Basileia Haroro Ripoti
“Gaukara Hebou Karana Toana Ta”
SPAIN ena saut kahanai momokani be limestone nadi ororo badana ta, ena ladana be Rock of Gibraltar. Lagani handred momo lalodiai, unai nadi ororo dekenai politikol heai bona intenesenel hepapahuahu momo idia vara. To vanegai, kara idauna ta ia vara Rock of Gibraltar dekenai, hari inai negai ita itaia momo lasi gaukara hebou bona lalo-tamona karana ia vara.
Unai Nadi ororo amo kilomita toi dekenai be La Línea taoni, Spain dekenai. Unuseniai, Iehova ena Witness taudia edia Kingdom Hall ta idia haginia dainai, volantia gaukara taudia handred momo idia mai edia nega bona goada idia henia totona. Havaraia Tauna, Iehova Dirava, tomadiho henia totona ruma namona haginia gaukara dainai, Rock of Gibraltar ena toana badana be gau maragina ta bamona, bona ruma haginia gaukara be gau badana.
Unai gabu dekenai Basileia harorolaia taudia be inai ripoti idia siaia:
“Idia ura bada idia gaukara volantia taudia 900 be dabai bona hanuaboi ai idia gaukara, Friday adorahi, September 24, 1993 ai, idia hamatamaia. Sunday hanuaboi, 7 okaloka ai, saini matamata ta idia haginia, ia gwau unai ruma be Kingdom Hall of Jehovah’s Witnesses, bona unai ruma hairaina be nega ginigunana idia gaukaralaia edia hebou ginigunana idia karaia totona.
“Kahirakahira ia noho Gibraltar amo idia mai Witness taudia momo be tano hetoana idia hanaia edia Spain tadikaka idia durudia totona. Volantia gaukara tauna ta, Gibraltar tauna ta, ese ia gwauraia: ‘Aiemai intenesenel tadikaka oreana lalonai, politikol hepapahuahu ai karaia lasi. Lagani haida gunanai, La Línea Witness turadia idia mai, ai idia durua Gibraltar dekenai Kingdom Hall ai haginia totona, unai dainai ai ura edia kara namo ai haloua.’
“Unai Iehova ena Witness taudia edia kongregesen rua bona Andalusia amo idia heduru diba momo gaukara taudia handred momo edia hekwarahi bada dainai, La Línea taoni idia ura unai tano idia henidia. La Línea ena gavamani tau badana be ruma haginia gabuna ai ia mai neganai, unai kara ia gwauraia, ia gwau: ‘Nega gunadia amo, Spain ena taoni gavamani taudia be nega ibounai Katolik dubu haginidia totona tano idia henia. Ma tomadiho haida dekenai unai bamona ai karaia danu be namo, ani? Volantia taudia be sibodia edia ura idia laloa lasi dainai lau hoa bada, bona lau laloa ita durudia be namo. Hari ia parara tanobadana lalonai, taunimanima momo be unai bamona kara idia hahedinaraia be namo.’
“Ia gwau Kingdom Hall be ‘gaukara hebou karana toana ta.’ Momokani, idia hoa bada lasi unai ruma ena sitailo eiava ena bada dainai. To, unai taoni taudia momo idia hoa badina hora 48 lalodiai sibona volantia taudia ese idia haginia!”
Ia hedinarai momokani La Línea bona unai gabu kahirakahira dekenai Iehova ena Witness taudia be Galatia 6:10 ena hereva idia badinaia. Unuseniai aposetolo Paulo ese abidadama tadikaka ia sisiba henidia, ia gwau: “Unai dainai, dala ita davaria neganai, taunimanima ibounai dekenai kara namodia do ita karaia. To Keriso idia abidadama henia taudia do ita durua bada herea be namo.”