“Umui Laloa Hekwarahi Lasi”
“Umui laloa hekwarahi Lasi, Dirava dekenai umui abidadama henia, lau dekenai danu umui abidadama henia.”—IOANE 14:1.
1. Dahaka dainai Iesu ena hereva Ioane 14:1 dekenai be mai anina bada?
NISAN ai lagani 33 C.E. lalonai, Ierusalem dekenai dina ia diho neganai, taunimanima haida be idia hebou atai daiutuna ta dekenai. Edia gunalaia tauna ese sisiba bona hagoadaia herevadia ia henidia, badina ia rakatanidia gwauraia dainai. Ia gwau: “Umui laloa hekwarahi Lasi.” (Ioane 14:1) Unai sisiba be mai anina bada badina edia lalona hahekwarahia gaudia idia vara gwauraia. Unai hanuaboi ai Iesu idia dogoatao, bena idia kota henia, idia gwau do idia hamasea.
2. Dahaka dainai unai dina be dina badana, bona dahaka ese hahediba taudia ia durudia?
2 Namona be tanobada ena dina iboudiai lalodiai unai dina oi gwauraia bada, badina tanobada taudia iboudiai edia nega gabena ia haidaua. Gunalaia tauna Iesu ese ena mauri ia bouboulaia neganai, idau negai idia perovetalaia herevadia haida ia hamomokanidia, bona badina ia atoa, ia dekenai do idia abidadama henia taudia ese mauri hanaihanai do idia abia totona. (Isaia 53:5-7; Ioane 3:16) To, unai hanuaboi ai idia vara gaudia dikadia dainai aposetolo taudia idia hoa bona idia daradara, bona idia gari nega sisina lalonai. Petro ese Iesu ia dadaraia danu. (Mataio 26:69-75) To, aposetolo taudia mai edia kamonai ese Iesu ia gwauhamatalaia heduru gauna, lauma helaga unai, idia abia neganai, idia gari lasi bona idia daradara lasi. (Ioane 14:16, 17) Unai dainai, Petro bona Ioane idia dagedage henidia bona dibura dekenai idia atodia neganai, idia ruaosi ese Dirava idia guriguri henia, idia noia do ia durudia, ena hereva do idia gwauraia “gari lasi” totona. Bena Dirava ese edia guriguri ia haerelaia.—Kara 4:1-3, 29-31.
3. Dahaka dainai taunimanima momo idia lalo-hekwarahi bada hari?
3 Hari inai negai tanobada be hekwarahi idauidau amo ia honu. Inai nega dikana ena dokona be kahirakahira do ia ginidae. (2 Timoteo 3:1-5) Taunimanima milion momo ese dika idia davaria eiava idia lalo-hekwarahi bada, ena badina haida be inai: Ruma bese momo idia dika bona taunimanima momo be lebulebu karadia idia karaia momo, gorere idaudia idia bada idia lao, politikol oreadia idia gini goada lasi, momo ese moni gaukara idia abia diba lasi, hitolo ia vara, dagedage bona ala-ala karadia idia vara, bona niuklia tuari do ia vara garina idia gari. Momo be mai edia gari danu idia lalo-hekwarahi dikadika, dina vairai idia laloa neganai. Iesu ia peroveta hegeregerena, “tanobada besedia be . . . idia hisihisi . . . Taunimanima edia kudouna dekenai . . . idia gari momokani, edia laloa danu . . . idia doko, unai idia vara gaudia dainai.”—Luka 21:25, 26.
4. Dahaka dainai Keristen taudia ese lalo-hekwarahi idia davaria diba?
4 Unai bamona karadia dainai Keristen taudia danu idia lalo-hekwarahi diba. Danu, reana idia lalo-hekwarahi badina haida ese edia tomadiho idia badulaia, eiava edia varavara, dekena taudia, idia ida idia gaukara hebou o idia sikuli hebou taudia, bona gavamani ese idia dagedage henidia dainai. (Mataio 24:9) Inai lalo-hekwarahi negana lalonai, edena bamona do ita haheauka bona iseda lalona do idia hekwarahi lasi? Dina vairai do ita laloa neganai, iseda lalona be edena bamona do idia goada diba? Dahaka ese ita do ia durua, lalo-hekwarahi bada ita hanaia totona? Iesu ese sisiba Ioane 14:1 ai ia henia negana be hari inai nega bamona, unai dainai namona be unai sisiba ita tahua namonamo.
