Bible Oi Abidadama Henia Diba, A?

“ITA gwau diba, bema taunimanima ta ita davaria bona ia gwau evolusen herevana ia abia dae lasi, unai tau be diba lasi, aonega lasi eiava kavakava tauna.” Unai hereva be Richard Dawkins ena hereva. Oi ese unai hereva edena bamona oi laloa? Bema Bible oi abidadama henia, reana evolusen herevana oi abia dae lasi, to oi abidadama Dirava ese gau iboudiai ia havaraia. Bible oi abidadama henia dainai, anina be oi diba lasi, oi aonega lasi, eiava oi kavakava, a?

Inai hereva oi laloa danu: “Taravatu Matamatana idia stadilaia taudia idia gwau Keristen taudia ginigunadia edia buka lalonai Iesu ena sivarai momo be sibona edia lalohadai amo idia gwauraia.” Unai hereva be Doketa Robert W. Funk ena hereva, niuspepa ta The Weekend Australian lalonai idia torea. Unai tau be profesa ta iunivesiti lalonai, tomadiho ia hadibaia, bona buka haida ia torea. Unai buka lalonai tomadiho ese gau haida edia anina idia gwauraia dalana ia herevalaia.

Doketa Funk ese stadi karana ta, idia gwauraia Jesus Seminar [Iesu Stadilaia Karana] ia haginia. Bible stadilaia taudia 100 bona ma haida ese Iesu ena hereva Bible lalonai idia tahua namonamo. Edia lalohadai be Lohiabada ena Guriguri be Iesu ena guriguri lasi; idia gwau Iesu ia gwau lasi manau taudia ese tanobada do idia abia bona ia gwau lasi maino idia karaia taudia do idia gwauraia Dirava ena natudia; bona ia gwau lasi: “Toreisi lou be lau inai, mauri danu be lau. Lau dekenai ia abidadama henia tauna . . . do [ia] mase lasi.”​—Ioane 11:​25, 26; Mataio 5:​5, 9; 6:​9, 10.

Reana edia lalohadai dainai oi hoa dikadika, to nega momo unai bamona idia hereva. Unai kara ena badina be, hari inai negai Bible idia stadilaia taudia haida ese ena hereva idia hakoikoia, bona nega daudau lalonai pris bona pasto edia sikuli badadia lalonai unai bamona lalohadai idia hadibaia. Reana saiens taudia ese Bible ena hereva idia hakoikoia neganai, edia hereva oi abia dae lasi. To tomadiho gunalaia taudia idia gwau Bible ena hereva be momokani lasi neganai, reana oi sibona dekenai oi henanadai, oi ese oiemu lalohadai oi haidaua be namo, eiava. Tomadiho stadilaia taudia momo ese Bible ena hereva be idia abia dae lasi; vadaeni, Bible oi abidadama henia be maoro, a?