Headava Lasi Maurina Moalelaia

“Unai bamona mauri dalana ia ura abia dae tauna be unai bamona ia karaia be namo.”​—⁠MAT. 19:​12, NW.

1, 2. (a) Iesu, Paulo bona ma haida ese headava lasi maurina be edena bamona idia laloa? (b) Dahaka dainai haida idia laloa headava lasi maurina be harihari gauna lasi?

HEADAVA be Dirava ese ita ia henia harihari gauna namona ta. (Aon. 19:14) To, headava lasi Keristani taudia momo be edia mauri idia moalelaia danu. Ia headava lasi tadikaka Harold, ena mauri lagani be 95 ia gwau: “Ena be sibona lau noho, lau lalohisihisi lasi. To, danu ma haida bamoa karana lau moalelaia bona heabidae karadia lau hahedinaraia. Lau gwau diba headava lasi maurina lau moalelaia.”

² Momokani, Iesu Keriso bona aposetolo Paulo idia gwau headava bona headava lasi maurina be harihari gaudia Dirava amo. (Mataio 19:​11, 12; 1 Korinto 7:7 duahia.) Ena be haida idia ura headava, to badina idauidau dainai idia headava lasi. Hegeregere, idia ura adavaia tauna idia davaria lasi. Eiava haida be lagani momo lalonai idia headava to edia adavana ia mase o edia headava ia dika dainai, sibona idia noho. Vadaeni, edena dala ai headava lasi maurina be harihari gauna ta? Bona edena dala ai headava lasi Keristani taudia ese edia mauri idia moalelaia diba?

Harihari Gauna Hereadaena

3. Headava lasi Keristani taudia ese dahaka gau idauidau idia karaia diba?

³ Ia headava lasi tauna ena nega be bada dainai gau idauidau ia karaia diba; to headava tauna be unai bamona lasi. (1 Kor. 7:​32-35) Unai dainai headava lasi tauna ese ena haroro gaukara ia habadaia diba, ma haida dekenai kara namodia ia hahedinaraia, bona Iehova ia tura henia diba. Keristani taudia haida idia itaia headava lasi maurina be mai ena namo. Unai dainai edia lalona idia hadaia ‘unai bamona mauri dalana idia abia dae’ totona. Ena be matamanai haida idia ura headava, to adavana ta idia davaria lasi, edia headava ia dika, o edia adavana ia mase, to Iehova idia guriguri henia dainai, edia headava lasi maurina idia moalelaia.​—⁠1 Kor. 7:​37, 38.

4. Ena be ita headava lasi, to dahaka dainai ita diba Iehova ese ita ia laloa bada?

⁴ Headava lasi Keristani taudia idia diba, herevana ta ia headava o lasi, to Iehova bona ena orea ese ia idia laloa bada. Iehova ese ena lalokau be ita ta ta dekenai ia hahedinaraia. (Mat. 10:​29-31) Tau ta o gau ta ese Dirava ena lalokau amo ita ia kokia diba lasi. (Roma 8:​38, 39) Ena be ita headava o lasi, to Iehova ita hesiai henia diba.

5. Ta ese headava lasi maurina ia moalelaia totona, dahaka be mai anina bada?

⁵ Ta ese headava lasi maurina ia moalelaia totona, gau haida ia karaia be namo. Vadaeni, hari inai negai, tadikaka o taihu, matamata eiava buruka, edia ura dainai o badina ma haida dainai idia headava lasi taudia, be edena dala ai edia mauri idia moalelaia diba? Keristani kongrigeisen ginigunana ai idia noho taudia haida edia sivarai do ita herevalaia, bona idia amo gau haida do ita dibaia.

Idia Headava Lasi Matamata Taudia

6, 7. (a) Filipo ena natuna kekeni foa be dahaka hahenamo idia abia? (b) Edena dala ai Timoteo ese ena headava lasi maurina ia moalelaia?

⁶ Evanelia tauna Filipo ena natuna kekeni foa, rami-hebou kekenidia, be edia tamana bamona peroveta gaukara idia karaia. (Kara 21:​8, 9) Peroveta gaukara be lauma helaga ena harihari gauna ta, bona unai kekeni foa ese Ioela 2:​28, 29 ena hereva idia laloa bada.

