Tano ta mai Ena Gado 700 ai Idia Haroro

OI BE tano ta oi diba, ena be ia maragi, to taunimanima milion toi mai kahana ese idia noholaia bona gado idauidau momo herea ai idia hereva, a? Unai tano be motumotu bada hereana ta ena kahana ta. Unai motumotu ena ladana be New Guinea, bona unai tano ena ladana be Papua New Guinea. Papua New Guinea lalonai idia noho taudia be gado 700 bona ma haida ai idia hereva! Edena bamona unai gado idauidau idia vara?

Gado Idauidau Idia Vara Dalana

Papua New Guinea be motumotu badana ta ena kahana, Australia ena mirigini kahana dekenai ia noho. Indonesia ese unai motumotu ena west kahana tanona ia biagua. Papua New Guinea ese unai motumotu badana ena east kahana bona ma motumotu maragidia 600 bamona danu ia biagudia.

Haida idia gwau, Papua New Guinea idia noholaia taudia ginigunadia ese Asia idia rakatania bena Indonesia amo idia hanai Papua New Guinea dekenai. Gabeai Melanesia bona Polynesia taudia be Papua New Guinea dekenai idia mai. Edia kopina edia kala be idauidau, koremakorema ela bona uriuri. Haida idia kwadogi bona edia tauanina idia bada, to haida idia lata bona edia tauanina idia maragi. Ororo badadia be momo bona uda be bada herea dainai bese momo idia noho kahirakahira diba lasi, unai dainai sibodia edia gado idia havaraia. Papua gadodia momo idia auka. Oibe, Papua New Guinea lalonai gado 700 bamona ai idia hereva!

Lagani 1975 ai Papua New Guinea ese independens ia abia. Ia be British Commonwealth ena memba ta. Ena palamen be mai ena prai minista bona gavana jeneral. Ena be sikuli bona opesi lalonai English gado ai idia hereva, to unai gado idauidau 700 idia diba taudia momo be Hiri Motu eiava New Guinea Pidgin gado ai idia hereva.

Ma Gado ta Idia Dibalaia

Ena be idia be mai edia gado 700, to guna idia be “gado” ta ai idia dabu. Unai be edena “gado”? Ia be “gado goevadaena”​—Dirava bona ena Basileia herevadia momokanidia unai, Bible lalonai idia torea. (Sefania 3:9) Unai “gado” matamatana be lagani 1935 ai idia kamonai matamaia.

Unai lagani lalonai Iehova ena Witness taudia haida be edia bouti maragina ladana Lightbearer dekenai idia gui, Australia idia heautania bena Port Moresby dekenai idia ginidae. Unai be nega ginigunana Port Moresby taudia ese “gado goevadaena” idia kamonai. Lightbearer ena pata (ilaha) amo Dirava ena Basileia ena sivarai be maikrafon amo idia halasia.

To, unai “gado goevadaena” idia kamonai lou lasi ema bona lagani 1951. Unai lagani amo ema, Witness taudia haida be Australia, Canada, United States, Germany, England, bona New Zealand amo Papua New Guinea dekenai idia mai. Nao taudia idia haroro henidia guna, bena gabeai Dirava ena Basileia ena sivarai be Papua taudia dekenai idia harorolaia. Ruma ta ruma ta dekenai idia lao, to unai be mai ena hekwarahi, badina ruma haida be du latadia ai idia haginidia gaudia, kone ai bona davara ai.

Vadaeni, unai “gado goevadaena” idia hadibalaidia totona, Nao Witness taudia ese Hiri Motu o New Guinea Pidgin gado idia dibaia guna. To unai ese edia hekwarahi ia haorea lasi, badina Hiri Motu bona New Guinea Pidgin be hanua taudia edia gado korikoridia lasi, to idau bese taudia ida idia herevahereva negadiai mo unai gado idia veria. Bona taunimanima momo ese unai gado ta idia diba lasi, unai dainai Witness taudia idia haroro neganai, unai gado ta ai idia hereva, bena ma ta ese ena hereva na hanua taudia edia gado ai ia hahanaia.

