Keristen Ruma Bese be Buruka Taudia Idia Durudia

“Lau buruka neganai lau oi negea lasi, lauegu goada ia ore neganai lau oi rakatania lasi.”​—SALAMO 71:9.

1. Bese idauidau momo dekenai buruka taudia be edena bamona idia kara henidia?

“RIPOTI haida ese idia hahedinaraia idia kara dika henia buruka taudia 7 7 amo 6 6 (86 pesen) be edia ruma bese taudia ese idia kara dika henidia,” unai sivarai be The Wall Street Journal ai idia torea. Modern Maturity magasin lalonai ia gwau: “Buruka taudia kara dika henidia karana be ruma bese edia hehuni dagedage karana ma ta, bona hari America ena niuspepa dekenai unai sivarai idia hahedinaraia.” Oibe, bese idauidau ai buruka taudia idia kara dika henidia bada bona idia naridia lasi. Hari ita noho negana lalonai taunimanima momo be ‘edia ura sibona idia tahua, . . . tanikiu henia kara idia diba lasi, helaga karadia idia negea, bona lalokau idia diba lasi.’​—2 Timoteo 3:​1-3.

2. Heberu Revarevadia ese idia hahedinaraia Iehova ese buruka taudia be edena bamona ia lalodia?

² To, idaunegai Israel lalonai buruka taudia be unai bamona idia kara henidia be taravatu. Taravatu ia gwau: “Hui kurokuro tauna vairanai oi toreisi bona tau burukana oi matauraia bona emu Dirava garina oi gari. Lau inai Iehova.” Dirava ena siahu amo idia torea aonega hereva bukana ena sisiba ita dekenai be inai: “Emu tamana, oi ia havaraia tauna, oi kamonai henia, bona emu sinana oi dadaraia lasi ia buruka dainai.” Ita ia oda henia, ia gwau: “Lauegu natuna e, oiemu tamana ena sisiba oi kamonai, bona oiemu sinana ena taravatu oi rakatania lasi.” Mose ena Taravatu ese taunimanima ia hadibadia tatau bona hahine burukadia idia matauraidia totona. Ia hedinarai goevagoeva, Iehova ia ura buruka taudia idia matauraidia.​—Levitiko 19:32; Hereva Lada-isidia 1:8; 23:22.

Baibel Torea Neganai Buruka Taudia Idia Naria Dalana

³ Hereva amo sibona lasi, to kara namodia amo danu idia matauraidia be gau badana. Iosef ese ena buruka tamana ia hebogahisi henia bada. Ia ura Iakobo be Kanana ia rakatania bona Aigupito dekenai ia mai, unai loaloa ena daudau be 300 kilomita bamona. Unai dainai Iosef ese Iakobo dekenai “doniki 10 Aigupito dekena amo kohu namodia idia huaia, bona doniki hahine 10 uiti bona paraoa bona aniani haida danu idia huaia, bona iena tamana ena aniani danu dala dekenai ania totona.” Iakobo be Gosena tanona ai ia ginidae neganai, Iosef be ia dekenai ia lao bona “ena aiona dekenai ia rosia, ia tai nega daudau.” Iosef ese ena tamana dekenai lalokau bada karana ia hahedinaraia. Buruka taudia naria karana dekenai iena haheitalai namona be lalona veria gauna!​—Genese 45:23; 46:​5, 29.

