“Oi Matamata Neganai Oi Adavaia Hahinena”

“HEUDAHANAI be dina ta ta ibounai bamona ia vara gauna.” Los Angeles Times herevana hegeregerena, diba taudia momo be unai bamona idia hereva. Unai bamona hereva dekenai oi hoa, a? Taunimanima edia darana ena doketa Frank Pittman ia laloa headava tatau 100 100 amo 50 50 idia heudahanai bona headava hahine 100 100 amo 30 30 ia lao 40 40 bamona idia heudahanai. Bema unai be momokani, headava taudia iboudiai amo kahirakahira kahana tamona be idia heudahanai!

Anina be heudahanai be ia maoro, a? Lasi momokani! Taunimanima momo be edia headava ena gwauhamata idia badinaia lasi dainai ita gwau lasi unai be maoro​—hegeregerena taravatu utua kara ia bada ia lao dainai ita gwau lasi ia maoro taunimanima idia henao. Matabodaga kara ese hisihisi ia havaraia. Haheitalai be, hari inai negai taunimanima momo be sihari kava karana amo gorere idia abia, unai gorere iboudiai idia koua diba bema taunimanima be mauri ena kara goeva idia badinaia. Mase ia havaraia gorerena AIDS be ia vara bada diba lasi bema taunimanima be sihari kava karana idia karaia lasi.

Unai sibona lasi, to diba bada taudia bona “mai edia aonega taudia” be hisihisi bada herea idia davaria edia adavana be idia heudahanai neganai. Heudahanai karana tamona sibona ese hisihisi ia havaraia bona sedira lagani momo murinai sibona unai hisihisi ia ore diba.

To, gau badana be inai, headava gwauhamata idia matauraia namonamo lasi karana be Dirava matauraia lasi momokani karana, badina ia be headava ia Havaraia Tauna. Bible ia sisiba, ia gwau: “Headava kara be taunimanima ibounai ese do idia matauraia be namo.” Ita be sisiba ita abia danu: “Dirava ese heudahanai taudia bona headava hadikaia taudia edia kerere davana do ia karaia momokani.”​—Heberu 13:4.

Unai dainai, aonega taudia be Dirava ena lauma helaga ese ia havaraia herevadia idia badinaia, ia gwau: “Oi matamata neganai oi adavaia hahinena do oi moalelaia noho.” (Hereva Lada-isidia 5:18) Edia adavana ida noho namo bona moale idia tahua. Unai bamona idia karaia neganai edia tauanina bona edia lalona ena goada idia naria, bona gau badana be, headava ia Havaraia Tauna, Iehova Dirava, idia hanamoa bada.