Iehova ese Gorere Bona Buruka Taudia Ia Lalodia Tao

HEKWAKWANAI gauna ta be “dika negadia ai” ita haheauka. (Salamo 37:​18, 19) Unai nega dikana ta be ita buruka bona iseda tauanina idia manoka idia lao neganai. Nega daudau gorere idia haheaukalaia neganai, haida dekenai unai be dika negana. Reana idia laloa gorere ese edia mauri ia biagua, edia lalohadai bona kara ibounai amo edia gorere idia laloa momo dainai.

To, namona be inai ita laloatao, Iehova ese ena hesiai taudia iboudiai ia raraidia noho. Ena be iena abidadama hesiai taudia be idia buruka, idia gorere, eiava hekwakwanai ma ta idia davaria, to abidadama bona aonega karadia idia hahedinaraia noho dainai, iena kudouna ia moale. (2 Sisiga 16:9a; Hereva Lada-isidia 27:11) Pavapava David ese ita ia hagoadaia, ia gwau: “Iehova be idia boiboi henia taudia iboudiai kahirakahira dekenai ia noho, . . . bona heduru abia totona idia taitai neganai do ia kamonai.” Oibe, edia hekwarahi karana ia diba; bona iena lauma helaga amo ia hagoadadia. “Bona do ia hamauridia.” Idia ia laloatao bona ia durudia idia haheauka totona. (Salamo 145:​18, 19) To ita be edena bamona? Iehova bamona, ita be gorere bona buruka taudia ita lalodia tao, a?

Hari inai nega lalonai, gorere bona buruka dainai ita manoka be vaia mauri ena kara. Unai kara do idia noho ela bona Iehova ese ena ura inai tanobada bona taunimanima dekenai do ia hagugurua neganai. Hari inai negai, taunimanima momo edia mauri be daudau, bona buruka taudia edia manoka karadia idia diba. Ma danu, taunimanima idia do matamata neganai, momo be do ia hamasedia gorere dikana idia abia eiava aksiden dainai edia tauanina kahana ta idia hadikaia momokani. Inai tanobada gunana ia do ore lasi neganai, gorere bona buruka karadia idia ore lasi.

Gorere bona buruka taudia be “hisihisi lalonai idia haheauka” dainai ita moale henidia! Oibe, “ita diba inai haheauka taudia ese moale idia davaria vadaeni.” (Iakobo 5:​10, 11) Buruka taudia momo edia tauanina idia manoka, to lagani momo lalodiai taunimanima idia hadibadia, lauma dalanai idia sikulidia bona idia durudia, bona hari idia sikulidia taudia be kongregesen lalonai gaukara idia gunalaia. Buruka taudia momo idia moale badina edia natudia be nega ibounai hesiai gaukarana idia karaia dainai.​—Salamo 71:​17, 18; 3 Ioane 4.

Unai hegeregerena, gorere dikana idia abia taudia ita moale henidia, badina ena be hisihisi idia ania to edia abidadama karana amo ita idia hagoadaia. Idia hamomokania daradara lasi dekenai edia helaro dekenai idia abidadama noho, bona unai ese ita ia durua bada bona iseda abidadama ia hagoadaia. Lalo-maino bona moale idia abia bona unai ese ia hahedinaraia edia abidadama be ia bada, bona edia kara ita tohotohoa be namo.

Ta ese kansa, stroke, eiava gorere dikana ma ta ia abia neganai, mai gari danu ia hoa bona gorere ese ena mauri ia haidaua. Danu, natudia be gorere dikana idia abia eiava aksiden dainai hisihisi idia ania neganai, edia tamana bona sinana idia lalo-hekwarahi bada. Taunimanima ma haida be edena bamona idia heduru diba? Dika ta ia vara neganai, Keristen tadikaka ibounai oreana dekenai hetoho ia havaraia. Unai neganai ita hahedinaraia diba ‘turana korikori be tadikaka ta, dika ia vara neganai, ita ia durua totona ia vara.’ (Hereva Lada-isidia 17:17) Momokani, gorere bona buruka taudia idia ura lasi kongregesen taudia ta ta iboudiai do idia durudia. To Iehova ese iena lauma helaga amo tadikaka momo ia hasiahudia dala idauidau ai idia durudia totona. Danu, elda taudia idia gima noho idia ta idia laloaboio lasi totona.​—Esodo 18:​17, 18.

