Bisop Badana be Ia Hegeregere Lasi!

LAGANI gunanai, kadinal taudia edia hebou idia hegaegaelaia Katolik Dubu idia lalo-hekwarahilaidia gaudia haida do idia kikilaia totona. Il Sabato niuspepa ia gwau idia kikilaia gauna ta be “tomadiho oreadia edia goada karaia karana.” To, unai niuspepa ia gwau: “Kadinal taudia be unai hereva dekenai idia lalo-tamona be do ia auka lasi. Idia iboudiai idia lalo-parara namona be tomadiho matamata oreadia idia vara ena anina do idia tahua namonamo bona dala idia tahua edia tubu idia koua totona.”

To, “tomadiho oreadia edia goada karaia karana” be hekwakwanai gauna Italy sibona dekenai lasi. Il Sabato niuspepa ena ripoti ia gwau: “Vanegai, Archbishop Kirill, Smolensk dekena amo [unai be Russia ena noho daudau siti badana ta] be Vatican ia vadivadi henia . . . ia ese pope ia noia dubu ena heduru do ia abia Iehova ena Witness orea bona idia bamona orea ma haida Soviet Union dekenai edia tubu dalana do ia koudia totona.”

Keristen ginigunadia edia nega lalonai, tomadiho badadia edia gunalaia taudia be unai bamona idia maumau Keristen orea taudia be mai goada danu edia hahediba idia harorolaia neganai. Nega ta ai, Iuda taudia be siti ena lohia taudia dekenai idia maumau, idia gwau: “Inai taudia be gabu ibounai dekenai kerere idia havaraia, bona hari idia mai iniseni” danu! (Kara 17:6) Unai nega lalonai, tomadiho gunalaia taudia idia goada karaia Keristen orea ena tubu dalana idia koua totona, to idia kwalimu lasi. Hari inai negai danu, bema Keristen momokani ena hahediba herevadia harorolaia gaukara idia koua toho, do idia kwalimu lasi. Dirava ia gwau: “Tuari gauna ta idia karaia oi idia hadikaia totona ena gaukara ena anina do ia vara lasi; bona hahemaoro dekenai oi idia gwauraia dika taudia iboudiai edia hereva oi ese do oi hakoikoia. Unai be Iehova ena hesiai taudia edia ahuna, bona edia kara maoromaoro be lau dekena amo.”​—Isaia 54:17.