Kara ta Idia Giroa Lou Totona

‘PARABOLE amo ia hereva henidia.’ Unai hereva amo Bible ese Iesu ena hebogahisi parabole herevadia toi ia gwauraidia​—idia be mamoe ta ia boio, moni ta ia boio, bona tamana ena natuna ta ia boio.​—Luka 15:​3-32.

April 15, 1991 ena Gima Kohorona (English gado) magasin lalonai, sivarai rua ese unai parabole herevadia edia anina idia hahedinaraidia, bona duahia taudia idia durua hari inai nega lalonai hebogahisi karana hahedinaraia dalana idia diba totona. Unai sivarai ena hereva badana ta ia gwau, namona be naria taudia ese orea murimurinai idia atoa taudia do idia vadivadi henidia hebogahisi amo durudia toho gaukarana do idia gunalaia. Unai idia torea sivaraina bona kara matamatana amo dahaka ia vara?

Unai magasin idia halasia daudau lasi murinai, tau ta Washington, U.S.A. dekena amo be inai bamona ia torea: “Iehova ena hebogahisi lalokau karana hamomokania leta ta be hari dina lalonai lau davaria. Unai leta lalonai Atai Herea Diravana ena heduru bona kara matamata herevadia dainai lau helai mai egu mata ranuna bona mai egu kudou moalena ida. Kara maoromaoro Diravana sibona ese idia boio mamoe bamona taudia ia durudia diba. . . . Oibe, lau be orea murimurinai idia atoa tauna, to kara lau karaia orea dekenai lau vareai lou totona.” October lalonai orea dekenai ia vareai lou.

To kongregesen elda taudia rua ese orea murimurinai idia atoa tauna idia vadivadi henia karana be edena bamona? Keristen hahine ta ia torea, ia gwau: “Egu moale mamina be hereva amo lau gwauraia hedinarai diba lasi. Egu tau be orea murimurinai idia atoa bona lagani 13 bamona unai bamona ia noho. Elda taudia ese magasin ena hereva idia badinaia bona egu tau idia vadivadi henia. Lagani momo lalodiai hebou dekenai ia lao lasi, to varani hanuaboi hebou dekenai ia lao. Ia hekwarahi ena mauri dalana ia haidaua bona orea dekenai do ia vareai lou totona.”

Loaloa naria taudia ese kongregesen ta ta iboudiai idia vadivadi henidia neganai unai heduru ena anina idia itaia. Vanegai, sekit naria tauna ta be leta dekenai ia gwau:

“April 15, 1991, Gima Kohorona [English gauna] idia halasia neganai, tadikaka momo idia diba lasi elda taudia ese orea murimurinai idia noho taudia idia vadivadi henidia neganai dahaka do ia vara. To hari idia diba vadaeni.

“Aiemai sekit dekenai, hari lau vadivadi henia vadaeni kongregesen hani dekediai, Kingdom Hall dekenai idia hebou lou taudia be 9. Ena be idia tamona sibona be orea dekenai idia abia vareai lou, to idia ma 8 be sisina sisina idia goada idia lao. Elda taudia bona kongregesen iboudiai idia moale edia hekwarahi ena anina idia davaria dainai, bona idia lalo-parara aonega dalana be tiokratik hereva idia badinaia.

“Ai moale unai hebogahisi heduru dalana ia kehoa dainai. Orea dekenai ia vareai lou taihuna ta ia gwau, ‘Lau goada lasi lau sibona lau vareai lou totona, badina lau laloa Iehova ese lau ia hahemaoro henia vadaeni. To elda taudia ese lau idia vadivadi henia neganai, lau idia hagoadaia dainai orea dekenai lau vareai lou diba.’ Hari, ia goada karaia dainai kongregesen taudia ia hagoadaia bada.”

Ena be idia vadivadi henidia taudia momo be idia ura lasi vareai lou, to unai hebogahisi gaukara amo namo bada idia havaraia. Unai dainai, September ia matamaia neganai, kongregesen iboudiai edia elda taudia be edia teritori lalonai orea murimurinai idia atoa taudia edia ladadia do idia itaia, bona hebogahisi ena heduru do idia ura abia taudia do idia vadivadi henidia idia durudia toho totona.