaihanai ai loaloa, bona tuari laganidia lalodiai, Britain dekenai ai loaloa be auka momokani. Nega haida kongregesen ta lau rakatania ma kongregesen ta dekenai lau lao totona negadiai, baisikele dekenai lau guia badina lao dalana ma ta be lasi dainai. Hari, sekit naria tauna ese wiki ta ta ai kongregesen ta ta ia vadivadi henia, to guna, bema kongregesen be maragi, wiki tamona lalonai kongregesen 6 ai vadivadi henidia!

Dina tamona lalonai lau karaia gaudia be inai: Daba momokani, 5:30 dekenai lau toreisi; lau aniani murinai lau lao ma kongregesen ta dekenai. Lau ginidae murinai kongregesen ena rekod iboudiai be 8:00 dabai lau sekea hamatamaia. Adorahi kahana ibounai ai lao haroro totona, bena unai hanuaboi ai, hora tamona lalonai elda bona hesiai taudia ida ai hebou, bena murinai kongregesen dekenai hereva ta lau henia. Lau mahuta haraga lasi, 11:00 murinai lau mahuta diba, bona bema unai hanuaboi ai kongregesen ena ripoti lau torea, unai hora lau hanaia momokani. Monday iboudiai be ripoti torea haoredia negana, sibona egu stadi karaia negana, bona wiki vairanai totona gau haida hegaegaelaia negana.

Reana do oi gwau, ‘Unai wiki ena gaukara be bada herea.’ Oibe, gaukara be ia bada, to ai moale badina ena be unai tuari laganidia lalodiai orea ena hedikwota amo tadikaka ese revareva momo idia davaria lasi, to ai hagoadadia diba! Ai diba momokani kongregesen taudia ai durudia “edia abidadama ena goada ia bada daekau” noho totona.​—Kara 16:5.

Betele Gaukara Lau Karaia Lou

April 1946 ai, lau idia boiria Betele gaukara lau karaia lou totona. Lau ura unai bamona lau karaia, to lau diba unai lagani toi mai kahana sekit naria gaukarana lau karaia neganai, unai ese lauma dalanai lau ia hagoadaia bada. Dirava ena orea lau matauraia bada danu, bona lau laloa Salamo 48:​12, 13 ena hereva hegeregerena lau karaia, ia gwau: “Siona ai do umui loaloa, umui rakaia hegege, ena kohoro do umui duahidia, . . . ena ruma namodia do umui itadia loaloa.” Dirava ena taunimanima ida ai raka hebou momo dainai, unai ese egu lalokau ia habadaia ‘iseda orea tadikaka iboudiai’ dekenai.​—1 Petro 2:17.

London Betele dekenai lau giroa lou murinai, printa gaukara momo lau naria, bona gabeai printa masini totona gau haida lau karaia danu. Bena September 1977 ai, Iehova ena Witness taudia edia Hakaua Oreana Brooklyn, New York, U.S.A. dekenai ena memba ta ai lau lao.

Nega haida, lau idia henia gaukara idia auka dainai, lau ura dadaraia. To, Iona ena sivarai lau laloatao; lau ura lasi iena kerere lau tohotohoa. Unai negadiai lau ese Salamo 55:22 ena gwauhamata herevana namona be sibona dekenai lau gwauraia loulou. Ena hereva be inai: “Emu maduna na Iehova latanai oi tahoa kau, ia ese oi do ia abia isi. Ia ese kara Maoromaoro tauna do ia naria hanaihanai, do ia marere lasi.” Lau ese unai hereva lau hamomokania vadaeni!

Bema gaukara ta ita karaia diba lasi, Iehova be unai ia diba bona unai gaukara ita do ia henia lasi. To gaukara ita ia henia neganai, iena goada sibona amo do ita karaia diba. Bona ma gau ta be inai, bema oi danu idia gaukara hebou tadikakadia oi lalokau henidia momokani, “mai lalo-tamona danu” oi do idia durua bona hagoadaia, unai gaukara oi hagugurua totona.​—Sefania 3:9.

