Dirava ena Hereva Ia Hahairaia Karana

Caracas, Venezuela dekenai, kampani ta ena biaguna oreana ese revareva ta idia siaia edia gabu ai idia noho Iehova ena Witness taudia edia kongregesen ena elda bona hesiai taudia dekenai. Unai revareva lalonai idia gwau: “Emui tomadiho lalonai idia noho taudia edia sivarai ai abia, reference revarevadia namo hereadia lalonai. Unai revareva lalonai idia gwau emui tomadiho taudia ese edia maduna idia huaia namonamo bona idia kara maoromaoro. Unai badina dainai umui ai toretore henia. Hari, aiemai gaukara taudia be momo lasi dainai, taunimanima rua ai tahua haraga inai gaukara rua idia karaia totona: idia ta ese taraka do ia taria bona ma ta ese aiemai kohu atoa gabuna [warehouse] do ia naria. Emui kongregesen tauna ta eiava kahirakahira dekenai ia noho kongregesen ena tau ta ena sivarai mani umui siaia ai dekenai. Ai ura lasi momokani Witness lasi taudia do ai gaukaralaia. Mani emui kara bema tau ta umui davaria lasi, ai umui hadibaia, badina emui haere do ai naria guna, bena gabeai gaukara taudia do ai abia hidi.”

Unai revareva be Kingdom Hall ena iduara henunai idia atoa. Kongregesen ena elda taudia ta ese unai revareva ia davaria murinai, kampani ena biaguna ia vadivadi henia. Unai biaguna be lagani 15 lalonai Iehova ena Witness taudia ia diba, bona ia gwau hekwakwanai badadia idia vara lasi ena Witness gaukara taudia dainai. Ia gwau Witness taudia idia kara kava lasi, edia maduna idia huaia, idia kara maoromaoro, bona idia gaukara goadagoada. Bena ia be ma ia gwau: “Lau diba kara dika taudia umui haheaukalaidia lasi, bona kongregesen murimuri ai umui atodia. Unai ese ia hahedinaraia emui kongregesen taudia idia ura lasi unai bamona taudia do idia durudia.”

Unai bamona kara ese Dirava ena hereva ia hahairaia. (Tito 2:10) Witness taudia be unai kara idia karaia badina idia ura momokani Bible ese ia gwauraia dala maorodia idia badinaia namonamo.