4. Dahaka dainai Ruta ena kara be ia namo ita tohotohoa totona?

⁴ Buruka taudia hebogahisi henia karana dekenai, Ruta ena kara ia namo ita tohotohoa totona. Ena be ia be Idau Bese amo, to ena ravana, Iuda vabu burukana, Naomi, ia rakatania lasi. Ia ese ena bese taudia ia rakatanidia bona ia headava lou diba lasi garina ia gari lasi. Naomi ese ia hagoadaia ena bese taudia do ia lou henidia totona, to Ruta ena haere ia dekenai be Baibel ena hairai hereva namodia haida, ia gwau: “Lau oi hagania lasi, oi gwau lasi oi do lau rakatania badina be do oi lao gabuna lau danu do lau lao, bona do oi noho gabuna danu do lau noho; oiemu bese be lauegu bese ai do ia lao, bona oiemu Dirava be lauegu Dirava ai do ia lao. Do oi mase gabunai lau danu do lau mase, bona unuseniai lau do idia guria. Gau ta ese ita do ia hapararaia lasi, mase mo sibona, bema mauri ai oi do lau rakatania, Iehova ese lau dekenai davana do ia henia, lau do ia hametaua momokani.” (Ruta 1:​16, 17) Danu, Ruta be kara namona ia hahedinaraia, ia ese buruka tauna Boa ia ura adavaia neganai, ia diba Levi ena taravatu henunai ihana ia adavaia be maoro dainai.​—Ruta, karoa 2 ia lao 4.

5. Iesu ese taunimanima ia kara henidia neganai, ena kara haida be dahaka?

⁵ Iesu ena kara taunimanima dekenai ese unai bamona kara namona ia hahedinaraia. Ia be mai ena haheauka, hebogahisi, heduru, bona taunimanima ia hagoadadia. Madi, ogogami tau ta ena tauanina ia dika, bona lagani 38 lalodiai ia raka diba lasi, to Iesu ese unai tau ia kara namo henia, ena tauanina ia hanamoa. Ia ese vabu ia hebogahisi henidia. (Luka 7:​11-15; Ioane 5:​1-9) Ena be au dekenai mase ena hisihisi bada ia ania, to ena sinana, ena lagani be reana 50 ia hanaia bamona, idia naria dalana ia hegaegaelaia. Idia turana henia koikoi ena inai taudia dekediai lasi, to Iesu ese ia idia bamoa taudia ma iboudiai ia hagoadadia. Unai dainai, ia gwau diba: “Tauanina manokamanoka bona gaukara metau taudia ibounai, lau dekenai umui mai, lau ese laga-ani do lau henia umui dekenai. Egu huaia auna be emui pagana dekenai do umui atoa, lau dekenai diba do umui tahua, badina be lau be dagedage lasi bona manau tauna. Vadaeni emui laumana be do idia laga-ani.”​—Mataio 9:36; 11:​28, 29; Ioane 19:​25-27.

Daidia ese Heduru Idia Abia be Namo?

⁶ Heduru karana dekenai Iehova Dirava bona ena Natuna, Iesu Keriso, edia kara be namo dainai, idia gwauhamata vadaeni Keristen taudia be edia kara idia tohotohoa be maoro. Lagani momo lalodiai idia gaukara bada bona metau bada idia huaia taudia be ita huanai idia noho​—idia buruka idia lao tadikaka bona taihu unai. Idia haida be reana iseda tamana bona sinana eiava iseda tubudia. Unai taudia ita lalodia bada lasi, a? Idia vairanai ita hahedinaraia ita be mai anina bada bona idia be mai anina bada lasi, a? Eiava edia diba mauri ena kara dekenai bona edia aonega dainai idia ita lalodia bada? Momokani, idia be buruka taudia dainai vaia idia haida edia kara dainai nega haida ita haheauka be ia auka. To sibona dekenai oi henanadai, ‘Bema lau be idia bamona, egu kara do ia idau, a?’

7. Dahaka ese ia hahedinaraia buruka taudia ita hebogahisi henidia be gau badana?

⁷ Middle East tanona dekenai kekeni ta ese buruka taudia ia hebogahisi henidia sivaraina ta be inai: Kekeni tubuna be nadunadu gabunai ia heduru neganai mereki ta ia hamorua bona ia makohi. Ia naria namonamo lasi dainai sibona ia badu henia; ena natuna hahine ese ia badu henia bada danu. Unai hahine ese ena natuna kekeni ia boiria, bona kekeni tubuna ia hamakohia diba lasi au mereki ta ia hoia totona sitoa dekenai ia siaia. Unai kekeni ia giroa mai neganai ia dekenai au mereki rua idia noho. Ena sinana be mai badu danu ia gwau: “Dahaka dainai mereki rua oi hoidia?” Hari kekeni be haraga lasi bamona, ia gwau: “Ta be egu tubuna totona, bona ma ta be oi totona, gabeai do oi buruka neganai.” Oibe, inai tanobada lalonai ita ta ta iboudiai be ita buruka ita lao noho. Ita ura taunimanima be mai haheauka bona mai hebogahisi ida ita idia kara henia, ani?​—Salamo 71:9.

