Oi Bisi Anina Lasi Gaukara ai Eiava Iehova Ena Hesiai Gaukara Ai?

“SORI, lau bisi momokani.” Iehova ena Witness taudia ese Basileia ena sivarai namona gabu ibounai dekenai idia harorolaia neganai unai hereva idia kamonai momo. (Mataio 24:14) Bona nega haida taunimanima idia gwau, “Lau bisi” to unai be ekskius herevana sibona; to momokani taunimanima momo be idia bisi. Idia be “tanobada ena lalo-metau idauidau” amo idia bisi momo​—moni gaukara idauidau idia karaia edia mauri idia naria totona, gau idauidau edia davana idia karaia, gaukara gabuna dekenai idia lao bona idia mai, edia natudia idia naridia, edia ruma idia naria, edia motuka idia naria, bona edia kohu ma haida idia naria.​—Mataio 13:22.

Ena be taunimanima idia bisi momokani, to haida sibona be huahua havaraia gaukarana dekenai idia vareai. Aonega tauna Solomon be nega ta ai inai bamona ia hereva, ia gwau: “Tau ta ena gaukara iboudiai bona ena hekwarahi ibounai dina ena henunai ena davana be dahaka? Badina ena dina iboudiai lalonai hisihisi amo ia honu, bona ena gaukara be lalo-hekwarahi gauna; hanuaboi dekenai danu iena lalona ia laga-ani lasi. Unai danu be anina lasi.”​—Kohelete 2:​22, 23.

Bible danu ese unai gaukara ia gwauraia “anina lasi gaukara.” (Heberu 9:14) Unai bamona gaukara ese oiemu mauri ibounai ia biagua, eiava? Namona be umui Keristen taudia ese unai gaukara umui laloa bada, badina Dirava ese “ta ta edia gaukara davana do ia henia.” (Salamo 62:12) “Nega be kwadogi” dainai, namona be ita naria namonamo, namo lasi iseda nega ita halusia kava anina lasi gaukaradia dekenai. (1 Korinto 7:29) To anina lasi gaukaradia be dahaka? Edena bamona unai gaukara dekenai ita laloa? Bona edena bamona do ita diba mai anina gaukara dekenai ita bisi?

Anina Lasi Gaukaradia Hahedinaraia

Heberu 6:​1, 2 dekenai, Paulo ia gwau: “Unai dainai namona be Keriso ena hadibaia hereva, diba hamatamaia gaudia ita rakatania. Bona iena hereva badadia do ita tahua. Sivarai Namona ena hadibaia hereva, diba hamatamaia gaudia, hegeregere kara dika dekena amo lalona giroa bona Dirava abidadama henia, inai gaudia sibona do ita gwauraia be hegeregere lasi. Ma bapatiso, imana kwarana dekenai atoa, mase dekena amo toreisi lou, bona kara dika ena kota henia hanaihanai, unai be hadibaia hereva, hamatamaia gaudia sibona.” Inai oi laloa, “diba hamatamaia gaudia” be “kara dika dekena amo lalona giroa” karana danu. Paulo ena hereva idia duahia taudia be Keristen taudia, bona idia be anina lasi gaukara dekena amo idia helalo-kerehai vadaeni. Edena bamona?

Keristen taudia gunadia edia nega lalonai haida be Keriso idia do abia dae lasi neganai, idia haida be anina lasi “tauanina ena kara” idia karaia, hegeregere, “heudahanai, kara mirodia, matabodaga, kaivakuku tomadiho henia kara, meamea,” bona ma kara dika rohorohodia haida. (Galatia 5:​19-21) Bema unai bamona kara idia tahua namonamo lasi neganai, idia haida be lauma dalanai idia mase diba. To gau namona be unai Keristen taudia be unai mase dalana idia rakatania, idia helalo-kerehai, bona idia “huria goeva vadaeni.” Mai moale bona mai goeva ida Iehova ena badinai idia gini.​—1 Korinto 6:​9-11, NW.