Mai Lalo-Parara Oi Karaia

Oi ese ta oi durua toho neganai, gau badana be ia danu oi herevahereva hebou karana ia namo, bona unai ia vara totona nega, haheauka, bona hebogahisi bada oi gaukaralaia. Oi be heduru tauna dainai, oi ura ‘uduna hereva amo ia oi hagoadaia’; to namona be ena hereva oi kamonai namonamo guna, gabeai oi hereva eiava kara ta oi karaia, bema lasi, reana oi be ‘durua tauna dikana’ bamona.​—Iobu 16:​2, 5.

Nega haida gorere bona buruka taudia idia haheauka diba lasi bona edia badu idia hahedinaraia. Idia momo idia ura idia mauri noho bona hisihisi badana amo do idia roho mauri, to hari edia mamina be do idia mase guna bena murinai hisihisi badana do ia mai. Ma danu, idia gorere eiava idia manoka dainai idia hesiku bona idia lalo-hekwarahi. Edia abidadama idia hamauria bona hagoadaia noho be mai ena hekwarahi, badina idia ura bamona Keristen haroro gaukara idia karaia bada diba lasi. Keristen elda ta be buruka taihuna ta ia vadivadi henia; ia danu ia guriguri hebou neganai, iseda dika gwauatao totona ia noinoi. Ia guriguri murinai ia itaia unai taihu be ia taitai. Taihu ia gwau hari ia goada lasi ruma ta ruma ta gaukara ia karaia totona, bona unai be dika dainai Iehova ese ia gwauatao bada be namo. Oibe, ta ese ia haroro diba lasi eiava ia karaia bada lasi dainai ena lalona ia hisihisi bada diba.

Namona be oi laloatao, lalo-hekwarahi bona tauanina manoka karadia dainai reana idia laloa maoromaoro diba lasi. Idia manoka, idia buruka dainai, eiava gorere dainai idia lalo-metau, unai bamona taudia be reana idia laloa Iehova ese ia rakatanidia, reana idia gwau: “Dahaka kerere lau karaia? Dahaka dainai hisihisi lau ania?” Hereva Lada-isidia 12:25 oi laloatao, ia gwau: “Lalo-hekwarahi ese tau ta ia hametaua noho, to hereva namona ese ia hamoalea.” Hereva namodia oi tahudia edia lalona hamoalea totona. Buruka taudia be hisihisi idia ania neganai, reana Iobu bamona, idia gwau idia ura idia mase. Unai hereva dainai do oi hoa lasi; lalo-parara oi gaukaralaia. Unai bamona idia maumau neganai, ita gwau lasi edia kamonai eiava edia abidadama be ia maragi. Iobu ia guriguri Dirava be ‘Sheol dekenai ia hunia totona,’ to murinai ia gwauraia herevadia ese idia hahedinaraia ena abidadama be ia goada badina ia gwau gabeai Iehova ese do ia hatorea isi lou. Bema iseda abidadama ia goada, ena be ita lalohisihisi bona ita lalo-metau, to Iehova kahirakahira dekenai ita noho diba.​—Iobu 14:​13-15.

Gorere Bona Buruka Taudia Matauraidia

Gorere bona buruka taudia ita lalodia bada bona mai hemataurai ida ita kara henidia be gau badana. (Roma 12:10) Bema hari idia laloa haraga diba lasi eiava idia gaukara bada diba lasi, namo lasi oi badu. Namo lasi oi gava bona idia totona dala ta oi abia hidi. Ena be ita ura durudia, to bema idia ita biagua eiava ita oda henidia, do idia laloa gau ta do idia karaia namonamo diba lasi. Lagani 1988 ai, doketa lalohadai pepana idia halasia, bona unai hereva ia karaia tauna, Jette Ingerslev, ia gwau lagani 85 orea taudia ese edia mauri lalonai dahaka be gau badana idia herevalaia: “Idia laloa bada gaudia toi idia gwauraia: edia varavara danu idia noho; idia gorere lasi; bona ginigabena be mai anina danu, unai be idia ura sibodia edia dala idia abia hidi.” Inai oi laloa, bese kwarana tauna Iakobo ia buruka neganai, iena natuna memerodia ese idia biagua lasi; iena ura idia matauraia.​—Genese 47:​29, 30; 48:​17-20.

Gorere taudia be mai hemataurai danu ita kara henidia be namo danu. Operesen ia abia neganai, kerere ia vara dainai, elda tauna ta be herevahereva, duahiduahi, bona toretore ia karaia diba lasi. Unai be dika momokani, to ena elda bamoa taudia idia hereva hebou, idia gwau namo lasi ia laloa gau ta ia karaia diba lasi. Hari, kongregesen ena leta iboudiai be ia dekenai idia duahidia, bona kongregesen durua herevadia totona idia hebou neganai ia danu ia helai vareai. Elda edia hebou dekenai, iena lalohadai idia tahua. Idia hahedinaraia ena elda dagina ia haboioa lasi bona elda edia hebou dekenai ia helai vareai dainai idia moale. Keristen kongregesen lalonai, namona be ita ta ta ibounai be iseda kara amo ita hahedinaraia gorere taudia eiava buruka taudia ita “negedia” lasi eiava ita rakatanidia lasi.​—Salamo 71:9.

