“Toa ta Guba Dekena Amo”

NEGA namona eiava nega dikana idia diba totona hereva gunana ta ia gwau: “Adorahi neganai bema guba ia kakakaka, bouti ai idia gaukara taudia idia moale, Daba kahanai bema guba ia kakakaka, bouti ai idia gaukara taudia idia naria namonamo.” Hari inai negai, satellite amo, siahu bona keru edia bada idia gwauraia kompiuta amo, Doppler radar amo, bona saiens ena diba ma haida idia gaukaralaia dainai idia diba gabeai negana do ia namo eiava do ia dika. Gabeai negana do ia namo eiava do ia dika idia gwauraia neganai unai ese nega momo unai hereva gunana ia hamomokania.

Ena tomadiho inai henia taudia ese ia dekena amo “toa ta guba dekena amo” idia tahua neganai, Iesu Keriso ese nega namona bona nega dikana ia gwauraia idia ura hoa karana ta amo ia hahedinaraia ia be Mesia. Ia gwau: “Adorahi neganai umui gwau, ‘Kerukeru be nega do ia namo, badina be guba ia kakakaka vadaeni.’ Ma dabai umui gwau, ‘Hari dina be medu do ia diho, badina be guba be kakakaka bona ia korema danu.’ Be, guba ena toana umui diba, to hari nega ena toana be umui diba lasi, a? Umui be orea dikana, ma Dirava umui laloa lasi danu. Toa umui noinoi lau dekenai, to toa ta do lau hedinaraia lasi umui dekenai. Iona, peroveta tauna ena toa sibona do umui itaia.”​—Mataio 16:​1-4.

Iesu ena inai taudia be nega do ia namo eiava do ia dika idia gwauraia guna diba to lauma gaudia idia lalo-pararalaia diba lasi. Hegeregere, ia gwauraia ‘Iona, peroveta tauna ena toana’ ena anina be dahaka? Dirava ena peroveta tauna Iona be dina toi bamona gwarume badana ena bogana lalonai ia noho, bena murinai ia lao Nineva dekenai ia haroro totona, unai ia karaia neganai Asuria ena hanua badana ai ia be toa ai ia lao. Keriso be dina toi lalonai gara gabunai ia noho bena murinai ia toreisi lou, unai ia vara dainai Iesu ena negai idia noho taudia ese “Iona, peroveta tauna ena toa” idia itaia. Iesu ena hahediba taudia ese edia haroro herevana amo unai mai anina bada karana ia vara idia hamomokania, bona unai amo Iesu be toa ta ia henia unai uru taudia dekenai.​—Mataio 12:​39-41.

Ma nega ta ai, Iesu ena hahediba taudia idia noia “toa” ta ia henidia bena do idia diba edena negai mai ena Basileia siahuna danu do ia “giroa mai.” Idia ia haere henidia neganai, toa ta mai ena kahana idauidau ia gwauraia, ia gwau tuari badadia, tano mareremarere, doe, bona tanobada ibounai dekenai Dirava ena guba Basileia ia vara vadaeni haroro gaukarana do idia vara.​—Mataio 24:​3-14.

Ita itaia diba lasi guba Pavapavana, Keriso, ena giroa mai toana oi itaia, a? Unai toana ena kahana idauidau be hari inai negai uru taudia dekenai ia guguru noho. (Mataio 24:34) Bona dina gabediai dahaka do ia vara? Baibel ese ia hahedinaraia kahirakahira inai nega dikana do ia ore, to unai sibona lasi, ia ese Dirava ia gwauhamatalaia nega matamatana ia gwauraia, bona kahirakahira do ia vara taunimanima do idia moalelaia totona.​—2 Petero 3:13.