Dirava be Abidadama amo Gorere Hanamoa Kara Ia Abia Dae A?

“HOA karadia hari dina ita itaia momokani!” Oibe, raraia taudia idia hoa bada. Ena tauanina ia marere diba lasi tauna be edia vairana dekenai ia namo lou. Gorere hanamoa tauna ese unai tau ia hamaoroa, ia gwau: “Oi toreisi, emu geda oi lokua, emu ruma dekenai oi lao.” Unai tau ia toreisi bona unai ia karaia! Iena tauanina ia mareremarere lou. Unai dainai, unuseniai idia gini noho taudia ese “Dirava dekenai idia hanamoa”! (Luka 5:​18-26) Lagani 2,000 gunanai Iesu ese unai gorere hanamoa karana ia karaia, bona ia hedinarai Dirava ese gwaumaoro ia henia unai ia karaia totona.

Hari inai nega be edena bamona? Hospital ena muramura ese ia hanamodia lasi goreredia be hoa dalanai idia hanamoa diba, eiava? Iesu be hoa dalanai gorere idauidau ia hanamoa. Hari inai negai, abidadama amo gorere idia hanamoa taudia idia gwau Iesu idia tohotohoa. Edena bamona edia hereva ita laloa?

Abidadama amo gorere hanamoa karana ena anina idia gwauraia be, “Dirava dekenai idia guriguri bona idia abidadama henia neganai, gorere idauidau do idia hanamoa diba.” Encyclopædia Britannica ese unai ia hamomokania, ia gwau: “Keristen taudia edia sivarai dekenai, hoa dalanai gorere idauidau hanamoa karana be Iesu bona ena aposetolo taudia edia haroro negadia lalonai ia hamatamaia.” Oibe, Iesu ese gorere hanamoa hoa karadia ia karaia. Hari inai negai, abidadama amo gorere idia hanamoa taudia be ia bamona hoa karadia idia karaia, eiava?

Abidadama be Gau Badana, Eiava?

Black’s Bible Dictionary ia gwau, Iesu “ese ia hahedinaraia [abidadama] be gau badana hoa dalanai gorere idauidau hanamoa totona.” To abidadama sibona be mai ena anina bada, eiava? Iesu ia gwau gorere tauna be abidadama ia abia guna bena gabeai ena gorere do ia hanamoa, eiava? Haere be, lasi. Namona be gorere hanamoa tauna be mai ena abidadama bada, to gorere tauna dekenai abidadama lasi be gau badana lasi. Nega ta lalonai, Iesu ena aposetolo taudia ese moru kava moru kava gorere ia abia merona idia hanamoa diba lasi. Iesu ese unai mero ena gorere ia hanamoa bena gabeai ia ese ena aposetolo taudia ia hamaorodia dahaka dainai idia ese unai mero ena gorere idia hanamoa diba lasi. “Iesu ia gwau, ‘Umui emui abidadama be maragimaragi dainai.’ ”​—Mataio 17:​14-20.

Mataio 8:​16, 17 ese ia hahedinaraia, Iesu ese “gorere taudia idauidau ibounai danu ia hanamoa.” Momokani, unai taudia be Iesu dekenai idia abidadama dainai Iesu dekenai idia lao. (Mataio 8:13; 9:​22, 29) Nega momo idia lao Iesu idia noia guna bena gabeai Iesu ese ia hanamodia. To, unai hoa karadia ia karaia neganai Iesu ia gwau lasi edia abidadama idia gwauraia hedinarai guna. Nega ta ai, Iesu ese aena dika tauna ta ia hanamoa to unai tau ia diba lasi unai be Iesu. (Ioane 5:​5-9, 13) Iesu idia dogoatao hanuaboina dekenai, Petro be hahelaga tauna badana ena hesiai tauna ena taiana ia utua oho bona Iesu ese ena taiana ia hanamoa, ena be unai hanuaboi ai Iesu idia inai henia taudia ida ia mai idia dogoatao totona. (Luka 22:​50, 51) Oibe, nega haida, Iesu ese mase taudia ia hatoredia isi lou!​—Luka 8:​54, 55; Ioane 11:​43, 44.