Lalo-Hekwarahi Hanaia Dalana be Dahaka?
5 Iesu be mai lalokau danu ena aposetolo taudia ia sisiba henidia, ‘do idia lalo-hekwarahi lasi,’ bena ia gwau: “Dirava dekenai umui abidadama henia, lau dekenai danu umui abidadama henia.” (Ioane 14:1) Buka Helaga dekenai unai bamona hagoadaia hereva momo idia noho; idia haida be inai: “Emu maduna na Iehova latanai oi tahoa kau, ia ese oi do ia abia isi.” “Oiemu dala Iehova ena imana ai oi atoa; ia oi abidadama henia, bona ia ese kara ta do ia karaia.” (Salamo 55:22; 37:5) Paulo ese Filipi taudia na inai mai anina bada sisibana ia henidia, ia gwau: “Gau ta totona do umui laloa hekwarahi lasi. To emui dabu gaudia do umui abia totona Dirava do umui noia. Bona umui noia negadia ibounai, mai tanikiu danu do umui guriguri henia. Dirava ena maino . . . ese emui laloa gaudia bona emui kudouna idia mamia gaudia ibounai do ia naria namonamo.”—Filipi 4:6, 7.
6, 7. (a) Edena dala ta amo lalo-hekwarahi ita hamaragia diba? (b) Iseda tura karana Iehova dekenai edena bamona ita hagoadaia diba?
6 Nega haida ita hekwakwanai bona mauri ena maduna metaudia ita huaia dainai ita lalo-hekwarahi, bena iseda lalo-hekwarahi ese ita ia hagorerea bona iseda lalona ia hamanokaia. To, medikal diba tauna ta ese buka ta ladana Don’t Panic lalonai, ia gwau: “Bema taunimanima ese edia hekwakwanai idia gwauraia hedinarai diba idia matauraia tauna ta dekenai . . . , unai ese edia lalo-hekwarahi do ia hamaragia bada” Bema taunimanima ese heduru idia abia diba ma taunimanima ta idia hereva henia neganai, vadaeni bema Dirava ita hereva henia neganai heduru bada herea do ita abia diba. Ma ta ita matauraia lasi Iehova ita matauraia bamona, ani?
7 Unai dainai Keristen taudia hari inai nega lalonai ese edia hetura karana ia dekenai do idia hagoadaia be gau badana. Iehova ena hesiai taudia goadadia be unai idia diba, unai dainai edia hetura karana Dirava dekenai idia hadikaia diba taudia o karadia amo idia siri. (1 Korinto 15:33) Danu, idia diba gau badana be Iehova idia hereva henia guriguri amo, nega tamona o rua dina tamona lalonai sibona lasi, to nega momo. Namona be Keristen memero bona kekeni eiava kamonai matamata taudia ese edia hetura karana Iehova dekenai idia hagoadaia, ena Hereva idia stadilaia noho bona unai hereva idia lalohadailaia momo karana amo, bona Keristen taudia bamodia karana bona haroro gaukarana amo. Bible ia gwau: “Dirava dekenai do umui raka kahirakahira lao, vadaeni ia ese umui dekenai do ia raka kahirakahira mai.”—Iakobo 4:8.
