“Emui Natuna Do Umui Habadua Lasi”

“TAMANA bona sinana e, emui natuna do umui habadua lasi.” Unai be aposetolo Paulo ena hereva. (Efeso 6:4) West tanodia ai, kohu momo be faktori dekenai idia karaia, bona unai ese lalo-hekwarahi bona lalo-metau idauidau ia havaraia. Nega haida, unai tano dekenai idia noho taudia dekenai, hebogahisi be edia natudia dekenai idia hahedinaraia be auka. Bona ogogami tanodia lalonai danu, natudia idia tubu daekau negana lalonai, tama sina ese idia naridia be auka. Momokani, unai tano dekenai taunimanima idia kara haragaharaga lasi West tanodia taudia hegeregerena. To nega daudau lalonai idia noho bese karadia o sene karadia dainai, reana tama bona sina ese edia natudia idia kara henidia daladia haida dainai, natudia edia lalona do idia hahisia o do idia habadua.

Ogogami tanodia haida lalonai, natudia idia matauraia lasi momokani. Bese haida lalonai, natu maragidia idia oda henia neganai, mai dagedage bona mai siahu herevadia danu idia karaia, bona natudia dekenai idia boiboi dikadika bona idia hereva dika henidia. Reana taunimanima badana ta ese natu maragina ta ia gado namo henia negadia be momo lasi, bona “mani emu kara” bona “tanikiu” herevadia be nega ta ai do ia henia lasi. Tatau idia laloa edia imana goadana amo edia siahu do idia hahedinaraia; bona ena hereva aukadia be ena imana amo ia ha-aukaia, natudia ia botaia neganai.

Africa besedia haida lalonai, taunimanima idia laloa bema natu maragina ta be taunimanima badana ta dekenai hanamoa herevana ia henia, unai be hegeregere ia matauraia lasi. Nega momo, taunimanima badadia idia gini hebou neganai, matamata taudia be edia kwarana latanai maduna metaudia idia huaia, to mai haheauka ida idia naria ela bona taunimanima badadia ese gwaumaoro idia henidia hanamoa herevana idia gwauraia totona. Taunimanima badadia do idia herevahereva hebou bona matamata taudia do idia naria ela bona gwaumaoro idia henia idia dekenai hanamoa herevana idia gwauraia totona. To natudia ese taunimanima badadia idia raka hanaia diba lasi ela bona unai hanamoa herevana idia gwauraia.

Ogogami dainai danu natudia ese dika idia davaria diba. Natudia idia gaukaralaia, gaukara bada idia karaia totona, bona unai dainai edia tauanina idia goada lasi bona idia sikuli namonamo lasi. Reana, ruma dekenai danu maduna bada herea be natu maragidia dekenai idia henia. Bema hanua maragidia dekenai idia noho taudia ese edia natudia be hanua badadia dekenai idia siaia idia sikuli totona, varavara taudia ese do idia naridia dainai, nega momo natudia idia kara henidia hegeregere idia be igui hesiai taudia bamona. Momokani, unai maoromaoro lasi dalana amo natudia idia kara henia dainai, natudia idia badu!

‘Natudia Habadua’ Ena Anina

Inai tanobada dekenai taunimanima edia kara natudia idia naria neganai be hanaihanai idia haidaua. Tama sina haida be unai kara idia badinaia, bona idia laloa momo lasi gabeai dahaka do ia vara. To, mai badina korikorina ida Dirava ena Hereva ese tama sina ia hamaorodia edia natudia do idia habadua lasi. Greek gado herevana ta be Motu gado ai idia hahanaia “habadua lasi.” Unai hereva ena anina korikori be “oi doridia lasi ela bona idia badu.” (Kingdom Interlinear) Roma 10:​19 dekenai, unai kara gwauraia herevana [verb] idia hahanaia “doria ela bona idia badu dikadika.”

Unai dainai, Today’s English Version Bible ena hereva Motu gado ai be inai bamona: “Emui natudia umui kara henidia lasi umui habadudia totona.” The Jerusalem Bible lalonai unai siri ena hereva be unai hegeregerena, ia gwau: “Emui natudia umui doridia lasi ela bona idia badu.” Unai dainai Bible ese kara kerere maragidia ia gwauraia lasi, hegeregere tamana o sinana ia goevadae lasi dainai iena natuna ia habadua sisina. Bona Bible ese matahakani dala maoromaoronai idia henia karana ia gwauraia dika lasi. Lange’s Commentary on the Holy Scriptures bukana lalonai ia gwau unai siri ia herevalaia gauna be “badu haraga, kara auka, bona kara haidaua kava dalana ai natudia idia kara henia, bona unai amo . . . edia natudia ese edia tama sina idia ura henia lasi bona unai ese idia ia veria idia dadaraidia totona bona idia gwau-edeede henidia bona idia badu totona.”