Hetura Namodia

Keristen tadikaka iboudiai be oiemu turadia, to idia haida be oiemu turadia namo hereadia. Lauegu turana namona ta ena ladana be Alfred Pryce Hughes, madi lagani 1978 lalonai ia mase. Lagani momo lalodiai ia be London branch ena naria tauna, bona gabeai ia be Branch Komiti ena memba ta. Britain ena tadikaka iboudiai ese idia ura henia bada, badina ia ese Iehova ena orea ia matauraia bada bona ena hereva ia badinaia, bona orea tadikaka iboudiai dekenai lalokau bada ia hahedinaraia. Danu, ia ese haroro gaukara ia ura henia dikadika. Ena mauri ibounai lalonai, herevana dahaka maduna ia huaia, to haroro gaukara ia goadalaia noho. Mai edia abidadama bada taudia, Pryce bamona, ida ai gaukara hebou dainai, lau idia durua bona hagoadaia, lau ese Iehova ena orea lau badinaia noho bona haroro gaukara lau karaia noho totona.

October 29, 1960 ai hahine ta lau adavaia; guna ia be nega daudau lalonai pioneer gaukara ia karaia bona Gilead sikuli ena kalasi namba 11 ia haorea bona Ireland dekenai misinari gaukara ia karaia. Unai hahine ena ladana be Mildred Willett, bona ai headava negana amo ia mai hari, lau ia hagoadaia noho egu Betele gaukara lau hagugurua noho totona.

Mildred ena sinana be lagani 1965 ai ia mase, to ia do mauri neganai ena natuna ia sisiba henia, ia gwau, “Iehova oi mama henia lasi.” Mildred ese ena sinana ena hereva ia laloaboio lasi, bona unai hereva ese ia durua, ovataim gaukara lau karaia negadiai ia maumau lasi totona. Iena kara ese lau ia durua, lau idia henia gaukaradia be mai egu moale ida do lau karaia totona. Haroro gaukara dekenai ai ese ekspiriens namodia momo ai abia.

Ekspiriens ta be inai: Tau ta mai adavana be Bible amo ai stadi henidia, bona lauma dalanai idia tubu haraga, gwauhamata idia karaia bona bapatiso idia abia bona hanaihanai haroro gaukara idia karaia. Ai moale bada! Bena kara haraga idia hebou lou lasi, to edia kara ena badina ai diba lasi. Mildred bona lau ai lalohisihisi bona ai laloa noho aiemai kerere be dahaka. Hanaihanai Iehova ai noia ia ese edia kudoudia do ia kehoa, edia lalokau hereva momokani dekenai do idia hahedinaraia lou totona. Lagani 10 murinai unai taudia ese leta ta idia siaia ai dekenai, bona ai moale bada herea badina idia gwau idia hebou lou bona idia haroro lou, bona Buka Stadi be edia ruma dekenai idia abia.

Hari tau, ena ladana Will, ese ai ia tore henia, ia gwau: “Lau ura umui lau tanikiu henia badina lalokau dalanai ai umui durua bada . . . Orea amo lau raka oho be lauegu kerere, hereva momokani be egu kudouna dekenai ia diho momokani lasi . . . Hari ai moale bada herea Iehova ena orea lalonai ai vareai lou dainai . . . Hari hanuaboi inai leta lau torea neganai, mai moale danu emui heduru ai dekenai lau laloa lou; namona be Iehova ese umui do ia hanamoa noho ena hesiai gaukara umui karaia noho lalonai.”

Ma leta ta ai davaria. Hahine ta ese ena natuna merona, ena ladana Mike, ena sivarai ia gwau: “Lau moale bada badina aneru ese idia hakaua oi badinai ia helai totona.” Ena hereva ena anina be dahaka? Anina be inai: Mike be ena sinana bona tadina ida hebouhebou dekenai idia lao, to hereva momokani ia ura henia momokani lasi. Unai mero be sibona ia helai dainai, Mildred ese ia hereva henia. Bena murinai ai hamaoroa, namona be ia bona ena tadina do idia mai London Betele dekenai, ai karaia gaukarana idia itaia totona.

Gabeai, Mike ia mai, bona ia itaia gaudia ese ena lalona idia veria Bible ia stadilaia noho totona. Murinai dahaka ia vara? Hari ia be elda ta kongregesen lalonai, bona ena adavana bona natuna memerodia rua be haroro gaukara idia goadalaia. Nega ta Mike ena adavana ese leta ia torea, ia gwau: “[Mike] ese umui be ia ida umui hedavari heheni negana ia herevalaia momo . . . Ia gwau umui bogaia hisi bona umui durua dainai ia laloa momo.”

