Duahia Taudia Edia Henanadai
Keristen memero eiava kekeni be idia ura headava neganai to idia adavaia diba turana namona ta idia davaria lasi, dahaka do idia karaia?
Ena be ita be Keristen momokani taudia, to reana ita lalohisihisi diba bema ita ura henia dikadika gauna ta ita abia lasi neganai. Hereva Lada-isidia 13:12 ese iseda mamina ia gwauraia hedinarai, ia gwau: “Do ita ura abia gauna ita abia haraga lasi neganai kudou ia hisihisi.” Keristen memero kekeni haida idia ura idia headava to idia adavaia diba turana namona ta idia davaria lasi neganai unai siri ia gwauraia mamina idia abia. Unai be ia momokani Paulo ia gwauraia taudia dekenai, idia be headava ena “ura dikadika ese idia ia araia.”—1 Korinto 7:9.
Iehova ese taunimanima dekenai headava urana ia atoa unai dainai do idia adavaia turana namona ta idia tahua. Unai dainai ita hoa lasi idia do headava lasi Keristen memero bona kekeni ese unai ura bada idia abia neganai. (Genese 2:18) Unai ura be do ia bada bema edia hanua dekenai headava be mai anina bada gauna idia gwauraia (eiava lagani idia gwauraia idia headava totona) eiava idia do headava lasi memero kekeni edia kongregesen lalonai mai edia moale headava taudia momo idia noho neganai. To, unai lalo-hekwarahi be nega daudau ia noho be namo lasi. Unai dainai Keristen momokani mero o kekeni be dahaka do ia karaia ena lalo-hekwarahi do ia bada momokani lasi totona?
Ena lalo-hekwarahi kokia be ia auka, bona namo lasi taunimanima ma haida idia laloa ia lalo-hekwarahi kava eiava unai be gau maragina sibona. To headava lasi mero eiava kekeni ena lalo-hekwarahi ia koua totona, ia sibona be kara haida do ia karaia be gau badana.
Baibel ena taravatu ta ese ia ia durua unai ia karaia diba totona, ia gwau: “Henia kara ena moale be bada, abia kara ena moale be maragi.” (Kara 20:35) Ia headava lasi tauna, Iesu Keriso, ese unai hereva ia gwauraia, bona ia be mai ena aonega dainai ia diba unai hereva be maoro. Gau namona ta ita naria noho lalonai, bema taunimanima ma haida ita durudia bona davana ita tahua lasi neganai, unai ese ita ibounai ia durua. Ia do headava lasi Keristen mero eiava kekeni dekenai unai ena anina be dahaka ia karaia?
Anina be emu ruma bese lalonai bona kongregesen lalonai, hebogahisi karadia do oi karaia, bona emu nega haroro gaukara dekenai do oi habadaia. Ita gwau lasi, ‘Oi bisi noho, bona headava urana do oi laloaboio diba.’ Lasi. To unai Keristen kara namodia oi karaia neganai, reana do oi davaria ‘emu kudouna do ia lalo-hekwarahi lasi, bona emu ura do oi biagua diba’ bona emu headava lasi maurina do oi gaukaralaia namonamo diba.—1 Korinto 7:37.
Haida be idia ura dikadika do idia headava dainai unai ura idia lalohadailaia momo. Adavana idia abia totona idia haida be niuspepa lalonai hereva idia atoa. To, namona be edia headava lasi maurina dekenai do idia abia diba hahenamodia do idia moalelaidia.—Namona be Gima Kohorona, May 1, 1988 gauna lalonai, “Headava Lasi Tauna Ia Hegeregere Dirava ena Hesiai Gaukara Do Ia Karaia” bona “Headava Lasi Maurina—be mai Ena Hahenamo” bona May 15, 1992 Gima Kohorona lalonai, “Headava Sibona ese Ita Do Ia Hamoalea, A?” edia sivarai oi tahua.
Iehova oi guriguri henia emu headava lasi maurina do oi haheaukalaia totona. (Filipi 4:6, 7, 13) Idia do headava lasi Keristen taudia momo be mai edia nega idia stadi momo totona, bona Dirava ena Hereva idia lalohadailaia momo totona, bona Keristen heboudia lao henia bona durua bada totona, bona Iesu ia gwauhamata hegeregerena, ia murinai idia raka taudia ‘edia laumana be do idia laga-ani.’ (Mataio 11:28-30) Unai kara ese idia ia durua lauma dalanai idia goada totona, bena gabeai turana namona idia davaria neganai bona idia headava, adavana namona ai idia lao diba.
Laloaboio lasi, Iehova ese iena hesiai gaukara idia karaia headava lasi taudia iboudiai edia mauri toana ia diba. Ia diba oi ura oi headava. Danu, iseda lalokau guba Tamana ia diba nega daudau dekenai dahaka ese oi ia hanamoa bada, lauma dalanai bona lalohadai ena goada dekenai. Danu, inai oi diba momokani: Bema Iehova dekenai oi tabekau bona oiemu mauri ibounai lalonai iena Hereva oi badinaia, ia ese oiemu mai anina bada uradia oi do ia henia emu namo ela bona hanaihanai do oi abia totona.—Salamo 145:16 itaia danu.