8, 9. (a) Ita huanai idia noho buruka taudia be edena bamona ita kara henidia be namo? (b) Vanegai, Keristen ai idia lao taudia be dahaka do idia laloatao be namo?

⁸ Laloaboio lasi, iseda tadikaka bona taihu burukadia be nega daudau lalonai mai edia abidadama danu Keristen gaukara idia karaia. Ita matauraidia bona edia namo ita tahua, ita durudia bona ita hagoadadia be maoro. Aonega tauna ta ena hereva ia maoro, ia gwau: “Hui kurokuro be kwara gauna mai hairaina, kara maoromaoro dalanai ia noho neganai.” Bona edia hui idia kurokuro tatau bona hahine ita matauraidia be namo. Unai buruka tatau bona hahine haida be mai edia abidadama danu pioneer gaukara idia do karaia noho, bona unai tatau haida be mai edia abidadama danu kongregesen lalonai elda gaukara idia do karaia noho; idia haida be sekit eiava distrik naria gaukara namona idia karaia.​—Hereva Lada-isidia 16:31.

⁹ Paulo ese Timoteo ia sisiba henia, ia gwau: “Tau badana do oi gwau henia lasi. To mai manau danu do oi hereva henia, ia be oiemu tamana bamona. Eregabe taudia do oi hereva henia, idia be oiemu tadikaka bamona. Hahine badadia do oi hereva henia, idia be oiemu sinana bamona. Kekeni taudia do oi hereva henia, oiemu taihuna do oi hereva henia bamona, mai oiemu laloa goevagoeva danu.” (1 Timoteo 5:​1, 2) Vanegai, gwau-edeede tanobadana idia rakatania bona Keristen kongregesen dekenai idia vareai taudia be Paulo ena hereva idia laloa namonamo be gau badana, badina unai hereva be mai lalokau danu ia herevalaia. Memero kekeni e, sikuli dekenai reana umui itaia kara dikadia do umui tohotohodia lasi. Buruka Witness taudia be mai hebogahisi ida umui idia sisiba henia dainai umui badu lasi. (1 Korinto 13:​4-8; Heberu 12:​5, 6, 11) To, buruka taudia idia gorere eiava moni lasi dainai idia hekwakwanai neganai, durudia karana be daidia edia maduna?

Ruma Bese Ena Maduna Buruka Taudia Naridia Totona

¹⁰ Idaunegai Keristen kongregesen lalonai, vabu durudia dalana dekenai hekwakwanai idia vara. Aposetolo Paulo ese durudia dalana be edena bamona ia gwauraia? Ia gwau: “Vabu taudia do oi durua, bema idia be vabu korikori. To vabu ta, bema ia be mai ena natuna o mai ena tubuna, idia ese edia sinana bona tubuna idia durua be namo. Badina be Dirava do ita hamoalea karana ta be, iseda ruma taudia do ita laloa bona durua. To bema tau ta ese iena varavara ia naria lasi, o iena ruma taudia ia ubua lasi neganai ia ese iena abidadama Keriso dekenai ia negea vadaeni. Iena dika ese ekalesia lasi murimuri tauna ena dika ia hanaia vadaeni.”​—1 Timoteo 5:​3, 4, 8.

10, 11. (a) Baibel ena hereva hegeregerena, daidia ese buruka taudia naria gaukarana do idia gunalaia be namo? (b) Nega haida, dahaka dainai buruka taudia naria gaukarana be mai ena hekwarahi?