⁷ Timoteo be ena headava lasi maurina ia moalelaia. Ia maragi negana amo ena sinana Eunike bona ena tubuna hahine Loi ese “Toretore Helagadia” idia hadibaia. (2 Tim. 1:5; 3:​14, 15, NW ) Reana, idia be lagani 47 C.E. ai Paulo be nega ginigunana Lusitera ia vadivadi henia neganai, Keristani taudia ai idia lao. Lagani rua murinai, Paulo be nega iharuana Lusitera ia vadivadi henia neganai, reana Timoteo ena mauri lagani be 20 bamona. Ena be Timoteo be matamata bona vanegai sibona hereva momokani ia diba, to Lusitera bona Ikonio ai idia noho elda taudia idia gwau “ia be tau namona.” (Kara 16:​1, 2, NW ) Unai dainai, Paulo ese Timoteo ia boiria loaloa naria gaukarana ai ia do ia bamoa. (1 Tim. 1:18; 4:14) Ita diba lasi Timoteo be gabeai ia headava o lasi, to ita diba gauna be ena matamata negana amo Paulo ia bamoa, bona lagani momo lalonai misinari bona kongrigeisen naria gaukara ia moalelaia.​—⁠Fili. 2:​20-22.

8. Mareko be dahaka ia karaia ena hesiai gaukara ia habadaia totona?

⁸ Ioane Mareko danu be headava lasi maurina ia moalelaia. Ia, ena sinana Maria, bona ena kasin Banaba be Ierusalema kongrigeisen taudia ginigunadia. Toana be ena ruma bese be taga taudia, badina mai edia ruma bona hesiai kekenina. (Kara 12:​12, 13) Ena be mauri namona ia moalelaia, to unai ia laloa bada lasi. Danu, ia laloa lasi do ia headava bona natudia ia havaraia. Hanaihanai aposetolo taudia ia bamona dainai, ia idia hagoadaia misinari gaukara do ia laloa totona. Unai dainai, Paulo bona Banaba edia misinari loaloa ginigunana ai ia bamodia bona idia ruaosi ia durua. (Kara 13:⁠5) Gabeai Banaba ia bamoa bena Petero ida Babulonia ai hesiai gaukara idia karaia hebou. (Kara 15:39; 1 Pet. 5:13) Ita diba lasi Mareko be gabeai ia headava o lasi. To iena kara namodia dainai momo idia diba ia be haroro goadagoada tauna, bona ia ura dikadika ena hesiai gaukara do ia habadaia.

9, 10. Headava lasi Keristani matamata taudia be dahaka gaukara idauidau idia karaia diba? Haheitalai ta gwauraia.

⁹ Hari iseda negai, kongrigeisen lalonai headava lasi matamata taudia be edia hesiai gaukara idia habadaia. Mareko bona Timoteo bamona, idia laloparara idia do headava lasi dainai, ‘hanaihanai Lohiabada idia hesiai henia bona gau ta ese edia lalona ia veria lasi.’ (1 Kor. 7:​35, NW ) Unai be hahenamo badana. Dala idauidau ai Iehova idia hesiai henia diba hegeregere, painia gaukara, pablisa be momo lasi gabudiai idia haroro, gado ma ta idia dibaia, Kingdom Hall o brens opesi haginia gaukara idia durua, Hesiai Gaukara Hadibaia Sikulina dekenai idia lao, bona Betele ai idia gaukara diba. Bema oi be mero o kekeni matamata ta bona oi do headava lasi, unai gaukara ta oi karaia diba, a?

¹⁰ Tadikaka ta ladana Mark ena mauri lagani be 20 ia do abia lasi neganai, painia gaukara ia hamatamaia, bena Hesiai Gaukara Hadibaia Sikulina dekenai ia lao, bona tano momo ai hesiai gaukara ia karaia. Ena ful-taim hesiai gaukara ia karaia laganidia 25 ia laloa neganai, ia gwau: “Kongrigeisen tadikaka taihu idauidau ida lau gaukara hebou, haroro gaukara ai lau bamodia, idia lau vadivadi henidia, lau boiridia egu ruma dekenai ai aniani, bona idia lau hagoadaia totona moale karadia haida lau hegaegaelaia. Unai gaudia ibounai lau karaia dainai lau moale.” Mark ena hereva amo ita itaia, henia karana ese moale korikori ia havaraia, bona Iehova ena hesiai gaukara ita karaia neganai, unai be dala namona ma haida ita durua totona. (Kara 20:35) Matamata taudia edia ura bona diba be idauidau, to Lohiabada ena gaukara idauidau idia karaia diba.​—⁠1 Kor. 15:⁠58.

11. Ta ia headava haraga lasi ena namo haida be dahaka?

¹¹ Ena be matamata taudia momo idia ura headava, to badina namodia haida dainai idia headava haraga lasi be namo. Paulo ese matamata taudia ia hagoadaia, namona be idia naria ela bona ‘matamata negana idia hanaia,’ badina unai nega lalonai mahuta hebou urana be goada. (1 Kor. 7:​36, NW ) Namona be sibona emu kara oi tahua namonamo bona emu ura gaudia oi diba guna, unai amo nega vairai do oi hegeregere adavana namona ta oi abia hidi totona. Headava gwauhamatana be abia hidi badana ta, badina emu mauri ibounai lalonai do oi badinaia.​—⁠Had. 5:​2-5.

