Ioane Ena Bapatiso

DIRAVA ena amo gwaumaoro ia abia bapatiso ia karaia totona tauna ginigunana be Ioane, Sekaria bona Elisabeta edia natuna. (Luka 1:​5-7, 57) Taunimanima idia gwauraia “Ioane Bapatiso” eiava ‘bapatiso henia tauna,’ (Mataio 3:1; Mareko 1:4) unai dainai ita diba taunimanima be Ioane dekena amo ranu bapatiso karana idia diba, bona Buka Helaga ese ia hahedinaraia Dirava ese Ioane dekena amo unai haroro bona bapatiso gaukaradia ia havaraia; Ioane ese ia havaraia lasi. Dirava be Ioane ia henia gaukara aneru Gabriela ese ia perovetalaia, (Luka 1:​13-17) bona lauma helaga ena siahu amo Sekaria ia peroveta, ia gwau Ioane be Atai Momokani Diravana ena peroveta tauna ai do ia lao bona Iehova ena ura daladia do ia hegaegaelaidia. (Luka 1:​68-79) Iesu ese ia hamomokania Dirava ena ura dainai Ioane be ena haroro bona bapatiso gaukara ia karaia. (Luka 7:​26-28) Hahediba tauna Luka ena toretore ia gwau: “Dirava ese Ioane Sekaria dekenai ia hereva, taunimanima idia noho lasi tanona dekenai. Unai dainai . . . Ia haroro, ia gwau, . . . ‘bapatiso umui abia.’ ” (Luka 3:2, 3) Aposetolo Ioane ia herevalaia inai bamona: “Tau ta ia vara, Dirava ese ia siaia, ena ladana be Ioane.”​—Ioane 1:6.

Ita gwau lasi Dirava ena hesiai tauna Ioane be ia karaia bapatiso karana amo Dirava ese taunimanima ia hagoevadia, to taunimanima vairadiai ta be bapatiso ia abia karana ese ia hahedinaraia Taravatu dekenai, Keriso dekenai taunimanima ia hakaudia gauna unai, ia ena kara dika amo ia helalo-kerehai. (Galatia 3:24) Ioane ese taunimanima ia hegaegaelaidia “Dirava ena hahemauri do idia itaia” totona. (Luka 3:6) Ena gaukara amo “[Iehova] ena bese taudia do ia abidia hegaegae.” (Luka 1:​16, 17) Isaia bona Malaki ese unai gaukara idia perovetalaia.​—Isaia 40:​3-5; Malaki 4:​5, 6.

Aonega taudia haida idia laloa idaunegai, Taravatu henunai idia karaia boubou eiava hagoevaia karadia be dala ia hegaegaelaia Ioane ena bapatiso bona Keristen ena bapatiso do idia vara totona. (Esodo 29:4; Levitiko 8:6; 14:​8, 31, 32; Heberu 9:10; Genese 35:2; Esodo 19:10) To unai karadia bona bapatiso momokani kara edia anina be idau. Unai sivarai lalodiai idia karaia karadia be tomadiho totona tauanina idia hagoevaia. Sibona tauanina hagoevaia totona ta be ranu lalonai ia diho momokani sivaraina tamona ia noho. Unai be lepera tauna Naaman, to ia be nega 7 ranu lalonai ia diho momokani. (2 Hanua Pavapavadia 5:14) Unai kara amo ena lepera gorere ia ore, to Dirava danu gwauhamata karana ia karaia lasi. Danu, Baibel lalonai, ia gwau idau taudia be Iuda tomadiho idia abia dae neganai, edia kopina idia utua, idia bapatiso henidia lasi. Edia kopina idia utua taudia sibodia be Paseka ariana idia ania diba eiava dubu lalonai idia tomadiho diba.​—Esodo 12:​43-49.

Ia maoro lasi haida idia gwau Ioane ena bapatiso be guna Iuda ena Essene taudia eiava Farisea orea taudia amo ia abia hanai. Unai orea ruaosi edia taravatu be momo tauanina idia hagoevaia loulou totona. To Iesu ia gwau unai kara be taunimanima edia taravatu, idia be sene karadia idia badinaia bona Dirava ena taravatu dekenai unai kara haida idia hakapua kava. (Mareko 7:​1-9; Luka 11:​38-42) Ioane be ranu dekenai bapatiso ia karaia, badina ia gwau Dirava ese ranu dekenai bapatiso karaia totona ia siaia. (Ioane 1:33) Essene eiava Farisea taudia ese idia siaia lasi. Ia mai lasi idau taudia be Iuda taudia ai ia halaodia totona, to iena gaukara be Iuda besena ena orea memba taudia ia bapatiso henidia.​—Luka 1:16.

Ioane ia diba ena gaukara amo dala ia lailaia Dirava ena Natuna, Mesia totona, bona Iena gaukara ese Ioane ena gaukara do ia hereaia. Ioane ena bapatiso gaukara ena badina be Israel besena dekenai Mesia do ia hahedinaraia. (Ioane 1:31) Ioane 3:​26-30 ia gwau Mesia ena gaukara do ia bada ia lao, to Ioane ena gaukara do ia maragi ia lao. Iesu be tanobada dekenai hesiai gaukara ia karaia neganai, iena hahediba taudia idia bapatiso henia taudia be hahediba taudia ai idia lao. Unai taudia be Ioane ena bapatiso hegeregerena idia abia, unai bapatiso ese edia helalo-kerehai toana ia hahedinaraia.​—Ioane 3:​25, 26; 4:​1, 2.

This article is unique to PNG.