Ukraine Durua Totona Haida Idia Siaia
NIUSPEPA, reidio, bona televisen dekenai idia vara sivarai dikadia idia gwauraia hedinarai. Tanobada dekenai moni ia hegeregere lasi dainai heiriheiri ia vara, aniani ia hegeregere lasi, bona hitolo karana ia noho—hari inai nega lalonai, guna idia gwauraia Soviet Union dekenai unai bamona ia vara. Iehova ena Witness taudia edia Hakaua Oreana be vanegai Denmark ena Watch Tower Society ena branch opesi idia hamaoroa namona be idia hegaegae idia dabu Witness taudia Ukraine dekenai idia durudia totona. Unai Denmark tadikakadia be dahaka idia karaia?
Maoromaoro idia hegaegae idia durudia totona! Branch opesi ese tadikaka ia siaidia maketi dekenai aniani namodia idia hoia totona. Denmark lalonai, Iehova ena kongregesen taudia iboudiai dekenai hereva idia siaia, unai sivarai idia hadibaia totona. Branch ese inai ripoti ia torea: “Kongregesen iboudiai idia ura bada idia heduru. Harihari, ai ese kara ta do ai karaia diba idia dabu taudia dekenai aiemai hebogahisi ai hahedinaraia totona.” Danu, Germany lalonai tadikaka be taraka 5 idia henia bona Society ese unai harihari gaudia be Denmark dekenai idia siaia. Unai taraka 5, basi rua, bona idia volantia taria taudia 14 be Saturday, December 7, 1991 ai, Denmark ena branch dekenai idia ginidae. Branch ena gaukara taudia ese idia hoia anianidia be unai taraka idia hahonudia.
Monday, December 9, dina tubua ena nega lalonai, unai taraka idia hegaegae gabu daudau idia heau henia totona. Europe tanona do idia heau hanaia ela bona Ukraine dekenai do idia ginidae. Branch toretorena ia gwau: “Idia heau gwauraia neganai, Betele taudia iboudiai be mai hebogahisi danu idia gini bona edia imana idia davedavelaia, idia bamahuta henidia totona. Ai diba nega momo dagedage taudia ese unai bamona heduru karana idia hadikaia, unai dainai ai be tadikaka totona ai guriguri momo ela bona idia ginidae.”
December 18 ai, aiemai lalo-hekwarahi ena badina ia ore. Denmark ena branch opesi idia kamonai unai taraka be dika idia davaria lasi bona Lvov, Ukraine dekenai idia ginidae vadaeni. Ukraine dekenai idia noho tadikakadia ese unai heduru idia davaria. Tadikaka edia lalo-hekwarahi ia ore unai aniani be taraka dekena amo idia kokia neganai. Ruma bese totona katon 1,100 ta ta iboudiai edia metau ta ta be 20 kilogram—idia iboudiai dekenai vamu, paraoa, raisi, suga, bona aniani ma haida idia udaia! Unai taraka idia mailaia anianina ena metau ibounai be 22 ton. Denmark branch ena toretore ia gwau: “Ai moale bada, bona Iehova ai tanikiu henia badina ia ese ai ia naria dainai bona dala ia kehoa ai heduru totona.”
Idia hegaegae, gabeai dabua danu do idia siaia totona. Branch ena toretore ia gwau, “kongregesen iboudiai ese unai gaukara idia durua bada” danu. Momokani, Iehova ese ‘edia kohu ia habadaia, vadaeni hebogahisi kara momo idia karaia diba.’ (2 Korinto 9:11) Danu, idia moale, badina mai edia ura danu edia tadikaka bona taihu idia durudia. Unai lalokau karana ese ia hahedinaraia idia be Iesu ena hahediba taudia. (Ioane 13:35) Inai ia dabu tanobadana dekenai taunimanima momo lasi ese unai bamona lalokau karana idia hahedinaraia.