Lauma Dalanai Ita Goada Dalana

Iseda abidadama ita hamauria bona ita hagoadaia noho totona, ita iboudiai be lauma aniani ita ania be gau badana. Unai dainai ita idia hagoadaia, dina ta ta iboudiai Baibel bona Baibel ena hereva idia gwauraia bukadia ita duahidia totona, bona Keristen heboudia dekenai ita haere bona haroro gaukara ita karaia totona. Nega momo, idia gorere bona idia buruka dainai, ita durudia unai idia karaia totona be namo, to namo lasi ita doridia idia karaia diba lasi karana idia karaia totona. Bema ita hakaudia bona Kingdom Hall dekenai ita durudia idia momo be hebou dekenai idia mai diba, unai be moale gauna. Hebou dekenai idia mai neganai unai ese kongregesen taudia ia hagoadaia. Edia haheauka karana ese ita ia hamoalea bona iseda abidadama ia hagoadaia.

Nega momo, gorere bona buruka taudia be Keristen haroro gaukara idia karaia namonamo diba. Motuka dekenai idia lao haroro taudia idia bamoa diba, bona ena be ruma haida sibona idia karaia diba, to idia haroro sisina dainai moale idia davaria. Bema unai bamona idia karaia diba lasi neganai, taunimanima be nega bona gabu idaudia dekenai idia davaridia neganai idia haroro henidia dainai do idia moale diba. Taihu ta be kansa gorere ia abia, bona ena lalona ia hadaia ena mauri orena lalonai ia goada karaia sivarai namona ia harorolaia totona. Gari lasi dekenai ia haroro dainai, taunimanima ia hagoadadia. Ia do mauri noho neganai ena mase dinana herevana lalonai dahaka do idia hereva, ena Witness lasi varavara taudia, ena moni gaukara turadia, bona ena dekena taudia ese hereva momokani do idia kamonai henia totona, hereva ia hegaegaelaia. Ena be gorere dikana ia abia, to “Sivarai Namona ia durua bona ia hatubua noho,” bona ia goada karaia ena abidadama bona gari lasi karadia ia hahedinaraia totona, unai dainai ena mauri dinadia oredia be mai edia anina bada.​—Filipi 1:​12-14.

Lauma dalanai idia goada totona gorere bona buruka taudia ita durudia be namo. Ruma bese taudia ese idia boiridia diba idia danu idia hebamo totona, eiava bema ta ese ena ruma ia rakatania diba lasi, nega haida ruma bese stadi kahana ta do idia karaia diba iena ruma dekenai. Sinana ta be ena natudia maragi rua be buruka taihuna ta ena ruma dekenai ia hakaudia lao, bona idia noho nega sisina, unai buruka taihuna be idia dekenai Lau Egu Bible Sivarai Buka ia duahia. Unai ese buruka taihuna ia hamoalea, bona natudia idia moale badina ia kara namo henidia dainai.

To, nega haida, gorere tauna ia ura lasi rege momo, unai neganai namona be idia totona sivarai sibona ita duahia. To, oi laloatao, ena be ta ia manoka herea dainai ia hereva be ia auka, to reana ia ura lauma dalanai ita ia bamoa bona unai be maoro. Unai bamona taudia ida ita guriguri diba, idia totona ita duahiduahi, eiava ekspiriens haida ita gwauraia diba; to bema idia manoka momokani namo lasi ita noho daudau.

Gorere bona buruka taudia momo be inai helaga hesiai gaukarana idia karaia diba: haida totona idia guriguri diba. Keristen ginigunadia edia negai, hahediba taudia be unai hesiai gaukarana idia laloa bada. Nega ta kongregesen lalonai gaukara idia haria aposetolo taudia be guriguri karana idia goadalaia diba totona. Idia gwau abidadama tauna Epafra be ‘nega ibounai idia dainai ia guriguri goada.’ (Kolose 4:12; Kara 6:4) Unai bamona guriguri be mai anina bada bona ena heduru be bada.​—Luka 2:​36-38; Iakobo 5:16.