Idia Headava Lasi Buruka Taudia

12. (a) Ana be ena adavana ia mase murinai dahaka ia karaia? (b) Dahaka hahenamo ia davaria?

¹² Luka ena evanelia bukana lalonai Ana ena sivarai ia noho. Ia headava to lagani 7 murinai ena adavana ia mase, unai dainai ia lalohisihisi bada. Ita diba lasi idia be mai edia natudia o Ana be gabeai headava lou lalohadaina ia abia. To, Baibel ia gwau ena mauri lagani 84, bona ia be vabu. Baibel ena hereva amo ita itaia Ana be ena headava lasi maurina ia moalelaia, bona Iehova kahirakahira ia noho. Ia be “hanaihanai dubu helaga dekenai ia lao bona dina bona hanuaboi hesiai gaukara helagana ia karaia, ia anivaga bona ia guriguri goadagoada.” (Luka 2:​36, 37, NW ) Iena mauri lalonai Iehova tomadiho henia karana ia laloa bada. Unai ia karaia totona ia gaukara goadagoada bona hahenamo momo ia davaria. Ana ena hahenamo ta be beibi maragina Iesu ia itaia, bona ma haida dekenai Mesia ena sivarai ia harorolaia.​—⁠Luka 2:​38.

13. (a) Dahaka ese ia hahedinaraia Doreka be kongrigeisen taudia ia durua? (b) Doreka ena kara namo bona hebogahisi dainai dahaka hahenamo ia davaria?

¹³ Ierusalema ena notwest kahanai ia noho hanuana Iopa dekenai, hahine ta ladana Doreka ia noho. Toana be Doreka ia headava lasi badina Baibel ese unai ia gwauraia lasi. Ia “be kara namodia momo ia karaia bona hebogahisi dainai ogogami taudia ia durua.” Ia ese vabu bona ma haida totona dabua ia turia, unai dainai ia idia lalokau henia. Unai dainai, ia gorere bona ia mase neganai, iena kongrigeisen taudia ese Petero dekenai hereva idia siaia Doreka do ia hatorea isi lou totona. Iena toreisi lou sivaraina be Iopa taudia ibounai ese idia kamonai neganai, momo be Keristani taudia ai idia lao. (Kara 9:​36-42, NW ) Reana Doreka ese idia haida dekenai hariharibada karana ia hahedinaraia.

14. Dahaka dainai headava lasi Keristani taudia be Iehova kahirakahira idia noho?

¹⁴ Ana bona Doreka bamona, hari iseda negai kongrigeisen lalonai momo edia mauri lagani be bada bona idia do headava lasi o idia be vabu o dogae. Reana haida be adavana ta idia davaria lasi, eiava ma haida be edia headava ia dika dainai, sibona idia noho. Idia be adavana lasi dainai, Iehova dekenai idia tabekau. (Aon. 16:⁠3) Lagani 38 mai kahana lalonai Betele ai ia gaukara taihu ta, Silvia ia gwau “Iehova tabekau henia karana be hahenamo ta. Nega momo lau ese ma haida lau hagoadaia, to lau laloa, ‘Daika ese lau do ia hagoadaia?’ Lau diba momokani Iehova be egu dabu gaudia ia diba, bona unai ese lau ia durua ia kahirakahira lau noho totona. Bona Iehova be dala idauidau amo lau ia hagoadaia.” Momokani, Iehova kahirakahira ita noho neganai, ia ese nega ibounai ita do ia durua bona hagoadaia.

15. Edena dala ai headava lasi Keristani taudia ese ma haida dekenai edia ‘lalokau idia habadaia’ diba?

¹⁵ Headava lasi maurina ese dala ia kehoa ma haida dekenai ‘emui lalokau umui habadaia’ totona. (2 Korinto 6:​11-13 duahia.) Headava lasi taihu ta Jolene be lagani 34 lalonai ful-taim hesiai gaukara ia karaia, bona ia gwau: “Lau be mauri lagani idauidau taudia lau bamoa bona edia hebamo karana lau moalelaia. Lau headava lasi dainai, egu nega be bada Iehova lau hesiai henia, bona egu ruma bese, tadikaka taihu, bona dekena taudia dekenai kara namodia lau hahedinaraia totona. Egu mauri lagani ia bada ia lao lalonai, lau laloparara headava lasi maurina be mai ena namo.” Kongrigeisen ai buruka taudia, gorere taudia, adavana lasi tama o sina, matamata taudia bona ma haida be headava lasi taudia edia kara namodia idia laloa bada. Momokani, ma haida dekenai kara namodia ita hahedinaraia neganai, ita moale. Ma haida dekenai kara namodia oi hahedinaraia diba, a?

Lalona Idia Hadaia Do Idia Headava Lasi

16. (a) Dahaka dainai Iesu ia headava lasi? (b) Edena dala ai Paulo be ena headava lasi maurina ia gaukaralaia namonamo?