¹¹ Buruka taudia idia dabu neganai, edia ruma bese taudia be idia durudia guna be namo.a Unai dala amo edia natudia badadia ese buruka taudia idia tanikiu henidia diba, badina be idia maragi neganai, lagani momo lalodiai burukadia ese idia idia lalokau henidia, idia dainai idia gaukara, bona idia naridia. Reana nega haida unai ita karaia be ia auka. Taunimanima idia buruka idia lao neganai, vaia idia gaukara goada diba lasi, bona idia haida be idia gorere. Ena be idia laloa lasi, to ma haida be sibodia edia ura idia tahua bona mai edia noinoi momo. To ita beibi neganai, siboda eda ura ita tahua bona iseda noinoi be momo, ani? Bona karaharaga iseda tamana bona sinana ese iseda ura gaudia ita idia henia, ani? Hari, idia buruka bona unai kara idia karaia lasi. Vadaeni, dahaka ita karaia be namo? Idia dekenai hebogahisi bona haheauka karadia ita hahedinaraia.​—Tesalonika Ginigunana 2:​7, 8 itaia danu.

12. Buruka taudia bona Keristen kongregesen taudia iboudiai naridia totona, dahaka kara ita hahedinaraia be namo?

¹² Aposetolo Paulo be ita badinaia diba sisiba namona ia torea, ia gwau: “Umui be Dirava ena taudia, ia ese umui ia lalokau henia, bona umui ia abia hidi, iena. Unai dainai inai bamona karadia, dabua bamona do umui atoa: [hebogahisi], durua, manau, manada bona haheauka. Bema tau ta ese ena bamona tauna ia maumauraia, ia kara dika henia dainai, namona be unai dika do ia gwauatao. Lohiabada ese umui emui dika ia gwauatao, vadaeni unai bamona do umui karaia danu. To unai kara ibounai ia hanaia kara be lalokau. Umui lalokau henia, vadaeni do umui noho hebou namo herea, mai laloa tamona danu.” Bema kongregesen lalonai unai bamona hebogahisi bona lalokau karadia ita hahedinaraia be mai anina bada, ruma bese lalonai ita hahedinaraia be gau badana momokani, ani?​—Kolose 3:​12-14.

¹³ Nega haida iseda tamadia, sinadia, bona tubudia sibodia lasi, to iseda varavara burukadia ma haida danu be unai bamona ita naridia bona ita durudia be namo. Buruka taudia haida edia natudia be lasi, bona lagani momo idia be misinari gaukara, sekit bona distrik gaukara, bona nega ibounai hesiai gaukara ma haida idia karaia. Edia mauri lalodiai idia be Basileia gaukara idia atoa guna. (Mataio 6:33) Vadaeni, ita naridia bona ita durudia be maoro, ani? Watch Tower Society oreana ese Betele buruka taudia ia naridia dalana be kara namona ita tohotohoa totona. Betele hedikwota, Brooklyn dekenai, bona Society ena branch haida dekediai, dina ta ta iboudiai mai edia diba taudia ese buruka taudia idia naridia. Buruka taudia idia naridia hegeregere idia be edia tamadia bona sinadia eiava edia tubudia bamona, bona unai gaukara maduna idia moalelaia. Idia naridia negadiai, unai buruka taudia edia ekspiriens idia kamonai dainai diba momo idia abia.​—Hereva Lada-isidia 22:17.

Kongregesen Danu ese Burukadia Ia Naridia Dalana

¹⁴ Hari inai negai, tanobada kahana idauidau dekenai gavamani ese buruka taudia dekenai heduru moni idia henidia, bona idia gorere neganai Gavamani amo heduru idia abia diba. Bema mai dalana, Keristen taudia be unai heduru idia abia be namo. To, Keristen ginigunadia edia negai unai bamona heduru ia noho lasi. Unai dainai Keristen kongregesen taudia ese kara ta idia karaia idia dabu vabu taudia idia naridia totona. Paulo ia gwau: “Vabu edia ladana torea pepa dekenai, be inai bamona vabu sibona ena ladana do oi torea: Vabu iena mauri lagani be 60 vadaeni, bona tau tamona ia adavaia, iena kara namodia dainai be taunimanima ese idia hanamoa. Ia ese iena natuna ia naridia namonamo. Ia ese idau taudia dekenai aniani ia henia. Ia ese Dirava ena taudia edia aena ia huria. Ia ese hisihisi taudia ia durua, bona kara namodia ibounai ia goadalaia. Unai bamona vabu sibona ena ladana unai pepa dekenai [kongregesen amo heduru ia abia totona] do oi torea.” Unai hereva amo, Paulo ese ia hahedinaraia kongregesen be mai ena maduna burukadia idia durudia totona. Bema lauma dalanai idia goada buruka hahine edia natudia be orea lalonai idia noho lasi, kongregesen ena heduru idia abia be maoro.​—1 Timoteo 5:​9, 10.