Hahediba tauna J. S. Farrant ia gwau: “Natu maragidia edia lalona ena mamina be ma taunimanima iboudiai edia lalona ena mamina bamona. Idia be tubutubu gaudia bamona lasi, to idia kahirakahira dekenai idia vara gaudia dainai, kara ta idia karaia.” Bona nega momo bema taunimanima badadia be maoromaoro lasi dalana ai idia kara henidia, lauma dalanai bona edia lalona ai natudia idia dika momokani. Kohelete 7:7 ia gwau: “Hisihisi dainai reana aonega tauna ese kavakava karana ia karaia.”

Natudia be Dirava Ena Matahakani Lalonai Oi Naria

Bema idia ura edia natudia be hereva momokani lalonai do idia raka noho, tama sina ese edia natudia idia naria dalana idia abia hidi neganai, namo lasi bese taudia vaia edia kara o sene karana sibona idia badinaia. (Ioane Ihatoina siri 4 itaia danu.) Paulo ese tamadia bona sinadia ia sisiba henidia, ia gwau namona be edia natudia idia habadua lasi, unai murinai ia gwau: “Lohiabada ena hadibaia hereva idia dekenai do umui hadibaia.” (Efeso 6:4) Unai dainai Iehova ena taravatu be gau badadia; bese ta vaia edia kara o edia sene lalohadaina idia hanaia.

Reana tano haida lalonai nega momo natu maragidia idia kara henidia, hegeregere idia be anina bada lasi taudia bamona bona idia be davana lasi hesiai gaukara dekenai idia guia. To Bible be Salamo 127:3 dekenai ia gwau: “Itaia! Memero be Iehova ena harihari gaudia; boga ena anina be davana namona ta.” Bema tamana o sinana ese edia natudia idia kara dika henidia, Dirava danu idia hetura namonamo diba, a? Lasi. Haida idia lalohadai kerere, idia laloa natudia idia noho ena badina tamona sibona be inai: Edia tama sina edia ura gaudia idia henidia totona. To 2 Korinto 12:14 lalonai, Bible ia gwau: “Memero maragi ese moni idia haboua lasi tamadia sinadia totona. To tamadia sinadia ese moni idia haboua edia natudia totona.”

Ita gwau diba lasi natu maragidia ese edia gaukara ruma dekenai idia karaia be dika. Lasi. To namona be natuna ena namo idia laloa danu, ani? Hegeregere, Keristen kekeni ta Africa dekenai, ladana Yaa, idia nanadaia, ia ura iena tamana bona sinana ese dahaka do idia karaia ia idia durua totona. Ia haere, ia gwau: “Lau ura egu ruma gaukara haida idia kokia lau haroro dinadia ai.” Unai dainai, bema natuna be nega korikori ai sikuli dekenai ia ginidae be auka o kongregesen ena hebou dekenai ia lao be auka badina ruma gaukara momo idia henia dainai, namona be tama sina ese unai kerere idia hamaoromaoroa, ani?

Momokani, natudia haida edia kara gageva dainai edia tamana bona sinana ese idia kara henidia be mai hekwarahi bada. Tama sina be edena dala amo unai natudia idia kara namo henidia, idia habadudia lasi to idia naridia namonamo diba totona? Hereva Lada-isidia 19:11 ia gwau: “Tau ta ena lalo-parara dainai ia badu haraga lasi, bona kara dika ia gwauatao be iena hairai ena toana.” Oibe, namona be emu natuna oi diba namonamo. Natudia iboudiai ta ta ena kara ena kara be idia idau, bona idia ta ta iboudiai be mai edia ura, mai edia diba, bona mai edia manoka gabudia. Unai gaudia be dahaka? Nega oi atoa emu natuna do oi diba namonamo totona bona unai henanadai ena haere do oi tahua totona, a? Bema edia natuna danu idia gaukara hebou, bona bema idia tomadiho hebou, bona bema ruma bese taudia iboudiai ese moale karadia idia karaia hebou​—unai kara iboudiai ese dala idia kehoa tamadia bona sinadia be edia natudia danu do idia hetura namonamo totona.

