Idia Hunia Dava Bada Gaudia Idia Tahua

LAGANI 1848 lalonai, U.S.A., California ena gabu ta ladana Sutter Mill dekenai, golo idia davaria hamatamaia. Lagani 1849 ia ginidae neganai taunimanima daha daha be taga idia tahua dainai unai gabu dekenai idia heau lao, bona unai neganai United States dekenai tano ai golo tahua gaukarana ia bada herea. Lagani ta murinai bouti idia vareai gabuna, San Francisco ena taoni maragina be siti badana ta ai ia lao; taunimanima 25,000 idia noholaia. Oibe, nega kwadogi ai ta ese taga do ia davaria diba ena lalohadai ese momo ia veridia.

Gunaguna, Israel ena Pavapava Solomon ia diba taunimanima be mai edia goada ibounai danu davana bada gaudia be tano lalonai idia geia, bona inai hereva amo unai kara ia sivarailaia, ia gwau: ”Bema lalo-parara oi boiboi henia bona oi boiboi diba abia totona, bema oi tahua, siliva oi tahua bamona, bona idia hunia kohuna oi tahua bamona, unai neganai Iehova garina ena anina do oi diba, bona Dirava ena diba do oi davaria.”​—Hereva Lada-isidia 2:​3-5.

Golo bona siliva amo gau idauidau do oi karaia diba, to lalo-parara bona aonega amo gau mai anidia momo do oi karaia diba. Oibe, unai gaudia ese oi do idia durua bena lalohadai maorodia do oi karaia, hekwakwanai oi hamaoromaoroa diba, emu headava do ia namo diba bona moale do oi davaria diba. (Hereva Lada-isidia 2:​11, 12) Bona danu, hereva momokani bona aonega ese oi do idia durua oi ia Havaraia Diravana do oi diba namonamo totona, ena ura do oi lalo-pararalaia totona, bona ena ura oi badinaia karana amo ia oi hamoalea diba. Golo amo unai bamona gaudia do ita davaria diba lasi.

Baibel ena hereva be ia momokani vaitani, ia gwau: “Aonega ese taunimanima ia naridia moni ese ia naridia bamona; to diba ena hahenamo be inai: aonega idia abia taudia be ia ese ia hamauridia.” (Kohelete 7:​12) Momo ese taga do idia davaria haraga idia lalohadailaia momo, to aonega dalana be Baibel idia kehoa bona lalo-dobu, lalo-parara, diba bona aonega hereva be ia dekena amo idia tahua, unai be taga momokanina.