15. Gabu haida dekenai gavamani amo heduru abia totona, dahaka dainai burukadia ita durudia be gau badana?

¹⁵ Gavamani haida ese buruka taudia durudia dalana idia kehoa, to unai heduru idia abia totona reana burukadia be pepa torea dalana idia daradaralaia. Bema unai bamona, namona be kongregesen naria taudia ese buruka taudia idia durudia moni abia aplikeisini torea totona, moni idia abia dalana idia diba totona, eiava unai kara dekenai edia moni idia habadaia totona. Nega haida edia noho idia idau dainai, moni ma haida do idia abia diba. Kongregesen naria taudia be dala idauidau amo idia hegaegae diba buruka taudia idia naridia totona. Unai dala haida be dahaka?

16, 17. Kongregesen lalonai buruka taudia abidia dae dala haida be dahaka?

¹⁶ Baibel torea negana amo taunimanima abia dae karana ia noho. Ema bona hari Middle East tanodia lalodiai, idau bese taudia idia abidia dae, hegeregere ti eiava kofi idia henidia. Vadaeni, ita hoa lasi Paulo ena toretore dainai, ia gwau: “Bema Dirava ena taudia idia dabu neganai, umui durudia. Bema idau taudia be umui dekenai idia mai neganai, umui abidia dae.” (Roma 12:13) Greek gado ai unai hereva abia dae be phi·lo·xe·niʹa, ena anina be “idau taudia lalokau (ura henia, eiava hebogahisi) henidia.” Bema Keristen tauna be idau bese taudia ia abidia dae be namo, orea lalonai ia bamodia abidadama taudia ia abidia dae be mai anina bada herea, ani? Bema buruka taudia ita boiridia ita ida do idia aniani hebou totona, edia mauri lalonai unai be kara idauna ta dainai do idia moale. Moale karana oi hegaegaelaia neganai, bema oi ura aonega herevadia oi kamonai bona mauri dekenai ekspiriens namona oi diba, buruka taudia oi boiridia mai danu.​—Luka 14:​12-14 itaia danu.

¹⁷ Dala idauidau ai buruka taudia ita hagoadadia diba. Bema ita hegaegae motuka amo Kingdom Hall eiava hebouhebou do ita lao henia totona, reana buruka taudia haida ita boiridia diba ita danu idia guia totona, a? Ita naria lasi ela bona ita idia noia. Ita hamaorodia ita ura abidia lao. Heduru gauna ma ta be idia totona sitoa dekenai aniani ita hoia. Eiava bema idia hegeregere neganai, ita hamaorodia ita idia bamoa sitoa dekenai ita lao hebou totona, ani? To idia manoka garina namona be idia helai diba gabudia dekenai ita lao idia hegeregere totona. Reana unai neganai iseda haheauka bona hebogahisi karadia do ia tohoa, to buruka taudia edia tanikiu herevana be iseda hekwarahi davana namona.​—2 Korinto 1:11.

Kongregesen Idia Durua Bada

¹⁸ Kongregesen lalonai hui kurokuro (bona kebere buruka taudia danu) ita itaia be hahenamo badana! Unai ena anina be edia tauanina idia goada bona idia gaukara goada diba memerodia bona kekenidia huanai, mai edia aonega bona mai edia diba buruka taudia haida idia noho​—kongregesen idia durua bada diba taudia unai. Edia diba be ranu guri amo idia utua dae ranu namona bamona. Ia be Hereva Lada-isidia 18:4 ena hereva bamona, ia gwau: “Tau ta uduna herevadia be ranu dobudia bamona; aonega be ia lohilohi noho, ia aru goadagoada.” Buruka taudia idia diba ita lalodia bada bona ita moalelaidia neganai, unai ese ia hagoadadia!​—Salamo 92:14 itaia danu.

