Iehova be Daika?

“IEHOVA be daika?” Lagani 3,500 gunanai, Aigupito ena hekokoroku pavapavana, Farao, ese unai henanadai ia henia. Hekokoroku dainai ia be ma ia hereva: “Iehova be lau diba lasi.” Unai neganai Farao vairanai idia gini tatau rua idia diba Iehova be daika. Idia be boga tamona tadikakadia Mose bona Arona, Israel ena Levi iduhuna amo. Iehova ese ia siaidia idia be Aigupito ena lohia idia hamaoroa Israel taudia be tano gagaena ai ia siaidia tomadiho aria ta idia karaia totona.​—Esodo 5:​1, 2.

Farao ia ura lasi iena henanadai idia haere henia. Iena siahu henunai, pris taudia be kaivakuku koikoidia handred momo tomadiho henidia karana idia habadaia. Idia laloa Farao danu be dirava ta! Aigupito edia gori dekenai, ia be dina ena dirava Ra ena natuna, bona ia be bogibada kwarana diravana Horus ena tanobada toana. Farao idia hereva henia neganai iena dagi be “dirava siahuna” bona “hanaihanai ia noho tauna.” Unai dainai ita hoa lasi ia be hevaseha dalanai ia henanadai, ia gwau: “Iehova be daika? Badina [be] dahaka iena hereva dohore lau kamonai?”

Mose bona Arona be unai henanadai idia haerelaia be anina lasi. Farao ia diba Iehova be Israel taudia ese idia tomadiho henia Diravana, unai neganai idia be Aigupito edia igui hesiai dekenai hisihisi idia ania. To nega sisina murinai Farao bona Aigupito taudia ibounai be do idia diba Iehova be Dirava momokanina. Unai hegeregerena, hari inai nega lalonai, Iehova be tanobada taudia iboudiai dekenai iena ladana bona iena Dirava dagina do ia hahedinaraia. (Esekiel 36:23) Unai dainai namo ita davaria diba bema ita laloa edena dala ai Iehova Dirava be idaunegai Aigupito dekenai iena ladana ia habadaia.

Aigupito Diravadia Ia Hereadia

Farao be hekokoroku dekenai Iehova be daika ia henanadailaia neganai, do idia vara gaudia ia diba lasi. Iehova ese haere ia henia, Aigupito dekenai hisihisi 10 ia siaidia. Unai hisihisi be unai bese dekenai sibona lasi. Idia be hisihisi Aigupito ena diravadia dekenai danu.

Unai hisihisi ese idia hahedinaraia Iehova be Aigupito ena diravadia ia hereadia. (Esodo 12:12; Numera 33:4) Iehova ese Naila Sinavaina bona Aigupito ena ranu ibounai be rara ai ia halaoa neganai ia vara regeregena oi laloa! Unai hoa karana dainai, Farao bona iena bese iboudiai idia diba Iehova be Naila diravana, Hapi, ia hereaia. Naila Sinavaina lalonai gwarume idia mase dainai unai be Aigupito ena tomadiho ia hadikaia, badina Aigupito taudia ese gwarume haida idia matauraidia bada.​—Esodo 7:​19-21.

Gabeai, Iehova be Aigupito dekenai paroparo ena hisihisi ia siaia. Unai ese Aigupito ena paroparo dirava hahinena, Heqt, ena ladana ia hadikaia. (Esodo 8:​5-14) Hisihisi ihatoina dekenai meamea karaia pris taudia idia daradara, idia be Iehova ena hoa karana idia tohotohoa diba lasi, ia be tano kahuna amo namo ia havaraia. Idia boiboi, idia gwau: “Inai kara be Dirava ena imana kwaki-kwakina korikori ese ia karaia.” (Esodo 8:​16-19) Idia gwau Aigupito diravana Thoth be meamea ia havaraia, to ia be unai koikoi taudia ia durudia diba lasi.

