Lahi Dainai Ruma Haginia Gaukarana Idia Goadalaia
“LAHI! Lahi! Iehova ena Witness taudia edia Assembly Hall be lahi amo ia araia!” Friday adorahi, October 1989 ai, Heerenveen dekenai unai hereva idia boiboilaia, ia be taoni ta Netherlands ena mirigini kahana dekenai.
Iehova ena Witness taudia be lagani 11 lalonai unai Assembly Hall namona idia gaukaralaia. Kahirakahira Saturday bona Sunday iboudiai idia gaukaralaia edia dina rua sekit hebouhebouna ta eiava dina tamona hebouhebouna ta idia karaia totona, bona taunimanima handred momo unuseniai idia lao hebou totona. Unai be gabu namona Bible hadibaia gaukarana idia karaia totona.
Unai ruma ena guhi idia hanamoa neganai, aksiden ia vara. Miniti haida lalonai, lahi ese unai ruma ia araia ore. To moale gauna be taunimanima ta ese bero ia davaria lasi.
Witness taudia idia lalohisihisi edia ruma ia araia dainai, to kara haraga palani idia karaia ma gabu ta dekenai ruma matamatana ta do idia haginia totona. Gabu namona ta idia davaria Swifterbant dekenai, unai be Flevoland provinsi dekenai. Unai be gunaguna Zuider Zee ena kopukopu gabuna, to unai tano idia hanamoa, bona ia be davara ena maka (sea Level ) 5 mita henunai ia noho.
January 1991 ia ginidae neganai, gwaumaoro idia henia Assembly Hall matamatana haginia gaukarana idia hamatamaia totona. May ia lao September lagani 1991 ai unai gaukara do idia karaia. Witness taudia handred momo idia volantia unai gaukara idia karaia totona; memero haida idia laloa unai gaukara idia haorea murinai namona be nega ibounai Iehova Dirava ena hesiai gaukara do idia karaia. Gaukara taudia momo be Belgium bona England dekena amo idia mai.
Toana namo herea rumana idia haginia. Taunimanima idia helai hebou daiutu badana bona aniani daiutuna edia padanai taunimanima idia rakalaia dalana mai ena galasi guhina idia karaia. Helai hebou daiutu badana dekenai taunimanima 1,000 idia helai diba, bona unai ruma badinai ia noho rumana dekenai televisen dekena amo, ma taunimanima 230 be program idia raraia diba.
Hari inai nega lalonai, taunimanima tausen momo idia gwau: “Umui taunimanima e, umui mai, Iehova ena ororo dekenai do ita daekau, Iakobo ena Dirava ena dubu ai; bona ia ese ena kara ita do ia hadibaia.” (Isaia 2:2, 3) Unai Assembly Hall matamatana dekenai bona ma gabu momo dekenai taunimanima be lauma dalanai idia hadibaia. Unai hanua dekenai Iehova ena Witness taudia edia Kingdom Hall dekenai unai bamona idia karaia danu. Unuseniai mai moale danu oi do idia abia dae.