To Keristen taudia haida be kara dika badadia eiava kara bodaga karadia idia karaia lasi, unai dainai unai gaudia amo idia helalo-kerehai be anina lasi. Paulo ena revareva be abidadama Iuda taudia dekenai, idia momo be guna Mose ena Taravatu idia badinaia, to gabeai Keriso idia abia dae. Edena bamona anina lasi karadia dekenai idia helalo-kerehai? Momokani Taravatu hegeregerenai edia tomadiho karadia idauidau bona aniani karadia idauidau be kerere lasi. Unai Taravatu be ia “helaga, maoro bona namo, ani”? (Roma 7:12) Oibe, to Roma 10:​2, 3 dekenai, Paulo be Iuda taudia inai bamona ia gwauraidia, ia gwau: “Lau diba idia ese Dirava ena hesiai gaukara idia ura karaia namonamo, to karaia dalana be idia diba lasi. Dirava ese taunimanima ia gwauraidia maoromaoro ia vairanai dalana be idia badinaia lasi, to idia sibona ese unai maoromaoro dalana idia tahua. Unai dainai Dirava ena dala idia abia dae lasi.”

Oibe, Iuda bese taudia idia laloa Taravatu idia badinaia neganai hahemauri do idia abia diba. To, Paulo ia gwau, “Dirava vairanai tau ta lasi be maoromaoro Taravatu ia badinaia dekena amo. Lasi, to Dirava vairanai ita maoromaoro dalana be tamona, gauna be inai: . . . Keriso Iesu ai abidadama henia, Dirava vairanai do ai maoromaoro totona.” (Galatia 2:16) Keriso ese mauri davana ena boubou ia henia murinai, Taravatu ena gaukara​—ena be mai edia lalona ibounai ida idia karaia eiava idia helaga momokani—​to unai kara ibounai be anina lasi gaukaradia, unai be hahemauri dalana lasi. Kudou-maoro Iuda taudia be Dirava ese ia abidia dae badina anina lasi gaukaradia dekenai idia helalo-kerehai bona idia bapatiso edia helalo-kerehai karana idia hamomokania totona.​—Kara 2:38.

Unai amo dahaka ita diba? Anina lasi gaukaradia be kara dikadia bona kara bodagadia sibodia lasi, to idia be lauma dalanai idia mase gaukaradia idauidau bona huahua idia havaraia lasi gaukaradia. To Keristen taudia iboudiai be idia bapatiso lasi neganai, idia helalo-kerehai vadaeni, ani? Momokani, to Keristen ginigunadia haida be gabeai kara bodaga karadia dekenai idia moru. (1 Korinto 5:1) Iuda Keristen taudia edia huanai haida idia ura Mose ena Taravatu dekenai idia giroa bona anina lasi gaukaradia idia karaia lou. Paulo ese unai bamona taudia ia hamaorodia anina lasi gaukaradia do idia karaia lou lasi.​—Galatia 4:21; 5:1.

Anina Lasi Gaukaradia Dekenai Ita Naria Namonamo

Unai dainai, hari Iehova ena taunimanima idia naria namonamo, anina lasi gaukaradia dekenai idia moru garina. Gabu ibounai dekenai unai kara idia karaia taudia ese iseda lalona idia ania, idia ura edia kara hegeregerena ita karaia, kara momokani ita karaia lasi, bona kara bodaga karadia ita karaia. Madi, lagani ta ta iboudiai lalonai, Keristen taudia tausen momo be unai bamona hekwakwanai lalonai idia vareai, bona idia helalo-kerehai lasi taudia be Keristen kongregesen murimurinai idia atodia. Unai dainai, hari, namona be Keristen taudia ese Paulo ena sisiba Efeso 4:​22-24 dekenai idia badinaia, ia gwau: “Emui mauri gunana dabua gunana bamona umui kokia. Badina be iena dika bona iena koikoi dainai ia be mase dekenai ia lao noho. Umui emui laloa bona emui kudouna do umui hamatamataia, be gau badana. Mauri matamata do umui atoa, dabua matamata umui atoa bamona. Inai mauri matamata dainai emui toana be Dirava ena toana bamona, ia ese ia karaia gauna. Inai mauri matamata ena kara be maoromaoro, helaga bona momokani.”

Momokani, Paulo ese Efeso taudia ia tore henidia neganai, idia ese mauri matamata idia hahedokilaia vadaeni. To Paulo ese ia hamaorodia namona be hanaihanai unai mauri matamata idia hahedokilaia! Keristen taudia idia hekwarahi lasi neganai, ura dikadia ese edia lalona do idia veria bona idia ese anina lasi gaukaradia do idia karaia diba. Hari unai kara be ia momokani ita dekenai. Namona be hanaihanai ita hekwarahi mauri matamata ita hahedokilaia totona, namo lasi iseda mauri gunana ena kara ita karaia lou. Namona be tauanina ena kara dika idauidau ita dadaraia​—ita inai henia momokani. Salamo torea tauna, ia gwau: “Iehova umui lalokau henia taudia e, dika umui inai henia.”​—Salamo 97:10.