Iehova ese gorere bona buruka taudia ia lalodia tao bona edia hekwakwanai nega dikana lalonai ia naridia. Ia maoro ia ura ita durudia bona ita hagoadadia danu. Bema ita hahedinaraia idia ita hebogahisi henidia, unai ese ia hahedinaraia ita ura iseda abidadama ia goada noho. Bona mai moale danu Pavapava David ena hereva ita laloa, ia gwau: “Iehova ese kerere lasi taudia edia dina ia diba, edia ahuna namona do ia noho ela bona hanaihanai.”​—Salamo 37:18.

[Box on page 28]

Durudia—Mai Lalo-parara Danu

NAMONA be gorere bona buruka taudia edia turadia bona varavara be durudia dalana maorona idia diba. Gau badana be idia durudia hagoadaia gaudia idia laloa totona, do idia diba taunimanima ese idia ura henidia bona idia moalelaidia, bona sibodia do idia matauraia. Unai neganai, ena be mai edia hisihisi, to edia mauri lalonai edia moale Iehova dekenai do ia boio lasi. Taunimanima idia itaia Iehova ena Witness taudia momo idia mauri daudau. Idia mauri daudau badina idia be mai edia helaro dina vairai totona, moale lalohadai mauri dekenai idia abia, bona edia goada hegeregerena Basileia ena gaukara idia karaia dainai. Hamomokania tauna ta be Watch Tower Society ena presiden gunana; Frederick W. Franz be vanegai hisihisi lasi dekenai ia mase neganai iena lagani be 99, bona ena mauri lalonai mai moale danu gaukara namodia momo ia karaia.​—Sisiga Ginigunana 29:28 itaia danu.

Edia tauanina idia naria namonamo be gau badana, durua gaudia be inai: tauanina ia goeva, aniani namona idia ania, idia inua ranu bona damena edia bada ia hegeregere, idia eksasais, hodahoda ia goeva, tauanina ena masolo gigia sisina, bona lalona veria herevadia. Aniani namodia ita ania neganai iseda kamonai karana, matadia, lalohadai, bona tauanina ia durua, bona ita gorere momo lasi. Bema buruka taudia be aniani namodia idia ania bona ranu bada idia inua edia lalona do idia dika lasi, bema lasi do idia kava diba. Idia dekenai ia hegeregere eksasais oi davaria totona namona be oi laloa namonamo. Pura ta ta iboudiai taihu ta be matakepulu buruka taihuna ta totona ia duahiduahi; ia ginidae neganai daiutu dekenai idia mavaru sisina bona duahiduahi ia ore neganai ma idia mavaru lou. Hanaihanai teipi rekodi mai ena miusik ia atoa hegaegae, bona unai taihu rua be unai “eksasais” idia moalelaia.

Tano momo lalodiai, durua oreadia idia noho, bona heduru namona bona hereva namodia oi idia henia gorere idauidau taudia oi durudia namonamo diba totona. (To, namo lasi Keristen taudia be unai heduru kara idauidau idia karaia dainai edia Keristen haroro gaukara idia reaia.) Nega haida idia henia heduruna be hosipele ena mahuta gauna oi idia henia bena gabeai oi henia lou, raka durua gauna, doruna bona aiona dogoatao gauna, uilisea, taiana gauna kamonai durua totona, bona ma gau haida. Buruka taudia momo idia laloa idia hegeregere bona idia laloa gau matamatadia idia abia be anina lasi, unai dainai abia totona varavara taudia be aonega dalanai edia lalona idia ania be namo. Digu rumana dekenai ia kehoa diba gauna idia atoa ena moale be palaoapalaoa henia karana ena moale ia hanaia.

Buruka taudia naria karana ese naria taudia dekenai lalo-hekwarahi bada ia havaraia diba, unai be momokani bema burukadia be maragidia bamona idia lao. Nega momo unai kara be sisina sisina ia vara. Bona burukadia durua totona namo lasi sibona dekenai ia helai momo. Buruka taudia be maragidia bamona ai idia lao neganai, guna ia laloa bada tauna be haraga herea ia badu henia. Namona be varavara taudia idia diba, buruka tauna be hereva momokani ia laloaboio diba danu​—unai be ena tauanina ia manoka dainai, ena abidadama ia manoka dainai lasi.

Bema buruka tauna be hosipele lalonai ia noho, namona be varavara taudia be hosipele taudia idia hadibaia iena lalohadai be dahaka, vara dinana, Kerisimasi, eiava tanobada ena holide ma ta hahelagaia karana dekenai. Bema operesen ia abia be namo, varavara taudia be doketa taudia dekenai unai buruka tauna ena lalohadai rara henia hanai karana dekenai do idia hamaorodia.