Iesu Ia Henia Sisibana
8 Tano momo lalodiai, moni gaukara be lasi bona bisinesi momo idia moru dainai taunimanima idia uari momo. Iesu ese unai karadia dainai sisiba namona ita ia henia, ia gwau: “Mai gari danu umui laloa momo lasi emui noho mauri dekenai, dahaka do umui ania, o dahaka do umui inua, o tauanina ena dabua dekenai. Mauri be gau badana, to aniani be gau maragi, ani? Tauanina ese be dabua ia hanaia, ani?” (Mataio 6:25) Oibe, mauri bona tauanina, taunimanima ibounai unai, be mai anina bada, aniani bona dabua idia hereaia. Dirava ena hesiai taudia idia diba Dirava ese do ia durudia mauri durua gaudia idia abia totona. Iesu ese inai haheitalai ia gwauraia, ia gwau: “Ataiai manu mani umui itaia. Idia be hadoa lasi, idia geia lasi, naria gabuna dekenai aniani idia haboua lasi. To emui Tamana guba dekenai noho ese unai manu ia naria namonamo. Umui be manu umui hanaia, ani?” (Mataio 6:26) Iseda lalona dekenai ita gwau diba lasi Dirava ese manu ia naridia to ena hesiai taudia ia naridia lasi, badina unai taudia ia lalokau henidia, bona Keriso ese ena mauri ia atoa diho idia dainai.
8, 9. Ita ogogami o moni gaukara ita davaria diba lasi neganai, dahaka sisiba ita badinaia be namo?
9 Unai hereva hamomokania totona Iesu ese tano ena herahera ia gwauraidia, ia gwau idia gaukara lasi, dabua idia turia lasi, to “Solomona be mai ena kohu momo to iena dabua be herahera ta ena hairai bamona lasi.” King Solomon ena pavapava negana lalonai hairai gaudia be momo. (Solomon ena Ane 3:9, 10) Bena Iesu ese ia idia kamonai henia taudia edia lalona ia hagoadaia, ia gwau: “Be, [Dirava] ese umui dekenai danu dabua do ia henia namonamo lasi, a?”—Mataio 6:28-32.
10. (a) Iesu ena hereva namodia be daidia totona ia gwauraidia? (b) Iena sisiba dina vairai totona be dahaka?
10 To, Iesu ia hahedinaraia “Basileia bona iena kara maoromaoro do idia tahua guna” taudia sibodia be unai bamona. Tanobada ibounai lalonai, Keristen korikori taudia ese Dirava ena Basileia ena anina idia diba, bona idia tahua guna edia mauri lalonai. Idia dekenai Iesu ena sisiba ia momokani, ia gwau: “Umui emui lalona do idia hekwarahi lasi kerukeru totona. Badina be kerukeru sibona ena hekwarahi do ia abia. dina ta ta ena hekwarahi do umui habadaia lasi.” (Mataio 6:33, 34) Unai anina be, hekwakwanai idia vara neganai do ita hanaidia toho, bona vaira negana do ita uarilaia momo lasi.
11, 12. Keristen taudia haida idia gwau Iehova ese edia guriguri edena bamona ia haerelaia?
11 Kahirakahira taunimanima iboudiai be edia vaira negana totona idia uari, bona hekwakwanai idia vara neganai idia uari bada herea. To Keristen taudia ese Iehova ena heduru mai edia abidadama ida idia tahua be namo. Hahine ta ladana Eleanor ena sivarai mani ita laloa. Ena tau be ia gorere bada, bona lagani tamona lalonai ia gaukara diba lasi. Ena natudia maragidia rua bona ena tamana burukana ia naridia dainai, moni gaukara ia karaia diba lasi. Iehova idia guriguri henia heduru abia totona. Daudau lasi murinai, daba kahanai, edia iduara henunai revareva udaia gauna ta idia lalonai moni bada ia noho—unai moni dainai edia mauri be ia hegeregere ela bona ena tau ia gaukara lou diba. Unai heduru be nega korikori ai idia davaria dainai Dirava idia tanikiu henia bada. Bible ia gwau lasi Keristen taudia iboudiai idia dabu neganai moni be unai bamona do idia davaria, to ita diba momokani Iehova ese iseda guriguri do ia kamonai henidia bona dala idauidau amo ita do ia durua diba.
12 Keristen vabuna ta, Africa ena south kahanai ese moni gaukara ia tahua, ia bona ena natudia maragidia rua ia ubudia totona. To ia ura dina ta ta iboudiai dina kahana sibona lalonai do ia gaukara, bena ena natudia do ia bamodia momo diba. Gaukara ia davaria, to nega sisina ia gaukara murinai ena biaguna ia gwau ia ura seketere idauna ta do ia abia, dina ibounai lalonai do ia gaukara diba hahinena; unai dainai ia gaukara lasi dainai unai taihu ese Iehova ia guriguri henia goadagoada heduru abia totona. Wiki toi murinai, ena biaguna gunana ese ia boiria, dina ta ta ena kahana ena kahana sibodia do ia gaukara lou totona. Ia moale dikadika; ia gwau Iehova ese ena guriguri ia haerelaia!