19. Edia buruka tamadia bona sinadia durudia totona haida be dahaka idia reaia?

¹⁹ Nega ibounai hesiai gaukara idia karaia taudia haida edia buruka tamadia eiava sinadia idia gorere dainai, idia laloa namona be edia hesiai gaukara idia hadokoa bona edia ruma dekenai do idia giroa lao, idia naridia totona. Guna, buruka taudia ese idia totona edia ura idia reaia, unai dainai namona be hari buruka taudia totona idia ese edia ura idia reaia. Tau ta mai adavana, guna idia be misinari taudia, to nega ibounai hesiai gaukara idia do karaia noho, be edia buruka tamadia bona sinadia idia naridia totona edia hanua dekenai idia giroa lao. Lagani 20 bona ma haida lalodiai idia naridia noho. Lagani hani gunanai, tau ena sinana be hosipele bamona rumana lalonai idia atoa idia naria totona. Unai tau ena lagani be 60 ia hanaia, bona ena lagani 93 sinana be dina ta ta iboudiai ia vadivadi henia. Ia gwau: “Lau rakatania be dala lasi. Ia be lauegu sinana!” Ma haida be edia nega ibounai hesiai gaukarana idia karaia noho diba totona, kongregesen bona taunimanima ta ta idia gwau idia ura idia heduru unai taudia edia buruka taudia idia naridia totona. Sibona ena ura tahua lasi lalokau karana idia hahedinaraia dainai, ita hanamodia be namo. Unai gaukara maduna idia karaia namonamo be gau badana badina buruka taudia idia rakatanidia diba lasi. Umui hahedinaraia emui buruka tamana bona sinana umui lalokau henidia.​—Esodo 20:12; Efeso 6:​2, 3.

20. Buruka taudia naridia dalana dekenai Iehova ena kara namona be dahaka ita tohotohoa totona?

²⁰ Momokani, kongregesen lalonai eiava ruma bese lalodiai, iseda tadikaka bona taihu burukadia be kwara gauna mai hairaina. Iehova ia gwau: “Ela bona umui buruka neganai, lau be Ia; ela bona hui kurokuro umui davaria, lau ese umui do lau rosia noho. Umui lau kara henia, umui do lau abia loaloa, umui do lau rosia noho, bona umui do lau hamauria.” Ia hegeregerena, namona be iseda Keristen orea lalonai tadikaka bona taihu burukadia dekenai ita haheauka bona ita naridia namonamo.​—Isaia 46:4; Hereva Lada-isidia 16:31.

[Footnotes]

Inai Oi Laloatao, A?

◻ Baibel lalonai buruka taudia naridia karana dekenai daidia edia kara be namo?

◻ Buruka taudia be edena bamona ita kara henidia be namo?

◻ Ruma bese taudia ese edia lalokau buruka taudia be edena bamona idia naridia namonamo diba?

◻ Kongregesen be dahaka ia karaia diba buruka taudia durudia totona?

◻ Dahaka dainai buruka taudia be hahenamo bada ita dekenai?

3. Iosef ese ena buruka tamana dekenai edena bamona hebogahisi karana ia hahedinaraia?

6. (a) Daidia ita naridia namonamo be maoro? (b) Sibona dekenai dahaka henanadai ita gwauraidia be namo?

13. Tamana, sinana, eiava tubudia burukadia sibodia mo lasi, to daidia danu heduru idia abia be namo?

14. Idaunegai Keristen kongregesen lalonai, burukadia durudia totona dahaka idia karaia?

18. Dahaka dainai buruka taudia be kongregesen lalonai idia noho be hahenamo gauna?

[Picture on page 23]

Ruta ese Naomi dekenai hebogahisi bona hemataurai karadia ia hahedinaraia

[Picture on page 24]

Kongregesen lalonai buruka taudia idia lalodia bada