Timoteo Iharuana 2:​22 dekenai, Paulo ese mai anina gauna ma ta ia herevalaia, inai hereva be Timoteo ia henia neganai, ia gwau: “Uhau edia lebulebu karadia do oi rakatania.” Oibe, Paulo ia diba taunimanima idia matamata neganai, hekwarahi idia davaria diba. Edia tauanina bona lalona ai gau momo idia idau momokani. Memero edia ura kekeni dekenai bona kekeni edia ura memero dekenai be ia bada ia lao danu. Unai nega lalonai, namona be taunimanima badadia ese matamata taudia be aonega dalanai idia durudia mai lalokau danu, kerere badadia dainai do idia moru garina. To namo lasi taunimanima badadia ese matamata taudia idia kara henidia hegeregere idia sihari kava vadaeni bamona. Keristen tadikaka ta ena natu kekeni be mai lalohisihisi danu ia gwau: “Lau sihari kava lasi, to egu tamana ese lau ia samania, ia gwau lau sihari kava hehuni. Be, hari lau sihari kava be namo.” Namo lasi emu natuna oi samania kava, to namona be oi hamaoroa oi diba do ia kara namo. (Tesalonika Iharuana 3:4 itaia danu.) Oi gwau henia momo lasi, to oi bogaia hisi, hegeregere oi be iena gabu ai oi gini bamona, bona lalokau dalanai lalo-parara oi hahedinaraia, dala maoromaorona ai.

To, bema tama sina idia kikilaia guna edia natuna ese dahaka dika idauidau ia davaria diba, vadaeni hekwakwanai momo idia do vara lasi neganai idia koua diba. Laloaboio lasi, Dirava ese tama sina ia oda henidia edia natudia be Dirava ena Hereva dekenai idia hadibaia. (Deuteronomi 6:​6, 7) Reana unai do idia karaia totona, nega bada do idia henia natudia dekenai bona do idia gaukara goadagoada. Madi, tama sina haida be badu haraga taudia dainai idia ese edia natudia idia hadibaia namonamo lasi. Ma tama sina haida idia hekwarahi badina idia duahiduahi diba lasi. Ogogami tanodia momo lalonai unai hekwakwanai be bada herea.

Nega haida, lo Keristen tauna ta idia noia diba do ia heduru totona. Reana ia heduru totona, sisiba herevana namona be idia manada lasi tamana o sinana dekenai do ia henia. (Hereva Lada-isidia 27:17) O reana ruma bese taudia edia stadi do ia naria. To unai ese tamana o sinana ena maduna ia kokia lasi, iena maduna be Dirava ena Hereva be ena natudia dekenai ia hadibaia. (1 Timoteo 5:8) Dala ia tahua diba, iena natudia danu haroro gaukara idia karaia hebou totona bona lauma gaudia be aniani negadia eiava ma nega namodia dekenai do idia kikilaia hebou totona.

Vaia ena kara, mero o kekeni badana ia ura sibona ena mauri lalonai gau haida ia abia hidi o ia biagua. Nega momo, tama sina ese unai idia lalohadailaia kerere, idia laloa natuna ia gwau-edeede o ia hemataurai lasi. Bema iena tamana bona sinana ese idia kara henia hegeregere ia be do natu maragina ta bamona, bona bema iena tamana bona sinana ese iena dala idia koua momo ia ese sibona ena ura haida do ia karaia garina, mero o kekeni do ia badu! Unai hegeregerena, bema tama bona sina edia natuna badana ena mauri lalonai do ia karaia gaudia iboudiai​—edukeisini, moni gaukara bona headava​—be ia ida idia kikilaia hebou lasi manau bona hemataurai dalana ai, to idia sibona ese dala idia abia hidi, vadaeni, unai mero o kekeni do ia badu. (Hereva Lada-isidia 15:22) Aposetolo Paulo be iena Keristen tadikaka bona taihu ia hamaorodia, ia gwau: “Laloa dobu gaudia totona, tau badadia bamona inai gaudia do umui laloa.” (1 Korinto 14:20) Namona be tama sina idia ura edia natudia idia tubu daekau edia lalona ai bona lauma dalana dekenai ani? To, matamata tauna ia diba namonamo dalana tamona be ena ‘lalona ia gaukaralaia momo.’ (Heberu 5:​14, NW) Matamata tauna ese iena lalona do ia gaukaralaia totona, gau badana be iena ura hegeregerena gau haida ia abia hidi diba.

Hari dina gabedia dikadia lalonai, natudia naridia be auka. To bema tama sina ese Dirava ena Hereva idia badinaia, edia natudia idia habadua kava lasi, “do idia hesiku garina.” (Kolose 3:21) To idau, dala idia tahua edia natudia be mai hebogahisi, mai lalo-parara, bona mai hemataurai danu do idia kara henidia totona. Edia natudia idia hakaua, idia doridia lasi; idia naridia, idia dadaraia lasi; bona idia hagoadaia lalokau idia hahedinaraia totona, idia habadua lasi ela bona idia badu dikadika o idia lalohisihisi.

[Picture on page 31]

Ghana tanona ai ruma dekenai “ oware” gadarana idia karaia; inai tamana bona sinana ese unai gadara idia gadaralaia neganai dala idia kehoa edia natudia danu idia hebamo namonamo totona