Iehova Noinoi Henia
13 Mani inai ita laloa, Paulo ia sisiba, ia gwau: “Gau ta totona do umui laloa hekwarahi lasi,” bena ia be ma ia gwau: “To emui dabu gaudia do umui abia totona Dirava do umui noia. Bona umui noia negadia ibounai, mai tanikiu danu do umui guriguri henia.” (Filipi 4:6) Unai anina be, do ita lalo-hekwarahi bada eiava do ita mase diba negadiai, Dirava do ita guriguri henia goadagoada mai iseda lalona ibounai ida. Dibura dekenai ia noho neganai, Paulo ese ena Keristen bamodia ia noidia, ia dainai do idia noinoi goadagoada, “Dirava ena hereva gwauraia tauna” hegeregerena “Sivarai Namona . . . do [ia] hedinaraia, mai maoromaoro bona gari lasi danu.” (Efeso 6:18-20) Roma tuari kapitan Korenelio ese “nega ibounai Dirava dekenai ia guriguri.” Bena ia moale dikadika aneru ta ese ia hereva henia neganai; unai aneru ia gwau: “Oiemu guriguri bona oiemu harihari gaudia be Dirava dekenai idia daekau vadaeni, bona Dirava ese danu oi ia laloa noho.” Idau bese taudia, Dirava ese ena lauma helaga amo ia horoa taudia, ginigunadia ta be ia, unai be hahenamo badana ia dekenai!—Kara 10:1-4, 24, 44-48.
14. Dahaka dainai ita diba lalona ibounai ida Iehova guriguri henia karana be nega tamona karaia gauna lasi?
14 Inai ita laloa danu, lalona ibounai ida Iehova guriguri henia karana be nega tamona karaia gauna lasi. Nega ta Iesu ese ororo ta dekenai taunimanima ia hadibadia neganai, ia gwau: “Umui noinoi loulou, bena umui do idia henia. Umui tahua loulou, bena do umui davaria. Umui pidipidi loulou, bena iduara do idia kehoa emui.” (Mataio 7:7, NW ) Bible idauidau momo lalodiai, Hiri Motu gado gauna lalonai danu, unai hereva idia hahanaia “noinoi, . . . tahua, . . . pidipidi, . . . ” To Greek gado ai unai hereva edia anina be karaia loulou.
15 Nehemia ese Parasa pavapavana Aratasasta ena uaina ia naria neganai, pavapava ese ia nanadaia dahaka dainai ena lalona ia hisihisi. Nehemia ia hamaoroa ia lalohisihisi badina ia kamonai Ierusalem hanua be ia dika momokani. Bena pavapava ese ia nanadaia, ia gwau: “Oiemu noinoi be dahaka?” Kara haraga Nehemia ese Iehova ia noia do ia durua, ena kudouna dekenai guriguri maragina ia karaia hehuni unai. Bena pavapava ia noia, Ierusalem dekenai do ia siaia ena hanua do ia haginia lou totona. Pavapava ese ena noinoi herevana ia abia dae. (Nehemia 2:1-6) To, pavapava vairanai ena noinoi hereva ia do gwauraia hedinarai lasi neganai, dina momo lalodiai Nehemia ese mai lalona ibounai ida Iehova ia guriguri henia vadaeni. (Nehemia 1:4-11) Unai ena anina oi dekenai be oi lalo-pararalaia a?
