Buruka Taudia Dekenai Keristen Lalokau Hahedinaraia

SAMUEL JOHNSON, lagani 1700 ia lao 1799 C.E. neganai toretore tauna ta, ese tauhau ta ena sivarai ia gwauraia; unai tauhau be ena turadia ia vadivadi henidia neganai, ia laloaboio edeseniai iena kwarana gauna ia atoa. Ia laloaboio karana idia herevalaia lasi. Johnson ia gwau: ‘Bema tau buruka ta be unai bamona gauna ta ia laloaboio, taunimanima be do idia herevalaia bada, do idia gwau, “Hari ia be gau momo ia laloaboio.” ’

Johnson ia gwauraia sivaraina ese ia hahedinaraia orea maragidia idia lalodia kerere hegeregerena, taunimanima be buruka taudia idia lalodia kerere danu. Ena be buruka taudia naridia karana be mai ena hekwarahi bada, to buruka taudia bona burukadia idia durudia taudia iboudiai be namo idia davaria. Hekwarahi haida be dahaka, bona idia davaria namo gaudia be dahaka, bona badina be dahaka taunimanima momo dekenai inai kara be mai anina bada?

Namba edia lista ese idia hahedinaraia, tanobada taudia iboudiai amo 6 pesen edia lagani be 65 bona ma haida, bona kohu momo tanodia ai unai lagani idia abia taudia be 12 pesen. European Community tanodia ai, idia gwau lagani 1993 be “Europe Lalonai Buruka Taudia Bona Uru Matamatana Bona Uru Gunana Taudia Idia Lalo-Tamona Laganina.” Unai tanodia ai, taunimanima 3 3 amo 1 1 ena lagani be 50 ia hanaia. Faktori momo tanodia momo dekenai hegeregeredia, idia vara natudia edia namba ia diho bona taunimanima edia mauri laganidia idia lata noho dainai, taunimanima momo idia buruka. Ia hedinarai unai bamona buruka taudia naridia karana be gaukara badana ta momokani. Gunaguna Ist kahana tanodia ai edia kara be idau momokani!

“Diba Momo Taudia”

Handwörterbuch des Biblischen Altertums für gebildete Bibelleser (Idaunegai Baibel Sivaraidia Bukana Lalo-Parara Dekenai Baibel Idia Duahia Taudia Edia) ia hahedinaraia, idaunegai Ist kahana tanodia ai “taunimanima idia laloa buruka taudia be gunaguna negadia amo aonega bona diba bada idia naria taudia, bona unai dainai matamata taudia idia hagoadadia buruka taudia idia bamodia totona bona idia dekena amo diba idia abia.” Smith’s Bible Dictionary ese ia gwauraia hedinarai: “Edia ruma besedia ese [buruka taudia] idia matauraidia bona idia laloa buruka taudia be diba momo taudia . . . [Matamata taudia] idia naria, buruka taudia ese edia hereva idia gwauraia guna totona.”

Buruka taudia matauraidia bada karana be Mose ena Taravatu, Levitiko 19:32 dekenai, ia gwauraia: “Hui kurokuro tauna vairanai oi toreisi, bona tau burukana oi matauraia.” Unai dainai taunimanima ese buruka taudia edia dagi idia matauraidia bona idia laloa unai taudia be idia heduru bada diba. Ia hedinarai Moab hahinena Ruta be iena Israel ravana hahinena, Naomi dekenai, be unai bamona ia laloa.

Ruta ese iena lalona ia hadaia Naomi do ia bamoa, Moab amo ia lao Israel dekenai, unai murinai ia ese Naomi ena sisiba ia kamonai namonamo. Betelehem ai idia ginidae neganai, Naomi ia itaia Iehova ena imana ese gau iboudiai ia naria, bona Naomi ese Ruta ia hadibaia edena bamona ia karaia. (Ruta 2:20; 3:​3, 4, 18) Diba momo hahinena Naomi amo diba ia abia neganai, unai ese Ruta ia durua tiokratik dalana ia badinaia totona. Iena ravana hahinena be ia hamomokania ia be diba momo hahinena.

Unai hegeregerena, hari inai nega lalonai, Keristen hahine matamatadia be kongregesen ena hahine burukadia idia bamodia neganai, namo idia davaria diba. Reana taihu ta ia laloa do ia headava, eiava sibona ena hekwakwanai ta ia hekwarahilaia noho. Bema lo taihu badana ta be unai gau dekenai ia diba momo neganai, unai taihu ena sisiba bona heduru ia tahua be aonega dalana!

