Duahia Taudia Edia Henanadai

“Gima Kohorona” lalonai Daniel ena peroveta herevadia edia stadi sivaraidia ai moalelaidia. To badina be dahaka Apokalupo 11:3 lalonai ia gwauraia nega toi bona kahana ena deit be “Revelation Climax” bukana lalonai idia gwauraia deit amo ia idau?

Oibe, November 1, 1993 ena Gima Kohorona lalonai, Apokalupo 11:3 be hari inai negai ia guguru negana dekenai hereva maragina ta idia haidaua sisina. Badina be dahaka?

Namona be Apokalupo 11:2 ita itaia guna, unai siri dokona ai “hua 42” ia gwauraia. Apo 11 Siri 3 lalonai ia gwau: “Lau ese lauegu uitnesi taudia rua dekenai siahu do lau henia. Vadaeni idia ese puse dabua do idia karaia, bona dina 1,260 lalonai Dirava ena peroveta hereva do idia gwauraia hedinarai.” Unai hereva be edena negai ia guguru?

Nega daudau lalonai, Iehova ena Witness taudia idia diba unai peroveta hereva be lauma ese ia horoa Keristen taudia dekenai ia guguru “idau bese [taudia] edia nega” ia ore murinai, unai be 1914 ai. (Luka 21:24; 2 Korinto 1:​21, 22) Unai ia herevalaia neganai, Revelation​—Its Grand Climax At Hand!a bukana (1988) be rau 164 dekenai ia gwau: “Lagani toi bona kahana lalonai​—lagani 1914 ena dokona ai tanobada ibounai tuarina ginigunana ia matamaia negana amo ia lao lagani 1918 ena matamanai​—Dirava ena orea taudia ese hekwakwanai momo idia davaria. Unai siri lalonai ia perovetalaia gaudia be idia davaria gaudia aukadia danu idia hegeregere.”

Oi itaia, idia gwau unai nega be “tanobada ibounai tuarina ginigunana ia matamaia negana amo ia lao lagani 1918 ena matamanai.” Nega momo unai nega ai gwauraia, hegeregere “Then Is Finished the Mystery of God” bukana, (1969) rau 261-4 lalonai.*

To, Gima Kohorona ese Daniel ena peroveta herevadia ia herevalaidia bada, Apokalupo ena siri ma haida dekenai ia gwauraia negana ta be nega rua unai buka lalonai ia gwauraia​—lagani toi bona kahana, eiava hua 42. Unai nega idia makaia namonamo totona, Daniel 7:25 ia gwau Dirava ena helaga taudia be “nega ta bona nega rua bona nega kahana ta” lalonai hisihisi do idia ania. Gabeai, Daniel 12:7 ese “nega ta bona nega rua bona nega kahana” ia perovetalaia, bona unai nega do ia ore “bese helagana ena siahu idia hadikaia ore murinai.”

Unai dainai Daniel 7:​25, Daniel 12:​7, bona Apokalupo 11:​2, 3 ese idia gwauraia peroveta hereva negana be hegeregere, bona Apokalupo 13:5 danu ese ia gwauraia. Ai halasia buka bona magasin ese idia hahedinaraia unai siri iboudiai idia gurugu negana be 1914 ia lao 1918 neganai. To unai peroveta herevadia sibona sibona ai herevalaidia neganai, idia matamaia bona idia doko negadia idia idau sisina.

To, November 1, 1993 ena Gima Kohorona ia henanadai, ia gwau: “Unai peroveta herevadia be edena dala ai idia guguru?” Oibe, Daniel 7:​25, Daniel 12:​7, bona Apokalupo 11:3 ese nega toi bona kahana peroveta herevana idia gwauraia neganai, idia laloa unai ‘peroveta herevadia be idia hegeregere.’ Unai dainai, edia matamana bona dokona be hegeregere.

Dokona ia herevalaia neganai, unai magasin ese ia hahedinaraia Dirava ena horoa taudia ese hisihisi idia abia negana (Daniel 7:25) be June 1918 ai ia guguru, J. F. Rutherford bona Watch Tower Bible and Tract Society edia dairekta taudia ma haida be “samani koikoi herevadia dainai kota taudia idia gwau . . . dibura rumana ai do idia lao.” Unai ia vara neganai, momokani, Daniel 12:7 ese ia gwauraia hegeregerena, unai be “bese helagana ena siahu idia hadikaia ore.”

June 1918 ai ita matamaia bona ita duahia lou lao December 1914 ai, unai be nega toi bona kahana ia matamaia negana. Unai lagani 1914 ena hua dokona ai, tanobada dekenai Dirava ena horoa taudia be vaira laganina ena siri badana idia kamonai: “ ‘Do Lau inua kapusi amo do umui inua diba, a?’​—Mataio 20:​20-23.” Unai siri ia herevalaia sivaraina ena sisiba be inai: “Ita diba lasi, to reana lagani 1915 lalonai, Mamoe Tauna ena murinai idia raka abidadama taudia be hetoho badana, hisihisi kapusi eiava hemarai bada gauna ta do idia mamia!” Daniel 7:25 ese unai nega toi bona kahana ia perovetalaia hegeregerena, ‘Atai Herea Tauna ena helaga besena dekenai hisihisi ia matamaia bona ia lao noho.’ Tanobada besedia be Tanobada Ibounai Tuarina Ginigunana dekenai idia vareai, bona unai dainai idia be unai taudia idia dagedage henidia be auka lasi. Hereva dokona be inai: Unai peroveta herevadia toi idia hegeregere​—Daniel 7:​25, 12:​7, bona Apokalupo 11:​3​—lagani toi bona kahana, eiava hua 42 lalonai, idia guguru, December 1914 amo ia lao June 1918 dekenai.

Inai hereva ese ia hahedinaraia badina be dahaka Apokalupo 11:3 ia guguru negana ena deit ai hamaoromaoroa sisina. Unai hereva ai hamaoromaoroa dainai, namona be unai ita laloa gabeai Revelation Climax bukana do ita stadilaia bona ita gaukaralaia neganai.

[Footnotes]