Duahia Taudia Edia Henanadai

Eva bona Adam ese namo bona dika hadibaia auna ena huahua idia ania; unai huahua be apolo eiava?

Ita diba lasi. Taunimanima momo idia laloa Dirava ese ia ‘taravatua huahuana’ be apolo, bona lagani momo lalodiai laulau torea taudia ese apolo laulauna idia torea. To Baibel ese au ena ladana eiava ena huahua ena ladana ia gwauraia lasi. Eva ese ‘uma gabu huanai ia gini auna ena huahua’ mo ia gwauraia.​—Genese 3:3.

“Apolo” herevana Insight on the Scriptures bukana lalonai idia torea be inai:

“Taunimanima be mai edia lalohadai idauidau au ta bona ena huahua dekenai; Heberu gado ai ena ladana idia hatoa tap·puʹach. Unai hereva ese ia hahedinaraia ia be mai ena bonana namona. Unai hereva be hereva ma ta, na·phachʹ, amo ia vara; ena anina be ‘hiriria; laga dae; laga tuna.’ (Gen 2:7; Iobu 31:39; Ier 15:9) M. C. Fisher ese unai be inai bamona ia gwauraia: ‘Unai hereva ena anina be [na·phachʹ] ena anina ida hahegeregerea dalana be ta ese ia tahua matamata neganai, toana be idia hegeregere momokani lasi, to inai hereva rua, “hahodi” bona “bonana halasia,” edia anina be taina hegeregere.’​—Theological Wordbook of the Old Testament, 1980 ai R. L. Harris ese ena hereva ia hegaegaelaia bukana, Vol. 2, rau 586.

“Haida idia gwau ia be apolo lasi; au huahuadia idaudia idia gwauraidia, hegeregere, orenisi, sitron, kwinsi, bona aprikot. . . . To, unai Heberu gado herevana be Arabia gado herevana tuffah bamona. Tuffah ena anina badana be ‘apolo.’ Inai ita laloa be namo: Heberu gado ai, gunaguna gabu rua edia ladadia idia hatodia Tappuah bona Beth-tappuah (reana badina be unuseniai unai au huahuadia be momo), bona Arabia gado ai edia ladadia be unai bamona idia hatodia ema bona hari. (Ios 12:17; 15:​34, 53; 16:8; 17:8) Unai gabu ruaosi be taora ai lasi, to ororo gabudia ai, siahu be bada lasi bona keru be bada lasi gabudia. Bona reana gunaguna siahu bona keru be idau sisina. Hari inai negai apolo audia be Israel ai idia tubu, unai dainai toana be Baibel ese ia gwauraia auna be unai. William Thomson, lagani 1900 vairanai lagani momo lalodiai Syria bona Palestine ai ia noho tauna, ia gwau apolo umadia ia davaridia, Ashkelon, Philistia Taoradia ai.​—The Land and the Book, 1910 ai J. Grande ese ia torea lou bukana, rau 545, 546.

“Solomon ena Ane bukana ese apolo auna (Pyrus malus) be nega hani ia gwauraia; Sulama kekenina ena turana ena lalokau be apolo auna ena ikerukeruna bona ena huahua ena gaiho ida ia hahegeregerea. (Sol 2:​3, 5) Bona ena turana ese ena uduna bonana be apolo ena bonana ida ia hahegeregerea. (Sol 7:8; ma danu 8:5 itaia.) Hereva Lada-isidia (25:11) ia gwau hereva maorona be ‘golo apolodia siliva gauna lalonai’ bamona. Ioel 1:12 danu ese apolo ia gwauraia, siri ma ta be lasi. Ena be taunimanima momo idia gwau Dirava ese Eden ai ia taravatua auna be apolo, to Baibel ese unai ia hamomokania lasi.”​—Insight on the Scriptures, Volume 1, rau 131-2, Watchtower Bible and Tract Society of New York, Inc. ese lagani 1988 ai ia halasia bukana.

This article is unique to PNG.