Keristen Lalohadaina Kekero Muramurana Dekenai

“DAIKA ia gwau ‘Inaio’? Daika ia gwau ‘Lau madi o’? Daika ia heai? Daika ia maumau? Daika ese bero ia abia kava? Daika ena matana idia kakakaka? Uaina idia inua daudau taudia.” (Hereva Lada-isidia 23:​29, 30) Oibe, Bible ese ia hahedinaraia kekero muramurana ese dika haida ia havaraia diba, hegeregere, matahanai dikadia, hemarai karadia, kavakava karadia, gorere, hekwakwanai ruma bese lalonai, bona ogogami.

Bible ese “uaina idia inua daudau taudia” ia herevalaidia unai, idia kekero loulou taudia unai! Kekero muramurana be muramura dikana idia dekenai, edia tauanina bona edia kwarana ia hadikadia. (Hereva Lada-isidia 23:​32-35) Inuinu momo taudia momo ese edia tauanina idia biagua diba lasi bona idia kara kava, gabeai do idia hemarailaia karadia idia karaia. Unai dainai Bible ena sisiba be inai: “Uaina idia inua momo taudia ida umui inuinu hebou lasi, bona idia aniani momo taudia ida umui aniani hebou lasi. Badina be kekero tauna bona aniani momo tauna be do idia ogogami, bona mahuta momo ese tau ta dabua hedaredia do ia hadabualaia.” (Hereva Lada-isidia 23:​20, 21) Kekero taudia ese Dirava ena Basileia do idia abia lasi, badina kekero be “tauanina ena kara” ta.​—Galatia 5:​19, 21; 1 Korinto 6:10.

“Aonega Lasi” Karana Daika Dekenai?

Anina be kekero muramurana be taravatu Keristen taudia dekenai a? Haroro tauna, ia gwau Hereva Lada-isidia 20:1 ena hereva hegeregerena, “aonega taudia ese uaina idia inua lasi,” tauna, ena hereva be momokani a? Hereva Lada-isidia 20:1 ia gwau: “Uaina be gonagona gauna, kekero muramurana be heai gauna; ia ese ia koia tauna be aonega lasi.” Bible ese uaina idia inua taudia ia gwau henidia lasi, to uaina ese ia koidia taudia ia gwau henidia! “Uaina idia inua daudau taudia” bona “uaina idia inua momo taudia” be “aonega lasi” taudia ia gwauraidia.

Mani, Isaia 5:​11, 22 ena hereva danu oi laloa; ia gwau: “Daba maragi dekenai idia toreisi bona kekero muramurana idia tahua, bena idia helai kava helai kava ela bona hanuaboi uaina ese ia hakekerodia totona taudia, madi o! Mai edia ladana badana uaina inua karana dekenai, bona mai edia goada ida kekero muramurana idia buloa taudia, madi o!” Isaia ese dahaka ia gwauraia dika? Inuinu momo karana, “daba maragi” amo ela bona “hanuaboi” idia karaia karana, ia gwauraia, ani?

Bible ia gwau Dirava ena hesiai taudia mai edia kamonai, hegeregere Abraham, Isako, bona Iesu, ese uaina idia inua, to idia ouva lasi. (Genese 14:18; 27:25; Luka 7:34) Bible ia gwau danu, uaina be Iehova ena hahenamo ta. (Genese 27:37; Deuteronomi 11:14; Isaia 25:​6-8) Danu, ia gwau uaina sisina be mai ena namo. Salamo torea tauna ia gwau uaina ese “taunimanima edia lalona ia hamoaledia.” (Salamo 104:15) Aposetolo Paulo ese Timoteo ia hamaoroa, ia gwau: “Ranu kavakava sibona do oi inua lasi, to uaina sisina danu do oi inua, oiemu bogana hanamoa totona. Badina be oi gorere nega momo dainai.”​—1 Timoteo 5:23.

Uaina o Greip Ranuna?