Witness taudia ese danu hadibaia dalana idauna ta idia gaukaralaia​—blakbod o pepa ta dekenai laulau idia torea. Gabeai, Bible idia herevalaia bukadia bona magasin be Hiri Motu bona New Guinea Pidgin gado dekenai idia abidia. Buklet ta, ladana Mauri Hanaihanai Tanobada Dekenai Oi Abia! be Hiri Motu gado ai bona New Guinea Pidgin gado ai idia hahanaia, bena idia gaukaralaia momo, Papua New Guinea taudia be “gado goevadaena” idia hadibalaidia totona.

Kwini ena Natuna ese “Gado Goevadaena” Ia Kamonai

Iesu Keriso ia gwau ena hahediba taudia ‘do idia gini gavana bona king taudia vairanai, idia dekenai hereva momokani do idia hedinaraia totona.’ (Mareko 13:9) August 9, 1984 ai, Iehova ena Witness taudia edia misinari rua Manus Island dekenai ese dala idia davaria, Great Britain ena kwini ena natuna, Prince Charles, idia haroro henia totona, Manus ia vadivadi henia neganai.

Titan iduhu taudia haida ese edia vanagi idia haheraia, Prince Charles ena bouti badana dekenai idia lao, bena edia vanagi amo Prince Charles idia abia mai kone dekenai. Misinari taudia edia ruma vairanai idia kamokau. Taunimanima momo be ia totona idia mavaru bena “lohia” ai idia halaoa. Unai murinai ia lao aniani gabuna. Manus Island ena Premia ese unai misinari rua ia boiridia, idia ida do idia aniani hebou totona. Prince ese misinari taudia ia nanadaidia, dahaka idia karaia unai motumotu dekenai, bena edia haroro gaukarana idia gwauraia. Mai edia moale ida idia hamaoroa Iehova Dirava be mai ena Witness taudia Manus Island dekenai.

Danu, unai Premia ese Bible ia gwauraia bukana, ladana Mauri Hanaihanai Paradaiso Lalonai ia duahia vadaeni. Nega ta ta ia ese misinari taudia ia vadivadi henidia, bona kofe idia inua hebou neganai idia herevahereva.

Politik Tauna ta ese Gado Matamatana Ia Dibalaia

New Guinea bisinesi tauna ta be Lutheran tauna bona politik lalonai ia vareai. To, iena dubu taudia idia lalo-tamona lasi dainai, pasto taudia rua ese orea rua idia karaia, bena kahirakahira lagani ta lalonai, unai orea ruaosi ese peva, diba, io, bona kesi amo idia tuari heheni. Taunimanima 9 idia hamasedia bona momo idia haberodia. Hari tau ia ura Lutheran misini do ia rakatania, to ia diba lasi idia parara lasi Keristen taudia be edeseniai do ia davaridia. Ia laloa, ‘Iehova ena Witness taudia be hegeregere lasi, badina be idia be peroveta taudia koikoidia.’

Ia be unai bamona ia do laloa neganai, Iehova ena Witness taudia haida ese idia noia, iena PMV do idia hoia edia distrik hebouhebouna ta do idia lao henia totona. Moni ia laloa dainai, gwaumaoro ia henidia, bena ia sibona ese unai PMV ia taria ia laohaidia totona. Sunday dekenai unai hebouhebou ena program ia kamonai, bena ia hoa badina hebou taudia idia heiriheiri lasi, idia helai namonamo, bona idia hakala namonamo​—tatau bona hahine, memero bona kekeni. Hereva henia tauna ese Bible sirina ta ia gwauraia neganai, iboudiai ese edia Bible idia kehoa unai siri duahia totona. Dina tubua ai ia hoa maragi lasi badina Witness taudia iboudiai, nao taudia, haroro taudia, bona oredia be nega tamona mai edia manau ida idia laini karaia edia aniani abia totona bona edia aniani be tamona danu. Witness taudia ese iena PMV dekenai idia gui idia lou lao edia hanua totona, bena hora 6 lalodiai idia heau neganai Basileia anedia idia abia mai edia moale ida. Hari tau ia laloa, ‘Lutheran taudia edia kara be idau vaitani, idia tuari heheni!’

