Kohu Momo ese Emu Abidadama Ia Tohoa Diba

KOHU momo ese kara maoromaoro tauna ena abidadama ia tohoa diba. Ta be kohu bada ia tahua momo neganai iena abidadama ia haboioa diba. (1 Timoteo 6:​9, 10) To kohu momo be ma dala ta ai ta ena abidadama ia tohoa diba. Bema kara maoromaoro tauna ia hisihisi noho neganai ia itaia kara maoromaoro lasi taudia momo be kohu bada idia abia, sedira hedibagani ia abia bona reana ia be Dirava badinaia lasi dalana ai ia lao. Unai dainai, Iehova ena hesiai taudia haida be kara maoromaoro badinaia karana dekenai idia daradara!

Unai ia vara ane ia karaia Levi tauna Asaf dekenai, Israel ena king David ia lohia negana lalonai. Asaf be unai bese taudia edia tomadiho lalonai idia abia anedia ia toredia. Hemana bona Iedutunu ida, ia peroveta karaia danu, Iehova Dirava idia hanamoa bona idia tanikiu henia mai edia miusik ida. (1 Sisiga 25:1; 2 Sisiga 29:30) Ena be Asaf ese dagi namona ia abia, to Salamo 73 ese ia hahedinaraia kara dika taudia edia kohu bada ese iena abidadama ia tohoa bada.

Asaf Ena Lalohadai Dalana ese Dika Ia Havaraia Diba

“Momokani, Dirava ena kara be namo Israel dekenai, edia kudou idia goeva taudia dekenai. To lauegu aena be kahirakahira idia raka kerere, kahirakahira egu raka dalana ai lau dedi.” (Salamo 73:​1, 2) Unai herevadia amo, Asaf ese ia hahedinaraia Iehova be Israel besena dekenai ia kara namo. Unai be momokani “edia kudou ia goeva” taudia dekenai, badina idia ura edia kudou ibounai ida Iehova idia tomadiho henia, bona iena ladana helagana hahelagaia karana idia durua. Bema unai bamona ita laloa, ena be kara dika taudia edia kohu bada dainai eiava ma kara ta dainai ita hekwarahi, to Iehova do ita gwauraia namo bona do ita hanamoa.​—Salamo 145:​1, 2.

Ena be Asaf be Iehova ena kara namo ia diba, to kahirakahira iena aedia be dala maoromaorona amo idia raka oho. Hegeregere idia be aisi tanona dekenai idia dedi ia heau daudau bona ia hesiku dainai. Dahaka dainai iena abidadama ia manoka ia lao? Ia gwauraia, ia gwau: “Badina be kara dika taudia edia maino lau itaia neganai, hekokoroku taudia lau mama henidia. Badina idia hisihisi lasi; bona edia bogadia idia bada. Idia hisihisi lasi, haida hegeregeredia, bona idia gorere lasi, haida bamona.”​—Salamo 73:​3-5.

Kara maoromaoro lasi taudia edia kohu bada dainai Asaf ese ia mama henidia. Ena be kara koikoi dekenai edia kohu bada idia haboua, to toana be edia mauri be mai mainona. (Salamo 37:1 itaia danu.) Ena be edia kara be dika, to toana be idia noho namo. Idia mase neganai idia hisihisi bada lasi! Nega haida idia be maino bona lalona goada dekenai idia mase, idia be lauma gaudia idia tahua lasi. (Mataio 5:3) To Dirava ena hesiai taudia haida be idau dalana ai idia mase, idia be hisihisi bada dekenai idia mase, to ia ese ia hagoadadia noho, bona idia vairanai be toreisi lou ena helaro namona.​—Salamo 43:​1-3; Ioane 5:​28, 29.

Kara dika taudia momo idia gorere lasi, bona idia be aniani bada idia moalelaia diba. “Edia bogadia idia bada,” edia bogadia idia hedinarai momokani. Ma danu, idia “hisihisi lasi, haida hegeregeredia,” badina taunimanima momo amo idia idau, idia hekwarahi lasi mauri gaudia idia abia totona. Asaf ia gwau kara dika taudia “idia gorere lasi, haida bamona.” Dirava badinaia taudia be Satana ena tanobada dikana lalonai Iehova ena kara maoromaoro haheganidia idia badinaia dainai hahetoho idia abia, to kara dika taudia be unai bamona idia abia lasi.​—1 Ioane 5:19.

