Do Ia Ore Lasi Hairaina

“HAIRAI ia boio; hairai ia ore,” ane torea tauna Walter De la Mare ena hereva ta be unai. Unai be momokani inai kaketas palaoapalaoa dekenai. Edia hairai ia ore haraga.

Keristen hahediba tauna Iakobo be ia gwau: “Kohu momo tauna be rei ena huahua bamona do ia mase vadaeni. Umui diba, dina ia daekau neganai iena siahu ese ava ia hakaukaua, vadaeni iena huahua ia moru diho, iena hairai be ia ore. Inai bamona danu kohu momo tauna ena gaukara ia karaia lalonai do ia mase.”​—Iakobo 1:​10, 11.

Momokani, inai tanobada dikana ai, moni bona kohu be idia boio haraga diba. Bona taunimanima oredia hegeregeredia, kohu momo tauna be ‘palaoapalaoa bamona ia mauri daudau lasi.’ (Iobu 14:​1, 2) Iesu ese tau ta ia parabolelaia, moni ia gogoa do ia laga-ani diba totona. To ia abidia gaudia dainai ena lalona ia hegeregere neganai, ia mase. Iesu ia gwau: “Ena kohu sibona dekenai ia haboua to Dirava dekenai ia be gau momo ia henia lasi tauna be unai bamona.”​—Luka 12:​16-21.

‘Dirava dekenai ia be gau momo ia henia tauna’ ese “kohu be guba dekenai” ia haboua​—ladana namona ia abia Dirava vairanai. Unai kohu do ia ore lasi. (Mataio 6:20; Heberu 6:10) Unai bamona tauna be ia marai palaoapalaoana ta bamona lasi, to Baibel ia gwau ia be au ta bamona, ena rau idia marai lasi, bona “ia karaia gaudia iboudiai edia anina do idia vara goevagoeva.”​—Salamo 1:​1-3, 6.