Edena dala ai Iesu ese unai hoa karadia ia karaia diba? Badina Dirava ena lauma helaga eiava gaukara siahuna dekenai ia tabekau dainai. Unai ese gorere tauna ia hanamoa, to gorere tauna ena abidadama ese iena gorere ia hanamoa lasi. Evanelia Bukadia edia sivarai oi duahia neganai, ia hahedinaraia Iesu be taunimanima momo lasi vairadia dekenai gorere idauidau ia hanamoa. Ia ese heagi kara idauidau ia karaia lasi taunimanima edia lalona ia veria totona. Ma danu, ena be gorere be idauidau, to Iesu ese idia ibounai ia hanamoa. Nega ibounai ia hanamodia, bona moni davana ia tahua lasi.​—Mataio 15:​30, 31.

Inai Negai Gorere Hanamoa Karadia be Iesu Ia Karaia Bamona, A?

Gorere be gau dikana momokani, unai dainai ita gorere neganai, maoromaoro hanamoa daladia ita tahua. Bema “kohu momo lasi taudia edia gabu dekenai ita noho, bona diba momo gorere hanamoa gaukara taudia ese unai taudia idia laloa momo lasi, to anina lasi kohu bamona idia kara henidia, unai be edena bamona”? Latin-America ena gabu ta dekenai doketa ta ese unai bamona kara ia itaia. Bona edena bamona, bema ita noho gabuna dekenai ‘doketa taudia iboudiai amo 40 pesen sibona edia diba ia hegeregere unai gaukara idia karaia totona’?

Unai dainai, ita hoa lasi bema taunimanima momo be idia lao abidadama amo gorere hanamoa taudia dekenai. To, sibodia idia gwauraia abidadama amo gorere idia hanamoa taudia edia hereva be taunimanima ese idia hepapahuahulaia. São Paulo, Brazil dekenai, taunimanima 70,000 idia hebou gorere hanamoa taudia rua idia itaia totona, ‘unai taudia rua be taudia hutuma ese idia negea mata-galasidia handred momo latadiai idia raka bona idia moia, bona idia gwauhamata edia matana dikadia do idia hanamoa lou.’ Unai gorere ia hanamoa tauna ta be idia henanadai henia neganai hereva momokani danu ia gwau: “Ai gurigurilaia gorere taudia haida sibona be do idia namo. Edia abidadama hegeregerenai do idia namo. Bema tau ta be mai ena abidadama, ena gorere do ia ore.” Ia gwau bema gorere tauna ena abidadama be lasi ena gorere do ia ore lasi. To oi laloa, Iesu ia gwau gorere hanamoa tauna ena abidadama be maragimaragi dainai, gorere ia hanamoa diba lasi!​—Mareko 9:​37-42.

Gorere ia hanamoa tauna ma ta ia gwauhamata, kansa gorere bona tauanina mareremarere lasi gorerena do ia hanamoa. Dahaka ia vara? Veja magasin ia gwau, “unai gwauhamata ia hamomokania lasi.” Bona unai tau ena kara mani umui laloa: “[Abidadama amo gorere hanamoa tauna] be kahirakahira hora rua lalonai ia idia raraia taudia ia haroro henidia, ia guriguri, ia boiboi badabada, bona ane ia abia​—idia abidadama henia taudia be ena imana amo ia botadia, lauma dikadia be edia tauanina amo ia luludia totona. Unai murinai iena necktie bona muko ia negea idia raraia namonamo taudia dekenai bona moni gogoa mereki ta ia henia taunimanima amo ‘sibodia edia ura dainai do idia henia kontribusen’ moni idia gogoa totona.” Iesu bona ena aposetolo taudia be hoa dalanai gorere idia hanamoa neganai moni davana idia gwauraia lasi, eiava taunimanima vairanai heagi kara idauidau idia karaia lasi.

Unai dainai, hari inai nega lalonai abidadama amo gorere idia hanamoa taudia be Iesu ena kara idia tohotohoa lasi. Bona reana Dirava ese edia kara ia abia dae diba lasi. To, hari inai negai, Dirava ese hoa dalanai gorere hanamoa karadia haida ia abia dae, eiava? Bona ita eiava iseda lalokau taudia idia gorere neganai, dala ta ia noho iseda abidadama karana dainai unai gorere amo idia namo diba?