Iehova ese Ia Haere
16 Nega ta ta ai, Abraham ese aneru dekena amo Iehova ida idia hereva heheni. (Genese 22:11-18; 18:1-33) Ena be hari unai bamona ita karaia diba lasi, to ita ese heduru bada gaudia ita abia, Abraham ia abia lasi gaudia unai. Ta be Bible ibounai—ia lalona amo sisiba herevadia bona hahegoada herevadia momo ita abia hanaihanai diba. (Salamo 119:105; Roma 15:4) Nega momo, hekwakwanai idia vara negadiai Bible ena hereva ese ita ia hakaua maoro, eiava ita lalo-manoka negadiai iseda lalona ia hagoadaia; unai negadiai Iehova ese ita ia durua, ita duahia vadaeni siridia ita laloa lou totona. Nega momo, heduru ita abia diba, Dirava ese ena orea amo ita ia henia Bible bukadia edia hereva amo. Unai buka haida dekenai indeks ia noho, unai indeks ese ita ia durua bada Bible siridia ita davaridia totona.
17. Edena dala idaudia amo Iehova ese iseda guriguri ia haerelaia diba, bona Keristen tauna ta mai hebogahisina ese edena bamona ita ia durua diba?
17 Bema hekwakwanai ta ita lalo-hekwarahilaia eiava ita lalohisihisi neganai, reana dala idauidau amo iseda guriguri ena haere do ita abia diba. Hegeregere, kongregesen dekenai eiava Iehova ena Witness taudia edia hebouhebou dekenai, Bible ena hereva ta be idia harorolaia neganai, reana unai hereva ena “muramura namona” ese ita do ita hanamoa. Ma nega haida, Keristen tauna ma ta ida ita herevahereva hebou neganai heduru ita abia. Nega momo kongregesen ena elda taudia ese iseda lalona idia hagoadaia diba eiava sisiba namona ita idia henia diba. Bema iseda hekwakwanai be Keristen tauna ta mai goadana bona mai hebogahisina, iseda hereva do ia kamonaia namonamo tauna, dekenai ita gwauraia hedinarai diba, nega momo unai ese iseda lalona do ia hanamoa bada. Unai be mai anina bada, bema ita ia durua Bible ena hereva ita lalohadailaia totona neganai. Ita be iseda turana ta ida unai bamona ita herevahereva hebou neganai, unai ese iseda lalona bona kudouna hametaua gaudia edia mamina ia hamaragia diba.—Hereva Lada-isidia 12:25; 1 Tesalonika 5:14.
18. Lalohisihisi mamina kokia totona Keristen taudia ese dahaka idia karaia diba, bona edena bamona unai ese pioneer kekenina ta ia durua?
18 Hari, “nega dokonai metau dikadia momo . . . idia vara” negana lalonai, idauidau momo idia vara. (2 Timoteo 3:1) Taunimanima idia lalohisihisi bona idia lalo-metau ena badina be idauidau. Keristen taudia danu be unai bamona mamina idia abia diba, bona unai mamina be dika herea. To, idia momo idia davaria, bema sivarai namona idia harorolaia, unai ese ia durudia lalohisihisi mamina idia kokia totona. Unai dala oi karaia toho a? Oi lalohisihisi sisina neganai, Basileia ena hesiai gaukara ta oi karaia toho. Ma haida dekenai Dirava ena Basileia oi kikilaia neganai, unai ese oi ia durua, lalo-metau mamina oi kokia totona, bena emu lalona do ia goada lou. Iehova oi herevalaia bona iena Hereva oi gaukaralaia neganai, moale do oi abia—unai be lauma huahuana ta—bona emu lalona ena mamina do ia haidaua diba. (Galatia 5:22) Pioneer kekenina ta ia davaria, Basileia gaukara dekenai ia bisi momo neganai, ia lalo-parara ‘ia sibona ena hekwakwanai be maragi bona nega sisina idia noho gaudia, to taunimanima ma haida edia hekwakwanai be bada bona do idia ore haraga lasi gaudia.’