¹⁶ Iesu ia headava lasi badina tanobada dekenai ia mai be Dirava ena ura do ia karaia. Gabu momo dekenai ia lao, daba maragi amo ia gaukara ela bona hanuaboi; bena dokonai ena mauri ia bouboulaia. Ia headava lasi be mai ena namo, badina ena hesiai gaukara ia hagugurua diba. Aposetolo Paulo be ena haroro gaukara ia karaia totona gabu daudau dekenai ia lao, bona dagedage bada ia davaria. (2 Kor. 11:​23-27) Reana Paulo be guna ia headava, to aposetolo tauna ai ia lao murinai ena lalona ia hadaia do ia headava lasi totona. (1 Kor. 7:7; 9:⁠5) Iesu bona Paulo be ma haida idia hagoadaia edia haheitalai do idia tohotohoa, bona haroro gaukara idia laloa bada. To, Iesu bona Paulo be Dirava ena hesiai taudia dekenai headava lasi taravatuna idia atoa lasi.​—⁠1 Tim. 4:​1-3.

17. Edena dala ai haida be Iesu bona Paulo edia haheitalai idia tohotohoa? Bona dahaka dainai ita diba Iehova ese unai bamona taudia do ia laloaboio lasi?

¹⁷ Hari iseda negai danu, haida be edia lalona idia hadaia do idia headava lasi, badina idia ura edia nega bada be Iehova do idia hesiai henia. Ita herevalaia vadaeni tauna, Harold, be lagani 56 lalonai Betele gaukara ia moalelaia. Ia gwau: “Betele ai lagani 10 lau noho murinai, lau itaia headava taudia momo be idia gorere o edia tama sina burukadia naria totona, Betele idia rakatania. Egu tama sina be idia mase vadaeni. To, Betele gaukara lau ura henia bada dainai, lau headava lasi badina unai ese egu Betele gaukara ia hadikaia garina.” Taihu Margaret be lagani momo lalonai ia painia bona ia gwau: “Lau be egu painia gaukara dekenai lau bisi bada dainai, lau be nega lasi headava lau laloa totona. Nega bada lau gaukaralaia painia gaukara lau karaia totona, bona unai lau moalelaia bada.” Oibe, tomadiho momokani dainai sibona edia ura idia dadaraia taudia be Iehova ese do ia laloaboio lasi.​—⁠Isaia 56:​4, 5 duahia.

Headava Lasi Maurina Oi Moalelaia

18. Edena dala ai ma haida ese headava lasi Keristani taudia idia hagoadaia bona durua diba?

¹⁸ Headava lasi Keristani taudia ibounai ita hanamoa bona hagoadaia be namo, badina idia gaukara goada Iehova idia hesiai henia totona. Idia ita laloa bada badina Kongrigeisen lalonai gaukara namodia idia karaia. Bema idia be iseda ‘tadikaka, taihu, sinana, tamana, o natudia’ korikorina bamona ita kara henidia, do idia mamia idia ita laloa bada.​—⁠Mareko 10:​28-30 duahia.

19. Dahaka oi karaia be namo headava lasi maurina oi moalelaia totona?

¹⁹ Bema emu ura dainai o badina ma haida dainai oi headava lasi, ita herevalaia vadaeni Baibel sivaraidia bona iseda negai idia noho taudia edia sivarai ese oi do idia durua emu mauri oi moalelaia totona. Headava lasi maurina be ita naria noho harihari gauna ta bamona, eiava ita diba lasi do ita davaria harihari gauna ta ida ita hahegeregerea diba. Harihari gaudia haida be ita abia dae haraga, to ma harihari gaudia haida be nega ia hanaia lalonai ita laloparara ia be mai ena namo. Headava lasi maurina be unai bamona ita gwauraia diba. Lalohadai maorona ita abia neganai, headava lasi maurina do ita moalelaia. Vadaeni, headava lasi maurina oi moalelaia totona, dahaka oi karaia be namo? Namona be Iehova kahirakahira oi noho, iena hesiai gaukara oi karaia, bona ma haida dekenai kara namodia oi hahedinaraia. Bema Iehova ena lalohadai headava lasi maurina dekenai ita abia, unai harihari gauna do ita moalelaia diba, headava taudia ese edia harihari gauna idia moalelaia bamona.

Oi Laloatao, A?

• Edena dala ai headava lasi maurina be harihari gauna ta?

• Dahaka dainai matamata taudia dekenai headava lasi maurina be hahenamo ta?

• Edena dala ai headava lasi taudia be Iehova kahirakahira idia noho, bona haida dekenai kara namodia idia hahedinaraia diba?

[Pictures on page 18]

Headava lasi maurina oi gaukaralaia Dirava oi hesiai henia totona, a?