Gari be Gau Dikana Eiava?

GARI ESE moale bona helaro namona ia hadikaia diba. Haida idia gwau gari be lalona hamanokaia gauna, lalohadai maoromaoro hadikaia gauna, idia gwau gari be tauanina hadikaia gaudia ta edia dika ia hanaia. Oibe, gari be lalona ia hamarerea momo gauna ta. To, unai be gau dikana, eiava?

Namona be inai haheitalai oi laloa. Bema motuka amo oi diba lasi dalana dekenai oi heau lao, bona unai dala be maoromaoro lasi, to ororo dekenai ia dae bona ia giroa momo, bona do oi heau lao ela bona hanuaboi ia kau neganai, bona sinou ia diho danu, unai dainai motuka ia dedi sisina ena mamina oi abia bona oi diba dala be ororo atai hereana dekenai ia lao dainai, dala dekenai ranu be aisi bamona ia noho.

Vadaeni, oi diba oi gima noho be gau badana. Dala ia giroa neganai motuka oi taria namonamo badina oi diba, dala dekenai aisi ia noho dainai motuka ia dedi diba, bona ororo amo do oi moru ela bona henuna tanona dekenai. Danu, dibura ia kau dainai dala dekenai idia noho gaudia oi itaia haraga diba lasi. Unai gaudia totona oi lalo-hekwarahi sisina, unai dainai emu uduna ranuna ia kakoro, bona emu kudouna ia hetaha. Dala oi gimaia namonamo. Guna oi laloa gaudia oi lalodia boio bona hari oi ese motuka oi taria dalana sibona oi laloa: badina oi ura motuka be dala dekenai ia heau namonamo, oi ura lasi aksiden ia vara.

Vadaeni, ororo oi hanaia bona dala ia diho ia lao. Hanua ena diari oi itaia inai, bona dala dekenai aisi ia noho lasi. Vadaeni, sisina sisina emu lalo-hekwarahi ia ore ia lao. Mai moale danu do oi hahodi bona oi helai namonamo lou. Oi gari kava unai!

To momokani oi gari kava, a? Lasi. Badina korikori dainai oi gari be gau namona. Ita ia durua ita gima namonamo totona. Gari namona ita abia neganai ita ia durua idau kavakava karana ita karaia bona bero ita davaria garina. Oibe, nega haida gari be lalona hamanokaia gauna, to nega haida ita ia durua diba.

Bible ese gari karana ia herevalaia bona ita diba totona gari toana rua ia gwauraidia. Gari oromana ta be lalona hamanokaia gauna. Bona gari oromana ta be ia namo, iseda tauanina ia durua hahemauri ita abia totona. Unai gari be dahaka? Bona edena bamona gari namona do ita habadaia, to gari dikana do ita dadaraia diba? Murina sivarai ese inai hereva do ia kikilaia.