Hari inai nega lalonai, Iehova ena Witness taudia momo be kara goeva idia karaia be moale gauna. To idia haida ena be kara kereredia idia karaia lasi, to idia karaia kara be sibona edia ura bona anina lasi karadia. Hegeregere, haida be moni abia gaukara idauidau idia karaia eiava kohu momo idia tahua. To Bible ese ita ia sisiba henia, ia gwau: “To kohu momo idia ura henia taudia be hedibagani dekenai idia moru diba. Bona boroma be tarapu dekenai ia moru bamona, ura dikadia bona ura kavakava ese unai kohu ura taudia do idia koia bona hadikaia.” (1 Timoteo 6:9) Haida idia ura sikuli badana idia abia dainai unai be tarapu ta bamona. Momokani, sikuli ita karaia neganai moni gaukara do ita abia diba. To, haida be inai tanobada ena sikuli badana idia tahua noho lalonai nega bada herea idia halusia dainai lauma dalanai idia moru.

Momokani, kara haida be idia kerere lasi. To, bema unai kara be hari oiemu mauri ia durua lasi eiava unai kara dainai Iehova ese oi do ia abia dae lasi, unai be anina lasi karadia. Unai kara ese nega bona goada ia haorea to lauma ena hahenamo idia havaraia lasi, bona mauri namona ia havaraia lasi.​—Kohelete 2:11 itaia.

Reana oi hekwarahi noho lauma gaukara namodia idauidau lalonai oi bisi totona. To, heduru gauna be hanaihanai oiemu kara oi tahua. Nega ta ta lalonai reana oi sibona dekenai inai henanadai haida do oi henanadailaia diba, hegeregere: ‘Anina lasi moni gaukara lau abia dainai, lauegu haroro gaukara karana bona hebou lao henia karana ia hadikaia, eiava?’ ‘Nega bada lau halusia moale karadia dekenai, to nega sisina sibona lau gaukaralaia lau sibona egu stadi karana dekenai bona ruma bese stadi karana dekenai, eiava?’ ‘Lauegu nega bona goada lau negea kohu momo lau naria totona bona lau be nega lasi kongregesen dekenai heduru idia tahua taudia, hegeregere gorere taudia bona buruka taudia lau durudia totona, eiava?’ Unai henanadai edia haere ese reana do idia hahedinaraia namona be lauma gaukaradia do oi laloa bada.

Oi Bisi Noho Iehova Ena Hesiai Gaukara Dekenai

Korinto Ginigunana 15:​58 ena hereva hegeregerena, ia gwau, “nega ibounai Lohiabada ena gaukara do umui karaia goadagoada.” Gau badana be Basileia ita harorolaia bona hadibaia gaukara ita karaia. Timoteo Iharuana 4:​5 dekenai, Paulo ia gwau: “Sivarai Namona harorolaia gaukara do oi karaia, bona Dirava ena hesiai tauna ena dagi karadia ibounai do oi karaia namonamo.” Elda taudia bona hesiai taudia be gaukara bada idia karaia mamoe oreana idia naria totona. (1 Timoteo 3:​1, 5, 13; 1 Petero 5:2) Ruma bese edia kwarana​—idia momo be reana tamana ta sibona eiava sinana ta sibona—​be mai edia maduna badana edia natudia idia naridia bona idia durudia Iehova danu edia turana karana do idia habadaia totona. Unai gaukara idia karaia lalonai idia hesiku bada, nega haida, idia hekwarahi bada dainai idia hesiku bada momokani. Ena be idia hesiku bada, to unai gaukara ese namo ia havaraia idia dekenai!

Hekwakwanai ta be inai: Edena bamona ta ese nega ia davaria unai mai anina bada gaukaradia ia karaia totona, a? Sibona oi biagua karana bona gau ibounai hegaegaelaia namonamo be gau badana. Korinto Ginigunana 9:​26, 27 dekenai, Paulo ia gwau: “Lau heau maoromaoro, mai laloa tamona danu, lauegu heau dokona do lau abia totona. Lau be boksini tauna bamona lau paisi goadagoada, do lau uini totona. Hodahoda lau paisia lasi. To lauegu tauanina lau botaia momokani, bona iena ura lau karaia lasi, do ia goada totona. Inai bamona lau karaia, badina be haida lau haroro henidia, to gabeai lau sibona lauegu mauri lau halusia garina.” Unai sisiba oiemu mauri lalonai oi gaukaralaia dalana ta be nega haida oiemu mauri lalonai oi karaia karadia oi tahua namonamo. Reana oiemu nega bona goada idia halusia kava anina lasi gaudia oi negea diba.