Hari tau ena lalona ia hegeregere Witness taudia ida Bible do ia stadilaia, to ia ura do ia stadi hehuni, Lutheran taudia do ia habadudia garina. To, lauma dalanai ia goada ia lao haraga, bena ia hegeregere ena misini bona ena politikol gaukarana amo do ia doko. Ia mai ena adavana ida ese “gado goevadaena” idia dibalaia, Iena Witness taudia ida “Iehova ena ladana dekenai idia boiboi totona bona iena hesiai gaukara be mai lalo-tamona danu idia karaia hebou totona.”​—Sefania 3:9.

Hadibaia Gaukarana Badana Ia Do Noho

Misinari taudia bona idau tanodia amo idia mai Witness taudia ma haida ese gaukara badana Papua New Guinea lalonai idia karaia, “gado goevadaena” idia hadibalaidia totona! Lagani 1951 lalonai Iehova ena Witness haroro taudia be rua sibodia, to hari, Witness taudia 1,900 bamona ese haroro bona hadibaia gaukara idia karaia, bona idia momo herea be Papua New Guinea taudia.

Papua New Guinea Witness taudia ese idau tanodia amo idia mai Witness taudia edia lalona idia hagoadaia. Witness tauna ta, England amo ia mai bena Bougainville dekenai ia noho, be ia gwau: “Iehova ena hesiai gaukara be iniseniai do ai karaia noho totona, aiemai lalona ia hagoadaia bona ai ia doria gauna be iseda Papua New Guinea tadikakadia edia hekwarahi. Ai itaia idia hekwarahi bada, mai edia kamonai ida Iehova ena hesiai gaukara idia karaia totona. Idia momo be ruma lasi, to edia varavara ida idia noho hebou. Idia momo be dina siahuna lalonai eiava medu badana lalonai gabu daudauna dekenai idia raka, hebou dekenai idia lao totona eiava haroro gaukara idia karaia totona. Iseda taihu ta be gunika dekenai ia noho. Ia be ai ida haroro gaukara ai karaia hebou totona, sinavai ta ia hanaia mai. Ia bona ena natuna kekenina maragina bona ena beibi be raba taea dekenai idia helai bena ena tau ese ia kaloa.”

Hadibaia gaukarana badana ia do noho. Taunimanima momo idia ura Bible ena hereva idia kamonai. Unai ita diba, badina lagani 1987 ai, taunimanima 10,235 idia hebou Keriso ena mase laloa totona. To namona be ma taunimanima haida idia mai, inai “gado goevadaena” idia ura henia taudia durudia totona. Nao Witness tauna ta Papua New Guinea dekenai be ia gwau: “Lau lalohisihisi badina Papua New Guinea ena gunika dekenai kamonai taudia momo idia noho, to gaukara taudia be momo lasi dainai heduru idia abia lasi. Namona be gaukara taudia momo be iniseniai do idia mai, heduru henia totona. Ita diba Iehova ese inai ia itaia, bona dala do ia karaia, hereva momokani hitolona idia hitolo taudia do ia durudia totona.”

Oi be edena bamona? Oi ura oi danu be inai tano mai ena gado 700 dekenai “gado goevadaena” be taunimanima do oi hadibalaidia a?

[Map on page 23]

(For fully formatted text, see publication)

AUSTRALIA

PAPUA NEW GUINEA

Manus

Port Moresby

Bougainville