Gado Idauidau Dekenai Hereva Karana—Ia Bada Ia Lao
“TAUNIMANIMA idia diba lasi gadona” ta dekenai tau ta ia hereva, bona ia gwau: “Siahu ta ese lauegu malana ia biagua bona ia dekena amo hereva be ranu bamona ia bubua diho. Lau moale bada herea! Lauegu hemami be lau goeva momokani. Unai nega amo lau be idau.”
Tau ta be “taunimanima idia diba lasi gadona” dekenai ia hereva hamatamaia neganai unai bamona ia hereva. To reana haida do idia gwau, ‘Unai kara be dahaka?’ Unai kara ena anina be dubu haida dekenai tatau bona hahine idia gwau Dirava ena lauma helaga ese idia ia hasiahua dainai idia diba lasi gadodia dekenai idia hereva diba.
Unai bamona tomadiho karana be ia bada ia lao. Guna, taunimanima idia gwau unai be Pentecostal taudia edia kara sibona, to hari, Baptist, Episcopalian, Lutheran, Methodist, Presbyterian, bona Roman Katolik tomadiho taudia be gado idauidau dekenai hereva karana idia karaia. Taunimanima ta be gado idauidau dekenai ia hereva neganai idia gwau iena hemami be ia moale hisidae, ia lalo-hekwarahi bada, ia matahanai bamona, bona ia ena lalona ia mahuta bamona. Haida idia gwau kava tauna bamona moale bada karana idia koua diba lasi mamina idia abia. Taunimanima idia laloa gado idauidau dekenai hereva karana, eiava glossolalia, be gau namona, bona mai ena mamina.
Dahaka Dainai Hari Inai Negai Gado Idauidau Ena Harihari Gauna Idia Ura Abia?
Iena buka Tongues of the Spirit lalonai, Cyril G. Williams ia gwau, reana “taunimanima haida idia laloa edia mauri lalonai idia hegeregere lasi dainai ‘gado idauidau dekenai hereva karana’ idia ura henia.” Ia gwau gado idauidau dekenai hereva karana be gau ta ia kehoa bena “unai ese ia durudia edia lalo-hekwarahi hamaragia totona” bona “edia lalona ena heiriheiri ia kokia.” Bema dubu gaukarana ia lalo-hekwarahilaia, lalona ena goada ia manoka, gaukara ta ena diba ia abia lasi, ena bese tauna ta ia mase, ruma lalonai heai ia vara, eiava ruma bese lalonai ta ia gorere, idia gwau unai ese dala ia kehoa bena idia be mai edia moale hisidae dekenai gado idauidau dekenai idia hereva diba.
Unai hegeregerena, John P. Kildahl ena buka The Psychology of Speaking in Tongues lalonai, ia gwau “lalo-hekwarahi be gau badana gado idauidau dekenai idia hereva totona.” Unai kara idia tahua namonamo bona taunimanima idia henanadai henia namonamo karana amo, idia davaria “gado idauidau dekenai idia hereva taudia 100 100 amo 85 85 bamona idia gwau idia lalo-hekwarahi bada murinai gado idauidau dekenai idia hereva diba.” Hegeregere, sinana ta ena natuna be kensa gorere ia abia bona ia ura gado idauidau dekenai do ia hereva bena ia totona do ia guriguri. Tau ta be moni gaukara dekenai dagi badana idia henia gwauraia ia lalo-hekwarahilaia negana lalonai, ia be gado idauidau dekenai ia hereva. Hahine ta ena adavana be orea ta, Alcoholics Anonymous, dekenai ia vareai [heduru ia abia ena inuinu kekero karana ia rakatania totona], bena pura tamona murinai iena hahine be gado idauidau dekenai ia hereva.
Unai Bamona Tauna Ena Hemami be Dahaka?
Ma ta be gado idauidau dekenai ia hereva hamatamaia neganai ia gwau: “Lauegu tauanina ibounai dekenai siahu mamina lau abia, bona keru bada lau abia bona egu varahu ia diho, egu imana bona aedia idia heudeheude bona idia manoka.” Gado idauidau dekenai idia hereva neganai, nega momo kara idauidau idia vara dainai taunimanima ma haida idia gari. Hegeregere, “kekeni ta ena aiona be helai gauna dekenai ia noho bona ena aena geduna be reirei dekenai idia noho, ena aena be idia maoromaoro bona auka herea dainai, sibona ena kanudi dekenai kahirakahira ena gadona ia koua.” Edia kongregesen hebouna ta dekenai “tau ta be dubu lalonai ruma ena kahana ta amo ia roho giroa lao giroa lao ela bona ruma ena dokona kahana dekenai.”
Profesa William J. Samarin ia gwau: “Taunimanima haida dekenai gado idauidau dekenai hereva karana be taravatu badana Lauma Helaga dekenai do idia bapatiso totona.” Bema idia abia lasi, idia laloa “idia hegeregere lasi.” Danu, idia laloa unai kara be “edia guriguri haerelaia toana, bona unai amo idia diba Dirava ia lalokau henidia bona ia abidia dae.” Ma haida idia gwau unai kara amo edia lalona ena mamina ia namo, idia moale, idia maino, bona “siahu goada mamina” idia abia bona “idia diba momokani idia be daidia” ena mamina idia abia.
Moale hisidae amo idia hereva be lauma helaga ena toana, a? Unai bamona kara ese ia hahedinaraia unai tau be Keristen momokanina ta, a? Hari inai nega lalonai, gado idauidau dekenai hereva karana be tomadiho momokani karana ta, a? Unai henanadai edia haere ita tahua namonamo be gau badana. Dahaka dainai? Badina ita ura Dirava ese iseda tomadiho do ia abia dae bona ia hanamoa.