Ma danu, elda edia orea taudia be namo idia davaria diba bema edia bogaraginai idia noho buruka taudia edia diba idia tahua. Lot be unai ia karaia lasi dainai ita diba dahaka ia vara. Abraham bona Lot edia animal idia naridia taudia idia hepapahuahu dainai, Abraham bona Lot be dala ta idia abia hidi be namo, badina unai be mai anina idia ibounai dekenai. Lot ese aonega lasi dalana ia abia hidi. Abraham ena sisiba bema ia tahua guna be namo! Bema lo tauna ta ese Lot ia hadibaia namonamo diba, Lot be dala do ia abia hidi haraga lasi, bona iena ruma bese ese dika idia davaria lasi. (Genese 13:​7-13; 14:12; 19:​4, 5, 9, 26, 29) Gau ta dekenai emu lalona oi do hadaia lasi neganai, lo elda taudia edia hereva oi kamonai namonamo guna, a?

Buruka taudia momo idia ura Iehova ena gaukara idia karaia goadagoada noho, Keristen ginigunadia edia negai Simeona bona Ana hegeregeredia. (Luka 2:​25, 36, 37) Bema unai bamona buruka taudia be edia tauanina ena goada hegeregerena ai ita boiridia, ena be idia buruka momokani neganai danu, kongregesen gaukara idia karaia totona neganai, unai be hemataurai karana bona ia hahedinaraia ita lalodia bada. Reana tauhau ta ese heduru ia abia be namo, Haroro School dekenai hereva ta ia hegaegaelaia totona. Reana aonega elda tauna do ia laloa, unai tauhau ia durua diba tauna be kongregesen ena buruka ta, mai ena manau aonega tauna, mai ena hebogahisi, bona mai ena nega tauna ta.

To buruka taudia ita naridia be unai gaudia dekenai sibona lasi. Idia momo be sibodia idia noho dainai idia laloa momo, taravatu utua taudia garina idia gari, bona moni dalanai idia hekwarahi danu. Ma danu, buruka taudia edia tauanina idia manoka neganai, edia hekwakwanai idia bada idia lao idia gorere danu bona idia lalo-metau badina edia goada ia ore noho. Unai neganai nega bada ita henidia be namo. Namona be taunimanima ta ta bona kongregesen be dahaka idia karaia?

“Dirava Do Ita Hamoalea”

Keristen ginigunadia edia nega lalonai, lauma helaga ia rohea dainai Paulo be inai ia torea 1 Timoteo 5:​4, 16 dekenai: “Vabu ta, bema ia be mai ena natuna o mai ena tubuna, idia ese edia sinana bona tubuna idia durua be namo. Badina be Dirava do ita hamoalea karana ta be, iseda ruma taudia do ita laloa bona durua. To bema ekalesia hahine ta iena varavara haida be vabu neganai, ia ese unai vabu do ia naridia. Vadaeni ekalesia orea do ia hametaua lasi. Unai dekena amo ekalesia orea ese vabu korikori do ia naridia diba.” Buruka taudia naridia be edia ruma bese ena maduna. Bema kongregesen ena buruka ta ena ruma bese be idia karaia diba gaudia idia karaia murinai, ma heduru haida ia abia be namo, maduna be kongregesen dekenai ia noho. Unai hahegani idia idau lasi.

Dahaka ese Keristen taudia ia durudia Keristen lalokau be buruka taudia dekenai idia hahedinaraia totona, sibodia edia ruma bese lalonai Dirava badinaia karana idia karaia dainai? Namona be buruka taudia idia durudia momo vadaeni Witness taudia haida edia hereva oi laloa.

Lauma Gaudia Idia Laloa Hanaihanai

Iena adavana ena tama sina idia naridia neganai, Felix ese iena adavana ia durua, bona ia gwau: ‘Dina siri ai herevalaidia hebou be ai ia durua bada gauna. Aiemai mauri lalonai ai davaria gaudia bona ai tahua gaudia ai herevalaidia bona Iehova ena hahegani danu ai herevalaidia.’ Momokani, buruka varavaradia naridia totona hekwakwanai idia davaria neganai, gau badana be lauma dalanai diba idia abia noho dalana ita laloa. Unai be maoro bema Iesu ena hereva Mataio 5:3 (NW) dekenai ita laloa, ia gwau: “Idia diba lauma gaudia do idia tahudia be namo taudia idia moale.” Dina siri sibona lasi, to dina ta ta iboudiai Baibel ita duahia diba, Baibel bukadia bona magasin ita herevalaidia hebou diba, bona ita guriguri diba. Peter ia gwau: “Ia hedinarai buruka taudia be gau ta idia karaia neganai, idia ura hanaihanai ena nega korikori ai do idia karaia.”

