“Idia Gini Goada Gibraltar ena Nadi Ororona Bamona”
Gibraltar ena Nadi Ororona be Mediterranean ena gadoka gadoka ranuna lalona amo ia tubu daekau, ena lata be 1,396 feet eiava [426 mita], bona ena toana be ia goada momokani. Medu lasi dinana dekenai Spain ena south kahana dekenai bona Morocco dekena amo, Mediterranean Davara unui kahanai gabuna idia raraia neganai unai ororo ena tubuana idia itaia diba.
Gibraltar ena Nadi Ororona be daudau herea ia noho, idau negai, davara dekenai idia loaloa taudia, idia laloa tanobada be ia palakapalaka, bona idia laloa bema Gibraltar idia hanaia bona ma idia heau lao davara dekenai, tanobada ena dokona do idia davaria bona ia dekena amo do idia moru diho bona idia mase. Danu idia laloa unai ororo be Hercules ena du ta, idia gwau davara unui kahanai, Africa ena kone dekenai, ma du ta ladana Jebel Musa ia gini, Ceuta dekenai. Edia sene sivaraina dekenai idia gwau dirava ta ladana Hercules ese ororo ia hapararaia kahana rua dekenai.
Lagani 700 C.E. murinai, Arab taudia be Africa ena north kahana amo idia mai Gibraltar dekenai bona gabeai, lagani 1160 dekenai, siti ta idia karaia unuseniai. Gibraltar Arab gado ai be Djabal-Tarik, anina be Tarik Ororona. Ṭāriq ibn Ziyād be Arab bese gunalaia tauna ta, bona lagani 711 C.E. ai, Gothic bese ena pavapava ginigabena be tuari dekenai ia hadarerea.
Lagani 1462 ai, tuari murinai Spain be Gibraltar ia biagua, to lagani 1704 ai, tuari murinai England be ia biagua. Unai nega ia mai hari ia be England ena siahu henunai ia noho. To Gibraltar ena Nadi Ororona be mai goada bona noho hanaihanai gauna ta ia laulaulaia.
Gibraltar dekenai Iehova ena Witness taudia 120 bamona, kongregesen rua (England bona Spain gado) dekena amo be Dirava ena Basileia ena helaro idia harorolaia Gibraltar taudia dekenai, unai helaro be ia goada momokani, ena goada be unai Nadi Ororo ena goada ia hanaia momokani!—Tito 1:1, 2; Heberu 6:17-19.