19. Keristen tauna ta mai ena gorere ese ena lalohisihisi edena bamona ia kokia?
19 Nega haida, bema ta ia gorere sisina bona reana hekwakwanai ta ia davaria danu, unai dainai ena lalona ia metau diba. Reana unai dainai hanuaboi ai ena mahuta amo ia noga mai ena lalo-hekwarahi ida. Nega haida unai bamona ia vara gorere Keristen tauna ta dekenai, to ia davaria ena kudouna ibounai ida ia guriguri neganai heduru bada ia abia. Mahuta amo ia noga mai ena lalohisihisi ida neganai, Iehova ia guriguri henia mai ena haheauka ida. Unai ia karaia neganai, kara haraga ena lalona ena mamina ia namo lou. Danu, ia gwau ia laloatao Bible siridia, hegeregere Salamo 23, ena hereva be ena kwarana amo ia gwauraidia neganai lalo-maino ia davaria. Nega ibounai, guriguri amo eiava Dirava ena Hereva amo heduru ia tahua neganai, Iehova ena lauma helaga ese ia durua, lalohisihisi ia kokia bona lalo-maino ia abia totona. Gabeai, unai tau ese ena hekwakwanai ia lalohadailaidia namonamo diba, bona hanaidia dalana ia laloa davari, eiava goada ia abia ia haheaukalaidia totona.
20. Dahaka dainai nega haida iseda guriguri edia haere ita abia haraga lasi?
20 Unai sivarai ese ia hahedinaraia guriguri amo heduru ita abia diba. To nega haida iseda hekwakwanai kokia o haheaukalaia dalana be ita davaria haraga lasi. Dahaka dainai? Reana badina be Dirava ia ura do ita naria ela bona heduru do ia henia iena nega korikori dekenai. Nega haida ia ura taunimanima ese edia guriguri amo do idia hahedinaraia goevagoeva guna, idia gurigurilaia gauna idia laloa bada bona idia ura henia bada, bona Dirava idia badinaia momokani danu. Salamo torea tauna ta dekenai unai bamona ia vara!—Salamo 88:13, 14; 2 Korinto 12:7-10 itaia danu.
21. Dahaka dainai ita be Iehova ena Witness taudia ai ita lao be hahenamo badana, bona edena dala amo Dirava ita tanikiu henia diba?
21 Nega ibounai, guriguri amo Siahu Ibounai Diravana ita hereva henia neganai, unai ese iseda abidadama ia dekenai ia hagoadaia, bona ita ia durua lalo-metau ita negea bona lalo-goada ita abia totona. Iseda lalona idia goada momokani diba, badina be ita diba Dirava ese iseda guriguri ia kamonaia bona ia haerelaia! Paulo ese Filipi kongregesen ia tore henidia herevana hegeregerena, namona be “mai tanikiu danu” Dirava ita noia guriguri amo. (Filipi 4:6) Oibe, namona be dina iboudiai iseda kudouna ibounai ida ita hahedinaraia idia “vara gaudia ibounai dainai Dirava do [ita] tanikiu henia.” (1 Tesalonika 5:18) Unai bamona kara ese ita do ia durua, Dirava kahirakahira dekenai ita mai totona bona lalo-maino ita abia totona. Hereva gabena ese do ia hahedinaraia, hari inai hekwarahi bada negana dikana lalonai unai be mai anina bada Iehova ena hesiai taudia dekediai.
Edena Bamona Oi Haere?
◻ Dahaka dahaka dainai Keristen taudia idia lalo-hekwarahi diba?
◻ Dahaka ese ita ia durua lalo-hekwarahi ita hanaia totona?
◻ Dahaka dainai Keristen taudia idia diba Dirava ese do ia durudia edia mauri durua gaudia idia abia totona?
◻ Idau negai idia vara karadia be edena bamona idia hahedinaraia Iehova ese ia idia guriguri henia goadagoada taudia edia noinoi ia kamonaidia?
◻ Edena dala idauidau amo Iehova ese iseda guriguri ia haerelaidia diba?
5. Buka Helaga dekenai dahaka hagoadaia hereva haida idia noho?
13. Bible ese daika daika ia gwauraidia, idia guriguri goadagoada mai edia lalona ibounai ida?
15. (a) Dahaka dainai Nehemia ia lalohisihisi, King Aratasasta ena uaina ia henia neganai? (b) Nehemia ese nega tamona guriguri maragina ia karaia a?
16. (a) Abraham ese dahaka hahenamo ia abia? (b) Iseda guriguri edia haere ita abia totona ita idia durua gaudia haida be dahaka?
[Picture on page 12]
“Emui Tamana guba dekenai noho ese unai manu ia naria namonamo. Umui be manu umui hanaia, ani?”