Kara dika taudia be kohu bada idia abia dainai, Asaf be inai bamona ia gwauraidia, ia gwau: “Unai dainai, hekokoroku be edia aiona ena ageva bamona; dagedage be edia dabua bamona. Edia matana be digara dainai idia gudu; edia kara dika be edia lalohadai idia hereaia. Idia hevaseha bona kara dika idia gwauraia; atai gabudia amo taunimanima koidia karana idia gwauraia. Edia uduna regena be guba ai idia dae, bona edia maladia rege ese tanobada idia hahonua.”​—Salamo 73:​6-9.

Kara dika taudia be hekokoroku idia atoa “ageva” bamona, bona edia dagedage karadia be momo dainai unai be ‘dabua bamona idia atoa.’ Sibodia edia ura idia gavaia dainai, idia be ma haida idia gwau henidia momo. Kara dika taudia edia matadia idia maragi lasi aniani lasi dainai, to idia be “digara dainai idia gudu”, matadia idia gudu badina idia aniani momo idia mataganigani dainai. (Hereva Lada-isidia 23:20) Edia lalohadai dikadia amo idia kwalimu bona ‘edia kara dika ese edia lalohadai idia hereaia.’ Edia kara koikoidia be hekokoroku ena ‘atai gabuna amo’ idia gwauraia. ‘Edia uduna rege be guba dekenai idia dae, bona edia maladia rege be tanobada ia hahonua’! Guba bona tanobada lalonai ta idia matauraia lasi dainai, idia be Dirava ena ladana idia gwauraia dika bona taunimanima idia gwauraidia dika.

Ia hedinarai Asaf sibona lasi to ma haida danu be idia itaia gaudia dainai idia hekwarahi. Ia gwau: “Unai dainai ia [Dirava] ese ena taunimanima iniseniai ia mailaidia lou, bona ia honu gauna ena ranu be idia totona ia bubua. Bona idia gwau: ‘Dirava be edena bamona ia diba? Atai Herea Diravana ia diba, a?’ ” (Salamo 73:​10, 11) Sedira Heberu bukana ena hereva anina be kara dika taudia be mai edia kohu bada dainai, Dirava ena taunimanima haida be lalohadai kerere idia abia bona taravatu utua taudia bamona idia lao, idia gwau: ‘Dirava ia diba lasi dahaka ia vara bona taravatu utua karadia do ia panisia lasi.’ To, kara dika taudia be taravatu utua karadia idia karaia bona panisi idia abia lasi idia itaia neganai, unai be hegeregere muramura idita idia inua, bona unai dainai kara maoromaoro taudia idia henanadai, idia gwau: ‘Dirava be edena bamona inai gaudia ia koudia lasi? Ia itaia lasi dahaka ia vara, a?’

Iena noho bona kara dika taudia edia noho ia hahegeregerea dainai, Asaf ia gwau: “Itaia! Kara dika taudia be inai, nega ibounai idia laga-ani. Edia kohu idia habadaia. Lauegu kudouna lau hagoevaia vadaeni bona kerere lasi dekenai egu imana lau huria vadaeni be anina lasi. Bona dina ibounai lau hisihisi, bona dabadaba iboudiai lau ia panisia.” (Salamo 73:​12-14) Asaf ia laloa kara maoromaoro mauri dalana ia badinaia be anina lasi. Kara dika taudia idia noho namo, sedira koikoi karadia amo edia ‘kohu idia habadaia noho.’ Toana be kara dika hereadia ena panisi idia abia lasi, to “dina ibounai” Asaf ia hisihisi​—ia toreisi negana amo ia lao bona hanuaboi ia mahuta neganai. Ia laloa daba daba ibounai Iehova ese ia sisiba henia. Unai be maoromaoro lasi dainai, Asaf ena abidadama ia tohoa.

Iena Lalohadai Ia Hamaoromaoroa

Gabeai ia diba iena lalohadai ia kerere dainai, Asaf ia gwau: “Bema lau be unai bamona lau hereva noho, lau ese Dirava ena bese taudia lau hadikaia. Bona lau be inai gau ena anina lau tahua, ia be auka herea lau dekenai, ela bona Dirava ena gabu helagana ai lau lao, bena edia doko daladia lau diba. Momokani, oi ese dedidedi gabudiai oi atodia. Oi hadikadia ore. Haraga herea idia boio dainai taunimanima idia hoa! Hagaria gaudia idia vara haraga bona idia haoredia. Idia be nihi bamona, ia noga tauna dekenai. Iehova e, oi noga neganai edia laulau do oi dadaraia.”​—Salamo 73:​15-20.

