Duahia Taudia Edia Henanadai

Mataio 28:17 ena anina be Iesu ia toreisi lou bena aposetolo taudia vairadiai ia hedinarai bena nega daudau murinai idia haida idia do daradara noho, a?

Lasi, unai lalohadai be Mataio 28:​16, 17 amo ita abia be kerere; ia gwau: “Diba tahua taudia 11 be idia lao Galilea dekenai, ororo ta, Iesu ese ia gwauraia guna do idia hedavari gabuna dekenai. Unuseni idia itaia, vadaeni idia tomadiho ia dekenai. To haida be idia laloa daradara.”

Iesu ese ena hahediba taudia ia hadibadia guna “ia be Ierusalema dekenai do ia lao, vadaeni hanua tau badadia bona dubu biagudia bona taravatu hadibaia taudia ese hisihisi momo do idia henia bona do idia alaia mase. To dina toi ia abia be do ia toreisi lou.” (Mataio 16:21) To, idia dogoatao bona idia alaia mase murinai, ena hahediba taudia idia lalohisihisi bona idia daradara. Bona tauanina ai ia hedinarai neganai, haida be “idia moale bona idia hoa dainai, do idia laloa daradara noho.” (Luka 24:​36-41) To ia toreisi lou murinai ia hedinarai loulou dainai, ia idia badinaia namonamo taudia idia abia dae ia toreisi lou vadaeni; aposetolo Toma danu ese unai ia abia dae.​—Ioane 20:​24-29.

Unai murinai aposetolo 11 mai edia kamonai be “idia lao Galilea dekenai.” (Mataio 28:16; Ioane 21:1) Unuseniai idia noho neganai, “nega tamona iseda ekalesia varavara taudia 500 mai kahana Iesu idia itaia.” (1 Korinto 15:6) Mataio 28:17 ia gwau unai neganai haida “be idia laloa daradara.” Reana unai daradara taudia be unai hahediba taudia 500 bogaragidiai.

Watch Tower Society ena presiden ginigunana, C. T. Russell, ena hereva mani oi laloa; ia gwau:

“Ita gwau diba lasi unai neganai aposetolo eleven-osi haida idia daradara, badina be idia diba momokani vadaeni, bona edia lalohadai idia gwauraia hedinarai vadaeni. Unai hebou lalonai be ‘ekalesia varavara taudia 500’ danu, ia toreisi lou negana amo idia do itaia lasi ela bona unai nega. Reana idia haida edia abidadama be manoka, aposetolo taudia bona iena turana haida, ia hereva henidia vadaeni taudia, edia abidadama hegeregerena lasi. Evanelia tauna ena hereva, ‘haida be idia laloa daradara,’ ese ia hahedinaraia ia ese gau ta ia hunia lasi. Ia hahedinaraia danu Lohiabada ena hahediba taudia ese gau ta idia abia dae kava lasi, to hamomokanilaia gaudia idia tahudia namonamo guna, bona idia abia dae taudia be unai murinai idia haroro mai edia ura bada bona mai edia goada ida dainai, ita diba momokani idia abia dae vaitani Lohiabada be ia toreisi lou vadaeni; ita hegeregerena idia diba iseda abidadama ia enai ena badina korikorina be unai. Bema Keriso ia toreisi lou lasi, ita abidadama kava bona iseda kara dikadia lalodiai ita do noho.​—1 Kor. 15:17.”​—Zion’s Watch Tower and Herald of Christ’s Presence, May 1, 1901, rau 152.

Mataio ese unai sivarai ia torea dalana ese ia hahedinaraia Baibel ena hereva be momokani. Bema ta ese sivarai koikoina ia torea, iena sivarai do idia hamomokania herevadia do ia toredia, taunimanima ese do idia abia dae totona; ena sivarai idia hakoikoia herevadia do ia toredia lasi. Vadaeni, Mataio be edena bamona?

Ia laloa lasi namona be iena hereva, “haida be idia laloa daradara” herevana, ena anina do ia gwauraia hedinarai. Mareko, Luka, bona Ioane ese unai idia sivarailaia lasi, to Mataio be aposetolo ta, bona bema ena hereva sibona ita laloa, reana ita laloa ia ese aposetolo eleven-osi ia gwauraidia unai. To ia ese unai hereva kwadogina ena anina ia gwauraia lasi. Bena lagani 14 murinai aposetolo Paulo ese ena revareva ginigunana Korinto taudia edia ia torea. Korinto Ginigunana 15:6 ai ia torea herevana dainai, ita laloa unai daradara taudia be aposetolo lasi, to idia be hahediba taudia Galilea ai idia noho, idia vairadiai Iesu be guna ia hedinarai lasi taudia. Unai dainai Mataio ena hereva, haida “idia laloa daradara” herevana, ena mamina be hereva momokanina ena mamina bamona; hereva momokani tauna ese sivarai momokanina ta lalonai ia torea neganai, ena anina ibounai ia gwauraia hedinarai toho lasi.