Lau bona egu adavana ese ai durudia taudia, Mike bona Will bamona, edia amo tanikiu herevadia ai kamonai neganai, Iehova dekenai ai moale bada herea! Iehova ena orea ai badinaia noho dainai, ai durudia taudia be “aiemai ladana hanamoa ena revareva,” bona idia dainai ai moale bada.​—2 Korinto 3:​1-3.

Hedikwota Dekenai Ai Gaukara

Brooklyn Heights ena niuspepa ta torea tauna ia gwau: “Idia be bese badana ta.” Ia ese Witness taudia edia hedikwota Brooklyn, New York ai bona Watchtower Uma Gabudia ai idia noho Witness taudia 3,500 ia herevalaidia unai; unai uma gabudia bona Brooklyn edia padana be 160 kilomita bamona. Momokani, lauma dalanai, Iehova ena horoa taudia be lauma besena ta Iehova ena matana ai! Hari inai negai, bese idauidau amo taunimanima hutuma idia mai bona Iehova ena bese taudia dekenai idia hereva henidia, idia gwau: “Mani umui ida do ita lao, badina be ai kamonai, Dirava be umui dekenai ia noho.”​—Sekaria 8:23; 1 Petro 2:9.

Reana oi lalo-parara vadaeni, lau bona egu adavana ai moale dikadika Betele ena ruma bese badana dekenai ai vareai dainai, ani? Momokani, idia ore laganidia 8, Brooklyn Betele lalonai ai noho laganidia unai, be mai anina bada lau dekenai. Iniseniai Iehova ena orea ena heau mamina oi abia diba; iniseniai lauma aniani idia hegaegaelaia bena idia siaia tanobada ena kahana ibounai dekenai; iniseniai Iehova ena lauma ia gaukara noho, taunimanima ia hakaudia mai anina bada gaudia idia lalohadailaia maoromaoro totona; bona iniseniai Iehova ena hahenamo Basileia harorolaia gaukarana bona hahediba taudia karaia gaukarana dekenai ia hedinarai bada. Lau davaria ekspiriens dainai bona lau itaia gaudia dainai, lau goada karaia Iehova ena orea lau badinaia noho totona.

Lauegu mauri lalonai lau davaria ekspiriens haida sibodia lau gwauraidia. To lau gwauraidia dainai reana oi lalo-parara dahaka dainai unai dina namona June lalonai, peleini amo Aberdeen Airport dekenai ai diho neganai, Iehova lau tanikiu henia, ena lalokau oreana lalonai lau do noho dainai. Peleini lalonai lau helai noho lalonai, hereva momokani lalonai lau noho negana bona lau davaria ekspiriens lau lalodia lou, bona lau lalo-parara namona be Iehova ese ita ia henia hahenamodia ita lalodia loulou.​—Salamo 40:5.

Peleini ia diho neganai, egu taihuna Louie ese lau ia hedavari henia. Lagani 60 mai kahana lalodiai, mai ena abidadama bona goada bona kamonai ida Iehova ena hesiai gaukara ia karaia noho. Ia abidadama noho dainai Iehova lau tanikiu henia, badina aposetolo Paulo ia gwau, Iehova ia ura ena ‘hesiai taudia’ iboudiai ese iena ura do idia karaia momokani, ani? (1 Korinto 4:2) Ruma bese lalonai ta ese ma ta do ia hagoadaia diba bema kamonai karana ia badinaia, ani?

Nega ta Mose be inai bamona ia guriguri, ia gwau: “Aiemai dina ai duahia dalana mani ai oi hadibaia, emai kudouna dekenai aonega ia noho totona.” (Salamo 90:12) Mildred bona lau ai buruka ai lao, to ai diba, namona be nega ibounai Iehova ena aonega dekenai ai tabekau, bena aiemai mauri ai gaukaralaia dalana amo do ai hahedinaraia diba, Iehova bona aiemai tadikaka iboudiai ai lalokau henidia. Bema Iehova ena orea ita badinaia, mai lalokauna ida Iehova ese unai dala ita do ia hadibaia.

[Picture on page 27]

John Barr (vairana kahanai) mai ena taihuna, kakana, bona tamana sinana,lagani 1930 ai

[Picture on page 30]

John Barr mai ena adavana Mildred, hari