Asaf ia maumau lasi dainai unai be namo, badina taunimanima vairadiai bema ia gwau Iehova hesiai henia be anina lasi neganai, sedira iena ruma bese tomadiho taudia do ia hamanokadia diba eiava edia abidadama ia hadikaia diba. Asaf ena hereva lasi karana bamona ita karaia be namo! Ia ura ia diba dahaka dainai kara dika taudia be panisi idia abia lasi to kara maoromaoro taudia be hisihisi idia davaria, unai dainai Dirava ena gabu helagana dekenai ia lao. Unai gabu dekenai Asaf be Iehova ena tomadiho taudia ida ia laloa namonamo diba, bona iena lalohadai ia hamaoromaoroa. Unai dainai, bema hari inai negai ita itaia gaudia dainai ita daradara, namona be unai bamona iseda henanadai edia haere ita tahua Dirava ena taunimanima ita bamodia neganai, ita sibona ita noho lasi.​—Hereva Lada-isidia 18:1.

Gabeai Asaf ia diba Dirava be “dedidedi gabudiai” kara dika taudia ia atodia. Edia mauri ena badina be kohu dainai, idia moru haraga diba. Gabeai, idia buruka neganai mase idia davaria diba, bona koikoi amo idia abia kohu be edia mauri ia halataia diba lasi. (Salamo 49:​6-12) Edia kohu be ia lao ore haraga nihi ta bamona. Sedira idia do buruka lasi neganai edia kara ena panisi idia abia diba, idia hadoa gauna be do idia gogoa. (Galatia 6:7) Idia ia durudia diba Tauna tamona sibona idia dadaraia dainai, idia be heduru lasi, helaro lasi. Iehova ese do ia kara dika henidia neganai, edia “laulau”​—edia hekokoroku bona dagi​—do ia dadaraia.

Oiemu Lalohadai Oi Naria

Ia itaia gaudia dainai iena lalohadai ia naria lasi dainai, Asaf ia gwau: “Lauegu kudouna ia badu bona ia lalohisihisi bona egu lalona ia hisihisi bada, bona lau kavakava bona lau diba lasi; lau be boroma bamona, oiemu vairana dekenai. To lau be hanaihanai oi danu lau noho, oi ese egu imana idibana oi dogoatao. Emu sisiba amo lau do oi hakaua, bona gabeai hairai dekenai lau do oi abia dae.”​—Salamo 73:​21-24.

Kara dika taudia edia kohu bada bona kara maoromaoro taudia edia hisihisi ia laloa momo neganai, tau ta ena kudou ia hadikaia diba eiava iena lalona ia habadua diba. Iena lalonai​—iena nadinadi lalonai​—Asaf be hisihisi ia abia badina unai kara ia lalo-hekwarahilaia dainai. Iehova dekenai ia be kavakava animal bamona ia lao, iena tauanina ia mamia gaudia dainai kara ia karaia. To Asaf be ‘nega ibounai Dirava ida, iena imana idibana ia abia.’ Bema ita laloa kerere to Asaf bamona Iehova ena sisiba ita tahua, Dirava be iseda imana do ia abia, ita ia durua bona ita ia hakaua totona. (Ieremia 10:23 itaia danu.) Iena sisiba ita badinaia neganai sibona ita be gabeai mauri moalena ita abia diba. Sedira nega sisina lalonai hemarai ita davaria diba, to Iehova ese unai do ia haidaua, ‘hairai dekenai ita do ia abia lao,’ eiava hemataurai dekenai ita do ia hakaua lao.

Ia diba Iehova dekenai do ia tabekau be gau badana dainai, Asaf be ma ia gwau: “Guba dekenai daika do lau davaria? Bona tanobada dekenai gau ta lau ura henia lasi, oi sibona. Lauegu hidio bona kudouna idia manoka. Dirava be lauegu kudouna ena nadi bona lauegu ahuna ela bona hanaihanai. Badina ita itaia! Oi dekenamo idia noho daudau taudia do idia mase. Kara dika dainai oi idia rakatania taudia iboudiai do oi haoredia. To lau be Dirava badinai lau noho be namo. Lohiabada Iehova be egu roho-mauri gabuna ai lau halaoa vadaeni, emu kara iboudiai lau herevalaidia totona.”​—Salamo 73:​25-28.