Oibe, lauma gaudia be hanaihanai ena nega korikori ai ita karaia be gau badana. Lauma gaudia sibona lasi, to mauri karadia dekenai buruka taudia idia ura hanaihanai ena nega korikori ai gau ta do idia karaia. Ursula ia gwau, mai edia tauanina manoka taudia ita hagoadadia diba “dina ta ta iboudiai bedi amo idia toreisi bona dabua idia atoa namonamo.” Momokani, ita ura lasi buruka taudia ita oda henidia ita biagudia bamona. Doris ia gwau ia ura namo ia havaraia, to madi, nega momo unai ia vara lasi. “Lau be kerere idauidau lau karaia. Dina ta egu tamana lau hamaoroa dina ta ta iboudiai iena dabua gunana ia kokia bona matamatana ta ia atoa. Bena egu sinana ese lau ia hamaoroa: ‘Ia be do lauegu adavana!’ ”

Guna, buruka taudia idia matamata, to matamata taudia be buruka taudia idia hebogahisi henidia bona edia laloa idia diba be mai ena hekwarahi bada. To, unai dala amo edia hekwakwanai dekenai ita durudia diba. Idia buruka idia lao dainai idia lalo-hekwarahi. Gerhard ese ia gwauraia hedinarai: “Egu ravana tau be sibona dekenai ia badu badina ia ura ia karaia gaudia be hari ia karaia diba lasi. Unai ia lalo-pararalaia neganai ia lalohisihisi bada. Iena kara ia idau.”

Edia mauri dalana ia idau neganai, nega momo buruka taudia be ma haida edia kerere idia tahua neganai unai be sibodia edia lalo-hekwarahi idia hahedinaraia, ia idia naria taudia edia kerere idia tahua danu. Unai idia karaia ena badina be ia hedinarai. Lalokau dekenai idia durua bada neganai, sibona ena goada ia ore karana ia laloa. Unai bamona emu kerere ia tahua eiava ia maumau neganai, dahaka oi karaia be namo?

Namona be oi laloatao, ena be ia laloa emu kara be hegeregere lasi to Iehova be unai bamona ia laloa lasi. Ena be nega haida oi dekenai idia hereva kerere, to namona be namo oi hahedinaraia noho, bona emu lalona ena mamina ia goeva noho. (Petero Ginigunana 2:19 itaia.) Oiemu gabu ena kongregesen be idia heduru bada diba.

Kongregesen ese Ia Karaia Diba Gaudia

Iseda lalokau buruka tadikaka bona taihu ese guna idia karaia gaukaradia dainai, kongregesen momo idia moale bada. Reana idia ese kongregesen ena badina idia haginia, lagani momo gunanai pablisa be haida sibona, to idia hagoadaia noho ela bona hari ia bada. Bema guna idia gaukara goadagoada lasi, bona reana, hari bema edia moni amo idia durua noho lasi, kongregesen be edena bamona?

Buruka pablisa ta be heduru bada ia abia be namo neganai, varavara sibodia lasi to ma haida danu ese unai maduna idia huaia diba. Ma haida idia heduru diba daladia be inai: idia totona gau ta idia karaia eiava gau ta idia abia, idia nadunadu, gabu idia hagoevaia, buruka tauna danu idia raka loaloa, motuka amo Keristen heboudia ai idia abidia lao, eiava Kingdom Hall dekenai idia ida idia herevahereva. Iboudiai ese idia karaia diba, bona unai gaukara karaia dalana idia hakaua namonamo neganai, gau iboudiai idia karaia namonamo diba bona namo ia havaraia.

Elda taudia be tadikaka bona taihu durudia totona idia vadivadi henidia dalana idia hegaegaelaia neganai, namona be gaukara hakaua namonamo dalana idia laloa. Kongregesen haida be unai kara dekenai haheitalai namona idia karaia, elda taudia be dala idia karaia, buruka bona tauanina manoka taudia dekenai, hanaihanai idia vadivadi henidia totona, ena be edia ruma bese taudia ese idia naridia namonamo neganai danu. To, ia hedinarai kongregesen ma haida be idau, namona be buruka taudia dekenai edia maduna idia laloa bada be namo.