Farao ia davaria noho Iehova be daika. Iehova be iena ura ia gwauraia totona Mose ia gaukaralaia Diravana, bena hoa karadia amo Aigupito dekenai hisihisi ia siaidia iena hereva ia hagugurua totona. Danu, Iehova be iena ura hegeregerena unai hisihisi ia hamatamaia bona ia hadokoa diba. To unai diba ese Farao ia hamarerea lasi Iehova henunai sibona ia atoa diho totona. Aigupito ena hekokoroku lohiana be Iehova ia inai henia noho.

Hisihisi namba hani lalonai, lao badadia ese tano idia hadikaia, ruma ai idia vareai, bona sedira hodahoda ai momo idia roho; hodahoda idia tomadiho henia badina idia laloa ia be dirava ta, Shu, eiava guba ena dirava hahinena, Isis. Heberu gado dekenai, unai manumanu idia hahanaia “lao badana,” “sisia ena lao,” bona “pitopito.” (New World Translation; Septuagint; Young) Bema unai be scarab pitopito, Aigupito taudia be idia hahelagaia manumanuna amo hisihisi idia davaria, bona idia raka loaloa neganai unai lao badana idia moidia. Unai hisihisi amo Farao be gau matamatana Iehova dekenai ia diba. Ena be Aigupito diravadia be edia tomadiho taudia amo lao badana ena dika idia koua diba lasi, to Iehova ese iena taunimanima ia naridia diba. Unai hisihisi bona gabeai idia mai hisihisi iboudiai ese Aigupito taudia idia botaia, to Israel taudia idia botaia lasi.​—Esodo 8:​20-24.

Hisihisi namba ima be Aigupito taudia edia animal ia botadia. Unai hisihisi ese Hathor, Apis, bona boromakau toana guba dirava hahinena Nut edia ladana ia hadikadia. (Esodo 9:​1-7) Hisihisi namba 6 be taunimanima bona animal dekenai iohururu ia havaraia, unai ese Thoth, Isis, bona Ptah diravadia ia hahemaraidia, idia laloa unai diravadia be gorere idia hanamodia diba to unai be lalohadai kerere.​—Esodo 9:​8-11.

Hisihisi namba 7 dekenai, medu, aisi nadina bamona, ia diho, bona unai medu nadi ida lahi ia mai. Unai hisihisi ese Reshpu diravana ia hahemaraia, idia gwau ia be kevaru ia biagua, bona idia gwau Thoth ese medu bona guba regena ia biagua. (Esodo 9:​22-26) Hisihisi namba 8, kwadi hutuma, ese ia hahedinaraia Iehova be natudia momo havaraia diravana Min ia hereaia, idia gwau Min be tubutubu gaudia ia naridia. (Esodo 10:​12-15) Hisihisi namba 9 dekenai, dibura be dina toi lalodiai Aigupito ia koua, unai ese Aigupito ena dina diravadia Ra bona Horus ia hevasehalaidia.​—Esodo 10:​21-23.

Ena be hisihisi dikadia 9 idia vara, to Farao be Israel taudia ia do ruhadia lasi. Iena kudou-auka dainai Aigupito ese dika bada herea ia davaria Dirava be hisihisi namba 10, dokona unai, ia siaia neganai​—idia vara guna taudia bona animal idia mase. Ena be idia laloa ia be dirava ta, to Farao ena vara guna natuna danu ia mase. Unai amo Iehova be ‘Aigupito edia dirava ibounai ia panisidia momokani.’​—Esodo 12:​12, 29.

Farao ese Mose bona Arona ia boiridia, bona ia gwau: “Umui toreisi, lauegu orea taudia edia huana dekena amo umui raka siri, umui bona [Israel] taudia ibounai. Umui lao, Iehova dekenai do umui tomadiho, umui emui noinoi hegeregerena. Umui emui mamoe ibounai bona umui emui boromakau ibounai danu umui laohaia, umui emui noinoi hegeregerena. Vadaeni, umui lao. Bona oiemu hanamoa lau dekenai oi henia.”​—Esodo 12:​31, 32.