Asaf bamona, ita ia durua tauna tamona sibona be Iehova, ia sibona ese noho namo momokani bona heduru ia henia diba. (2 Korinto 1:​3, 4) Unai dainai, ta ena tanobada kohudia ita mama henia lasi, to namona be Dirava ita hesiai henia bona guba dekenai iseda kohu ita haboua. (Mataio 6:​19, 20) Iehova vairanai ita gini namo dainai ita moale bada diba. Herevana iseda tauanina bona kudou ia manoka, to ia ese ita ia hagoadaia diba bona iseda kudou do ia hamaoromaoroa dika idia mai neganai ita be helaro ita haboioa lasi bona ita gari lasi totona. Iehova ida ita turana karaia be moni ese ia hoia diba lasi gau hereana ta. Ita rakatania neganai, ita bona ia idia rakatania taudia iboudiai be dika do ita davaria hebou diba. Unai dainai, Asaf bamona, namona be Dirava kahirakahira ai ita lao bona iseda lalo-hekwarahi iboudiai be ia dekenai ita tahoa kau. (1 Petero 5:​6, 7) Unai ese iseda goada, lauma dalanai, ia habadaia bona ita ia hamarerea ma haida dekenai Iehova ena kara namo hereadia ita hadibaia totona.

Iehova Dekenai Ita Abidadama Noho

Asaf ia lalo-hekwarahi badina ia itaia iena tano dekenai, Israel dekenai, kara dika taudia be kohu bada idia abia dainai. Iehova ena abidadama hesiai taudia bogaragidiai, “kara dika taudia” be idia heagi, idia hekokoroku, idia dagedage, bona idia koikoi, bona idia gwau Dirava be edia kara ia diba lasi. (Salamo 73:​1-11) Unai be sisiba momokani! Iehova Dirava ita hamoalea totona, namona be unai karadia ita karaia lasi: hekokoroku, dagedage, heagi, bona koikoi. Asaf bamona, namona be Iehova ena hesiai taudia be ‘Dirava ena gabu helaga badana ai idia mai’ hanaihanai Iena abidadama tomadiho taudia idia hebou neganai. Momokani, Iehova idia lalokau henia taudia iboudiai be ‘Dirava kahirakahira ai idia lao’ be namo, ia dekenai idia tabekau hisihisi negadia ai idia gini noho totona, herevana ma haida be dahaka idia hereva eiava herevana dahaka idia karaia.​—Salamo 73:​12-28; 3 Ioane 1-10.

Momokani, kara dika taudia edia kohu bada dainai iseda abidadama ia tohoa diba, Asaf ena abidadama ia tohoa hegeregerena. To, bema Iehova ena hesiai gaukara be iseda mauri ena badina, unai hahetoho ita haheaukalaia diba. Unai ita karaia ena davana do ita abia badina ‘Dirava ena kara be gagevagageva lasi, ia be maoromaoro momokani. Ia ese emui kara namodia bona emui lalokau iena ladana dainai do ia laloaboio lasi.’ (Heberu 6:10) Iseda hahetoho be “metau lasi gauna, bona do ia noho nega daudau lasi”, to iseda davana be idau. (2 Korinto 4:17) Lagani 70 eiava 80 lalonai hisihisi ita abia be hegeregere iseda udu-bibina ia hanaia hahodi sisina bamona, to Iehova be iena abidadama hesiai taudia totona ia gwauhamatalaia mauri hanaihanaina be idau.​—Salamo 90:​9, 10.

Kara dika taudia be mai edia kohu bada to hisihisi ita abia badina ita kara maoromaoro dainai; vadaeni, namo lasi unai dainai Dirava ena lauma helaga ia havaraia abidadama ita hahedinaraia lasi. (Galatia 5:​22, 23; 1 Petero 3:​13, 14) Bema kara dika taudia ita tohotohoa Satana be do ia moale, nega momo edia kohu ia bada badina kara namo ena taravatu idia utua dainai. To, namona be Iehova ena ladana ita matauraia, iena kara maoromaoro ita rakatania lasi totona, hedibagani ita abia neganai namona be ita gini auka. (Sefania 2:3) Namo lasi kara dika taudia idia kwalimu dainai ita lalo-hekwarahi, badina idia be kohu bada sibona dekenai idia kwalimu. Bona unai ena anina be dahaka? Unai be Atai Momokani Lohiabadana Iehova dekenai idia abidadama henia taudia ese lauma dalanai idia abia taga hegeregerena lasi.