Hegeregere, oiemu goada bona nega bada be televisen raraia karana dekenai, moale idauidau karadia dekenai, tanobada bukadia idauidau duahia karana dekenai bona oi ura karaia gaudia dekenai oi halusia, eiava? The New York Times magasin ese ia hahedinaraia United States dekenai taunimanima badadia momo be “pura ta ta ibounai lalonai hora 30 mai kahana” televisen raraia karana dekenai idia halusia. Unai nega be gaukara namodia dekenai idia gaukaralaia diba, ani? Loaloa hesiai tauna ta ena adavana, ia gwau: “Nega ia haorea kava karadia ibounai lau hadokoa, hegeregere televisen raraia karana.” Dahaka ia vara? Ia ese encyclopedia ena Bible volume buka rua Insight on the Scriptures, ibounai ia duahia haorea!

Reana oi danu oiemu mauri lalonai anina lasi karadia oi negea bona oiemu mauri oi haidaua. Solomon ia gwau: “Ena be ia boga kunu eiava ia hitolo to ia gaukara tauna ia mahuta namonamo; to taga tauna ena kohu momo dainai ia mahuta diba lasi.” (Kohelete 5:​12, NW) Oiemu goada bona nega bada oi halusia anina lasi kohudia dekenai, a? Momokani, kohu momo ita abia neganai, ita hekwarahi unai kohu ita hanamodia totona, insurens davana ita karaia bona ita naridia namonamo. Reana namona be kohu haida oi negea be namo, ani?

Sediual namona ta oi karaia bona oi badinaia namonamo neganai, oiemu nega do oi gaukaralaia namonamo. Namona be unai sediual lalonai laga-ani negana, gadara bona loaloa ena nega oi atoa danu. To unai sediual dekenai lauma gaudia oi atoa guna be namo. Namona be nega oi atoa hanaihanai kongregesen hebou dekenai oi lao totona. Reana namona be dina haida eiava adorahi haida oi abia hidi haroro gaukara oi karaia totona. Palani namona oi karaia neganai, oiemu hesiai gaukara oi habadaia bona reana nega ta ta lalonai heduru pioneer gaukara do oi karaia diba. Oiemu sediual lalonai nega oi atoa oi sibona emu stadi bona emu ruma bese stadi karaia totona, bona hebou herevadia ibounai oi hegaegaelaia namonamo danu. Bema oi hegaegae namonamo neganai, hebou ena hereva ibounai amo namo bada do oi davaria bona oiemu haere amo “lalokau dekena amo kara namodia do [oi] karaia.”​—Heberu 10:24.

Nega ita davaria stadi ita karaia totona, reana gau haida do ita negea. Hegeregere, tanobada hegegemadai Betele ena ruma bese taudia be hanaihanai daba momokani dekenai idia toreisi bona dina ena siri idia kikilaia. Daba ta ta iboudiai dekenai nega sisina oi atoa sibona emu stadi oi karaia be ia hegeregere, eiava? Salamo torea tauna ia gwau: “Daba momokani ai lau toreisi, heduru totona lau taitai, oiemu hereva lau naria noho.” (Salamo 119:147) Momokani, daba momokani dekenai oi toreisi totona namona be oiemu sediual oi hegaegaelaia namonamo hora namona ai oi mahuta, bona daba dekenai oi toreisi neganai oi laga-ani namonamo dainai do oi gaukara namonamo diba.

Iehova ena Hesiai Gaukara Ai Oi Bisi Ena Hahenamo

“Nega ibounai Lohiabada ena gaukara do [oi] karaia goadagoada” totona, namona be palani namona oi karaia, sibona oi biagua bona sibona emu ura haida oi negea. To hahenamo momo do oi abia. Unai dainai, namona be oi bisi noho, anina lasi gaukaradia eiava gaukara dikadia dekenai lasi, badina unai ese lalo-manoka bona hisihisi ia havaraia, to Iehova ena hesiai gaukara dekenai oi bisi noho. Unai gaukara amo oiemu abidadama oi hahedinaraia, Dirava ese oi do ia abia dae, bona unai amo mauri hanaihanai do oi abia!

[Picture on page 28]

Keristen tauna ese ia badinaia diba sediual ia karaia neganai, unai ese ia durua aonega dalanai ena nega do ia gaukaralaia totona