‘Ena Kara ese Idia Gavaia’

THURSDAY, July 28, 1994 ai, 8:50 daba ai, George D. Gangas ia mase​—ena gaukara tanobada ai ia doko unai. Ena lagani be 98. George Gangas be Dirava ese ia horoa tauna ta, bona October 15, 1971 amo, ia be Iehova ena Witness taudia edia Hakaua Oreana tauna ta.

Tadikaka Gangas idia diba taudia iboudiai idia diba ia ese kara maoromaoro ia ura henia bona kara dika ia inai henia. Idia diba ia ese Satana ia gwauraia koikoi tauna badana, koikoi tauna dika hereana, bona koikoi tauna dika rohorohona. To ia gwau Iehova be Tama lalokauna, ita ia hebogahisi henia bona ia naria Diravana. Momo idia laloatao ia ura bada Baibel ena hereva ia henanadailaidia. Ia be taunimanima ida idia herevahereva negadia iboudiai, henanadai ia henidia​—haida idia haraga, haida idia auka. Oibe, Baibel ena hereva momokani ia ura henia bada.

Tadikaka Gangas be July 15, 1921 ai, bapatiso ia abia. March 1928 ai, ena gaukara korikorina, ful-taim haroro gaukarana (pioneer gaukarana), ia hamatamaia. Anina be lagani 66 lalodiai ful-taim hesiai gaukarana ia karaia. October 31, 1928 ai, ia be Watch Tower Bible and Tract Society ena hedikwota ai ia gaukara matama, Brooklyn ai.

Ena mauri sivaraina be The Watchtower, October 15, 1966 gauna, lalonai idia torea. Ia hahedinaraia ia be Dirava ena tau, lauma abidadama henia tauna ta. Unai magasin lalonai ia gwau: “Mauri lau ura henia bona lau ura egu tadikaka ese mauri do idia abia. Aposetolo Paulo hegeregerena, lau laloa gau iboudiai be ‘anina lasi gaudia, inai mai anina bada gauna do lau abia totona, gauna be inai: Keriso Iesu, lauegu Lohiabada do lau diba momokani.’ ”​—Filipi 3:8.

Tadikaka Gangas ese ena kara amo ia hahedinaraia mauri ia ura henia momokani, bona iena diba Keriso Iesu dekenai be taunimanima ia hamaorolaidia mai ena ura bada ida. Ena be ena bamodia ese do idia lalohisihisilaia, to ita moale, badina be ena davana guba ai ia abia vadaeni! Hari, ‘ia be ena gaukara amo do ia laga-ani, badina be ena kara ese idia gavaia.’​—Apokalupo 14:​13, New International Version.