Taunimanima haida idia gwau, unai Bible siridia ese greip ranuna, uaina momokanina lasi idia herevalaia. To, buka ta, McClintock and Strong’s Cyclopedia ia gwau, “Bible ia gwau lasi uaina be idauidau, kekero uainana bona kekero lasi uainana unai.” Unai hegeregerena, Bible ia gwau “uaina” ese taunimanima ia hakekerodia diba bona “kekero muramura” bona “uaina” ia herevalaia hebou.​—Genese 9:21; Luka 1:15; Deuteronomi 14:26; Hereva Lada-isidia 31:​4, 6.

Iesu ena hoa karana ginigunana be ranu na uaina ai ia halaoa. Bible ia gwau: “Aria biaguna ese uaina . . . ia inua, to ia diba lasi edeseni amo ia mai. . . . Bena [ia] ese headava matamata tauna ia boiria, ia hereva henia, ia gwau: ‘Taunimanima iboudiai ese uaina namo hereana idia atoa diho guna, bena uaina ese vadivadi taudia ia hakekerodia murinai, uaina sisina ia namo idia atoa diho. To oi be uaina namo hereana oi dogoatao vadaeni ema bona harihari.’ ”(Ioane 2:​9, 10, NW ) Oibe, unai “uaina namo hereana” be uaina korikorina.

Momokani, Iesu ena negai tomadiho gunalaia taudia ese Iesu idia gwauraia dika, badina nega ta ta ai uaina ia inua. Iesu ia gwau: “Badina be Ioane Bapatiso ia mai, paraoa ia ania lasi, uaina ia inua lasi, vadaeni umui gwau ia be mai lauma dika danu. To Taunimanima ena Natuna ia mai, ia aniani, ia inuinu, vadaeni umui gwau ia be aniani momo tauna bona uaina inua momo tauna.” (Luka 7:​33, 34) Bema Iesu ese kekero lasi greip ranuna sibona ia inua, dahaka dainai Iesu ena inuinu karana bona Ioane ena inuinu lasi karana idia gwauraia idauidau? Mani oi laloa, aneru ia gwau Ioane be “uaina eiava kekero muramura do ia inua lasi.”​—Luka 1:15.

Edia sikeili hegeregerena kekero muramurana idia inua bona idia ouva lasi taudia be Iesu ese ia gwauraidia dika lasi. Iena negai Paseka ariana idia karaia neganai, uaina idia inua. Gabeai danu, paseka ariana ena gabu ai Lohiabada ena Anibou idia karaia negadiai, uaina korikorina idia inua.

Namona be Oi Lalohadai Namonamo

Unai dainai Bible ese kekero muramurana inua ia taravatulaia lasi. Nega momo ta ese kekero muramurana do ia inua eiava do ia inua lasi be sibona ena ura. Bible ese kekero karana bona aniani momo karana ia gwauraia dika; ia gwau: “Uaina idia inua momo taudia ida umui inua hebou lasi, bona aniani momo taudia ida umui aniani hebou lasi. Badina be kekero tauna bona aniani momo tauna be do idia ogogami.” (Hereva Lada-isidia 23:​20, 21) Unai dainai namona be ita ibounai ese iseda ura ita biagua, ita ouva lasi. “Inuinu dekena amo do umui kekero lasi, inai be emui mauri do ia hadikaia. To Lauma Helaga dekena amo do umui honu.” Mani oi laloatao, tauanina ena ura koua karana be Dirava ena lauma ena huahua ta.​—Efeso 5:18; Galatia 5:​19-23.

Ena be ta ia kekero lasi, to kekero muramurana ese ia hakererea diba. U.S. National Institute on Drug Abuse oreana ena buka ta ia gwau: “Ta ese kekero muramurana ia inua neganai, unai muramura be ena boga rau lalona amo ia hanai ena rara dekenai bona kara haraga ia aru lao ena darana dekenai. Bena ena darana ena kahana ta, ena lalona ia biagua gauna, be ia gaukara haraga diba lasi. Unai dainai unai tau ia hemarai haraga diba lasi.” Ura kwalimu mamina ia abia dainai, kara bodaga ia karaia diba.