Iena Bese Ia Hamauridia

Israel taudia idia raka oho, to nega sisina murinai Farao ia laloa idia loaloa kava tano gagaena dekenai. Ia bona iena hesiai taudia idia henanadai, idia gwau: “[Israel] taudia ita dekena amo ita negea, ita dekenai hesiai gaukara dekena amo idia doko, ena anina be dahaka?” (Esodo 14:​3-5) Unai igui hesiai besena idia lao dainai Aigupito be kohu gaukaralaia dalana dekenai do idia hekwarahi bada.

Farao be iena tuari oreadia ia haboudia bona Israel ia tahudia ela bona Pi-Hahiroto dekenai. (Esodo 14:​6-9) Tuari dalana dekenai, toana be Aigupito taudia do idia kwalimu badina davara bona ororo ese Israel taudia edia dala idia koua. To Iehova ese Israel taudia ia naridia, idia bona Aigupito taudia edia huanai ori ta ia atoa. Aigupito taudia edia kahana dekenai, “ori ia noho bona dibura ia noho,” unai dainai idia be Israel taudia idia tuari henidia diba lasi. Israel taudia edia kahanai, ori ia diari, Israel taudia totona ‘hanuaboi ia hadiaria.’​—Esodo 14:​10-20.

Aigupito taudia idia ura Israel taudia edia kohu idia dadia bona idia hadikadia to ori ese edia dala ia koua. (Esodo 15:9) Ori ia daekau neganai, idia hoa bada herea! Davara Kakakaka ena ranu idia parara, bona Israel taudia be davara unai kahanai idia hanaia lao, miri kaukau dekenai! Farao bona iena oreadia be ranu ia parara gabuna ai idia vareai haragaharaga, idia ura edia hesiai taudia gunadia idia dogodia tao bona idia hadikadia. To Aigupito ena hekokoroku lohia tauna be Heberu taudia edia Dirava ena siahu ia diba lasi. Iehova be Aigupito taudia dekenai daradara ia havaraia, bona edia kariota amo uili ia kokidia.​—Esodo 14:​21-25a.

Aigupito ena tuari taudia idia boiboi, idia gwau: “[Israel] taudia edia vairana dekena amo do ita heau, badina be Iehova ese durua ia henia idia dekenai, ia tuari henia ita dekenai.” To Farao bona iena tuari taudia be unai dekenai idia lalo-parara neganai, unai ese ia durudia lasi. Davara unai kahanai tano ai Israel taudia idia noho namo neganai, Mose be davara totona iena imana ia abia isi, bona ranu ia giroa, bena Farao bona iena tuari oreadia ia hamasedia ore.​—Esodo 14:25b-28.

Idia Vara Gaudia amo Diba Ia Davaria

Unai dainai, Iehova be daika? Hekokoroku tauna Farao be unai henanadai ena haere ia davaria. Aigupito dekenai idia vara gaudia idia hahedinaraia Iehova sibona be Dirava momokanina, ia be idau bese taudia edia “anina lasi diravadia” bamona lasi. (Salamo 96:​4, 5) Iena siahu bada herea amo, Iehova ese “guba bona tanobada ia havaraia.” Danu, Ia be Hamauria Tauna Badana, ‘Aigupito amo iena bese taudia Israel be toa amo, hoa karadia amo, imana goadana amo, bona hagaria karadia amo ia hakaudia.’ (Ieremia 32:​17-21) Unai ese ia hamomokania Iehova be iena bese taudia ia naridia diba!

Farao be idia vara gaudia amo diba ia abia. Unai kara dokona dekenai ia mase. (Salamo 136:​1, 15) Aonega dalana be “Iehova be daika?” ia henanadailaia neganai, namona be manau ia hahedinaraia. Bena unai lohia tauna be ia abia haere hegeregerena ia karaia diba. Ita moale badina hari inai negai, manau taudia momo idia diba Iehova be daika. Bona iena kara be edena bamona? Ia ura dahaka ita karaia? Namona be sivarai gabena lalonai idia noho haere dainai, ia mo sibona ena ladana be Iehova Tauna dekenai emu diba bona moale ia habadaia.​—Salamo 83:18.

[Picture Credit Line on page 3]

Pictorial Archive (Near Eastern History) Est.