“Lau Moale Bada Herea Dainai, Lau Tai”

“HARI sibona lau ese ‘Lalo-Metau Taudia Durudia Dalana Idia Moale Lou Totona’ herevana lau duahia ore, bona lau moale bada herea dainai, lau tai.” (Gima Kohorona November 1, 1990, rau 26-30) Leta ta ena hamatamaia herevadia be unai. Society ese unai leta bona ma leta momo ia davaria, idia lalonai taunimanima ese Society idia tanikiu henia badina The Watchtower magasin, March 1 bona March 15, 1990 gaudia (Gima Kohorona July 1 bona November 1, 1990) lalonai, hereva haida idia torea, unai hereva ese lalo-metau ia gwauraia. To taihu ta Japan lalonai ese ataiai herevadia ia torea, iena natuna merona ese schizophrenia gorerena ia abia. Ia gwau:

“Dina iboudiai lalo-metau tauna ena lalona lau hagoadaia loulou dainai, nega momo egu tauanina ai lau hesiku bada herea. Hanuaboi negana ia mai neganai, egu natuna ia gari dikadika bona ia lalo-hekwarahi bada. Unai dainai sleeping pills [hamahutaia muramurana] lau henia, bona egu imana be ena baguna latanai lau atoa ela bona ia mahuta. Unai be hegeregere beibi lau hamahutaia bamona, bona hora tamona bamona murinai, ia mahuta namonamo. Unai neganai, egu lalona ai lau laga-ani sisina diba, to nega tamona, lau ese sibona lau hadibaia, kerukeru dabai ma dina ta do ia matamaia, bona unai dina do lau haheaukalaia.”

“Egu natuna ia gwau, ‘Gau ta lau karaia namonamo diba lasi. Egu helaro be lasi momokani.’ Dina iboudiai mai ena lalohisihisi ida ia henanadai, ia gwau, ‘Egu gorere do ia namo lou, a? Edena negai muramura do lau rakatania diba? Inai mauri dalana dikana be nega daudau lalonai do ia noho, a?” Unai bamona negadia ai, magasin edia sisiba hegeregerena, henanadai idauidau amo iena lalohadai dalana lau haidaua, bona unai ese egu natuna ia durua bena sisina ia lalo-moale lou. To dina dina iboudiai iena henanadai ia gwauraia loulou.

“Danu, nega haida egu natuna ia gari dikadika neganai, elda taudia [unai gabu ena kongregesen amo] ia boiridia hanuaboi momokani dekenai bona ia noidia ia totona do idia guriguri. Unai bamona idia karaia neganai, ia lalo-goada bada bona ena lalo-hekwarahi ia ore. . . . Nega momo, egu tau (murimuri tauna ta) be ena bisinesi gaukarana dainai ma gabu ta dekenai ia lao neganai, egu natuna ena mamina ia dika ia lao. Tadikaka lau rini henidia bona edia heduru lau noia neganai, tadikaka momo be aiemai ruma dekenai idia mai haraga.

“Tadikaka e, umui lau tanikiu bada badina nega ta ta ai unai bamona hereva umui printaia bona umui hahedinaraia manoka taudia umui naria bona edia dabu gaudia umui laloa.”

[Lau sainia inai] H. H.