Bema kekero tauna ese motuka ia taria, dika ma ta ia vara diba. Ripoti ta ia gwau United States lalonai lagani ta ta iboudiai taunimanima 25,000 idia mase, draiva kekerodia edia kerere dainai. Taunimanima momo idia lalo-parara lasi, kekero muramurana ese ta ia hametaua bena ia lalohadai haraga diba lasi bona ia kara haraga diba lasi. To Keristen taudia momokanidia idia laloa mauri be Iehova ena harihari gauna. (Salamo 36:9) Ta be motuka ia taria neganai, bema kekero muramurana dainai ia lalohadai haraga diba lasi bona ia kara haraga diba lasi dainai ia be sibona ia hamasea diba bona ma haida ia hamasedia diba, ia hahedinaraia mauri be unai bamona ia laloa bada lasi, ani? Unai dainai Keristen taudia momo be kekero muramurana idia inua lasi, motuka idia taria gwauraia negadiai.

Keristen tauna ia laloa, ena inuinu karana ese ma haida do ia hahekwakwanaidia eiava lasi. Unai dainai Bible ia gwau namona be Keristen elda taudia, kongregesen ena hesiai taudia, bona hahine badadia be “inuinu momo taudia lasi.” (1 Timoteo 3:​2, 3, 8; Tito 2:​2, 3) Ena be ta ia laloa kekero muramuradia ese ia do idia hakekeroa haraga lasi, to namona be ia inua momo lasi, ena bamona ta ia hakererea garina; bona namona be ura lasi tauna ia doria lasi ia inua totona. Bible be ma ia gwau: “Dala maorona be inai, vamu do ita ania lasi, uaina do ita inua lasi, bona iseda varavara ta do ita hamorua totona kara ta do ita karaia lasi, unai be ia namo.”​—Roma 14:21.

Reana haida ese kekero muramurana inua karana idia hadokoa be namo, idia dekenai ia vara gauna dainai. Rogorogo hahinedia be unai bamona. Niuspepa ta ladana International Herald Tribune ena ripoti ta ia gwau: “Hahine ta ia rogorogo matamata neganai bema nega tamona ia inuinu kekero, reana unai amo ena natuna ena lalona bona tauanina do ia hadikaia bada.” Namona be hahine ese unai ia vara diba gauna dikana idia laloa namonamo.

Bema taunimanima haida be nega daudau lalonai idia inuinu kekero loulou vadaeni, reana namona be kekero muramurana inua karana idia hadokoa vaitani. Bona namona be unai bamona taudia bona edia lalona dekenai inuinu karana idia gwauraia dika taudia vairadiai ita inuinu lasi be namo. Danu, Keristen heboudia ita lao henidia gwauraia neganai bona haroro gaukara ita karaia noho lalonai kekero muramurana ita inua lasi be namo. Idau negai Levi taudia edia kara ita tohotohoa be namo; dubu helaga dekenai idia gaukara neganai idia inuinu lasi.​—Levitiko 10:​8-10.

Namona be gavamani ena taravatu ita badinaia. Tano haida dekenai kekero muramurana idia taravatulaia vaitani. Tano ma haida dekenai edia taravatu be taunimanima badadia sibodia do idia inua diba. Keristen taudia ese unai bamona taravatu idia badinaia be namo.​—Roma 13:1.

To namona be oi sibomu emu lalona oi hadaia, kekero muramurana do oi inua eiava lasi, bona hida do oi inua be namo. Bema ita lalo-parara dainai sibona eda ura hegeregerena ita inua momo lasi, Dirava ita hanamoa. Namona be oi aonega; ‘oi aniani o oi inuinu, o dahaka oi karaia neganai inai, gau ibounai do oi karaia Dirava hanamoa totona’ be namo.​—1 Korinto 10:31.

[Picture on page 6]

Keristen tauna ta be reana ena lalona do ia hadaia kekero muramurana do ia inua lasi ma ta do ia hahekwakwanaia garina