Herevana Idia Hekwarahi o Idia Mase Diba to Idia Mai
UNAI dina be January 2, 1992. Gabuna be Maxixe, Inhambane Provinsi. Unai be Mozambique, Africa dekenai, bona reidio idia kehoa neganai hanuaboi ena rege ia koua. Reidio hereva tauna ia gwau: “Iehova ena Witness taudia be iseda provinsi dekenai edia ‘Mauri Namona Idia Ura Henia Taudia’ Hebouhebouna idia karaia. Idia ura taunimanima idia hadibaia edena dala ai hari tanobadana dekenai ruhaia mauri namona momokanina idia davaria diba. Iboudiai idia boiria idia mai totona.”
Unai gabu daudauna Africa dekenai gau ta ia vara bona nega daudau lalonai do idia laloatao! Nega ginigunana ai, Iehova ena Witness taudia edia distrik hebouhebouna idia karaia, bona taunimanima 1,024 be unuseniai idia moalelaia. Lagani haida gunanai, unai idia karaia diba lasi Mozambique dekenai badina gavamani ese Iehova ena Witness taudia edia gaukara ia taravatua. Oi ura unai hebouhebou dekenai idia lao henia totona unai taudia ese idia karaia gari lasi karadia edia sivarai oi kamonai, a?
Inhambane Provinsi, Africa ena gabu momo bamona, be hairai gabuna momokani. Arab taudia edia gwarume abia totona vanagi mai edia palai be davara dekenai idia laolao. Niu audia be momo herea. To gau dikana ta be unai gabu dekenai: unai bese taudia idia tuari heheni!
Nega momo, daba neganai guhi ena niu raudia rumana lalonai idia mahuta taudia be kahirakahira uda dekenai tuarina ena rege dainai idia noga; hanuaboi ibounai lalonai unai rege be boom-boom-boom bamona. Nega momo ami lalonai idia noho lasi hanua taudia be hisihisi idia davaria. Nega haida natudia oi itaia, idia loaloa gageva bona edia imana eiava aena be lasi eiava idia dika. Iehova ena Witness taudia haida danu be edia vairana bona tauanina dekenai bero bona hahisihisia toana ia noho.
Unai bamona idia noho dainai, “Mauri Namona Idia Ura Henia Taudia” edia Hebouhebou dekenai idia mai taudia idia moale bada. Ena be hebouhebou lao henia dalanai tuari taudia ese idia dogoatao diba, to uda amo idia mai besedia momo idia ura momokani idia mai. Bona unuseniai idia lao be mai hekwarahi, badina taunimanima idia loaloa dalana be nega momo mai edia guhi lasi taraka badadia dekenai. Nega haida pasendia 400 be taraka tamona dekenai idia gui diba! Unai taraka momo idia heau hebou nega tamona bona ami taudia be idia danu idia lao durudia totona.
Unai dala ai dika idia davaria idia laloa lasi besena ta be Nora bona ena natudia kekeni toi, ta be lagani tamona, ta be lagani toi, bona ta be lagani 6. Hua momo gunanai moni ia haboua unai laolao ena davana ia karaia totona. Ena be hebouhebou gabuna dekenai mahuta gabuna idia gwauraia hidi namonamo diba lasi to unai ese ia koua lasi. Ma tadikaka momo ida, Nora bona ena ruma bese be hebouhebou gabuna ena guhi lasi tanona dekenai idia nadunadu, idia aniani, bona idia mahuta.
Ena be siahu bada herea murinai medu bada ia diho, to tadikaka be lauma ariana idia moalelaia dalana idia koua lasi. Idia laloa gau badana be hebouhebou dekenai idia mai. Indian Davara ena ranu dekenai taunimanima 17 be edia gwauhamata idia hamomokania. Bapatiso neganai, mai moale danu idia itaia taudia be Iehova dekenai hanamoa anena idia abia.
Unai tomadiho taudia idia davaria momokani Dirava ese ia henia ruhaia mauri namona ena anina be dahaka. Hanua badana, Maputo, amo ia mai tauna Hans ese ia gwauraia hegeregerena, ia gwau: “Africa dekenai, inai gabu lalonai, ita be Iehova ena Witness taudia edia gaukara ena kahana matamatana ta ita itaia.”