Lagani 90 kahirakahira ia abia abidadama tadikaka ta ena natuna hahinena mai adavana be Betele idia rakatania, ia idia naria totona. To kongregesen taudia ma haida ese idia vadivadi henia be do mai anina bada ia dekenai. Unai tadikaka be mai lalohisihisi danu ia gwau, ‘Guna lau ese gorere taudia lau vadivadi henidia neganai, idia ida lau guriguri. To lau ida ta ia guriguri lasi.’ Ena be buruka taudia edia varavara be mai lalokau danu idia naridia, to elda taudia be do mai edia maduna ‘Dirava ese idia ia henia mamoe orea do idia naridia namonamo totona.’ (1 Petero 5:2) Ma danu, namona be buruka taudia idia naridia taudia edia lalona idia hagoadaia bona idia hagoadadia edia gaukara namona idia karaia noho totona.

‘Buruka Momokani Bona Ena Mauri Dinadia Idia Momo’

Lagani 1800 ia lao 1899 C.E. lalonai, Germany saiens tauna ta, Alexander von Humboldt, ena lagani be 89 neganai, hahine matamatana ta ese ia nanadaia, ia gwau oi buruka oi lao dainai oi hesiku, eiava. Unai diba momo tauna ia haere, ia gwau: ‘Oi hereva maoro. To unai dala sibona amo ta ia mauri daudau diba.’ Unai hegeregerena, hari inai negai, tadikaka bona taihu momo be haheitalai namona idia karaia badina buruka ena hekwarahi momo idia haheaukalaia noho, mauri daudauna ena namo idia abia totona. Edia lalohadai be Abraham, Isako, David, bona Iobu bamona, idia ‘buruka momokani bona edia mauri dinadia idia momo.’​—Genese 25:8; 35:29; 1 Sisiga 23:1; Iobu 42:17.

Ta ia buruka ia lao neganai, mai ena kara manau ida heduru ia abia dae bona tanikiu hereva ia gwauraia momokani be namo. Aonega dainai namona be ta ta ia diba iena tauanina ena goada be edena bamona. To ita gwau lasi buruka taudia do idia noho kava be namo. Maria ena lagani be 90 ia hanaia, to ia be kongregesen heboudia ai ia do lao noho bona unuseniai haere ia henia. Edena bamona ia karaia diba? “Hari lau duahiduahi diba lasi, to The Watchtower be kaset dekenai lau kamonai. Hereva momo lau laloaboio, to nega momo haere ta lau henia diba.” Maria bamona, bema taunimanima ta be hagoadaia karadia ia karaia noho unai ese ia durua ia gaukara noho totona bona Keristen kara ia karaia noho totona.

Dirava ena Basileia henunai, ta do ia buruka lasi. Unai neganai, inai tanobada ai idia buruka idia lao taudia, bona reana idia mase, be do idia laloatao haida ese idia lalokau henidia bona idia naridia. Unai buruka taudia do idia mauri lou bona edia tauanina do idia goada lou neganai, Iehova, bona hari inai nega lalonai edia hekwakwanai dekenai idia ida idia noho taudia, do idia lalokau henidia bada.​—Luka 22:28 itaia.

Hari inai nega lalonai buruka taudia idia naridia taudia be edena bamona? Kahirakahira, Basileia ese tanobada do ia biagua momokani neganai, inai nega do idia laloatao, bona do idia moale bona do idia hemarai lasi badina edia maduna idia laloaboio lasi, to Dirava badinaia karana idia hahedinaraia badina buruka taudia dekenai Keristen lalokau idia hahedinaraia dainai.​—1 Timoteo 5:4.

[Box on page 30]

Buruka Taudia Do Idia Moale Oi Vadivadi Henidia Neganai

Haroro gaukara murinai, reana miniti 15 lalodiai, oi hegaegae buruka tauna oi vadivadi henia neganai, namo bada ia vara diba. To namo lasi unai vadivadi oi karaia kava, henuna sivarai ese ia hahedinaraia bamona.

Brigitte bona Hannelore idia haroro hebou, bona iduara dekenai buruka tauna ta idia haroro henia. Taihu be miniti ima lalodiai ia ida idia hereva hebou murinai idia davaria ia danu be Iehova ena Witness tauna ta, bona ia be edia kongregesen tauna ta danu. Idia hemarai bada! To idia be gau namona idia havaraia. Hannelore be maoromaoro ia hegaegae unai tadikaka do ia vadivadi henia bona ia durua kongregesen heboudia ai ia lao totona.

Oi haroro ena teritori dekenai, buruka pablisa ta ta iboudiai edia ladana bona address oi diba, a? Vadivadi henia dalana oi hegaegaelaia diba, a? Unai oi karaia neganai, do idia moale bada.