Duahia Taudia Edia Henanadai
Baibel ese ia gwauraia Filistia taudia be daidia?
Nega momo Baibel ese Kanana dekenai idia noho Filistia taudia ia herevalaia. Dirava ena idaunegai taudia be Gwauhamata Tanona idia abia neganai, idia be unuseniai idia noho. Nega daudau lalonai, idia ese Dirava ena taunimanima idia dagedage henia; Filistia tauna lata herea Goliata bona David edia sivarai ese ia hahedinaraia bamona.—1 Samuel 17:1-3, 23-53.
Baibel ia hahedinaraia idaunegai Filistia taudia be Kaftoro amo idia lao Kanana ena sautwest kahana dekenai. (Ieremia 47:4) Kaftoro be edeseniai? The International Standard Bible Encyclopedia (1979) be inai bamona ia gwau: “Ena be hamomokania gaudia momo lasi idia noho, to diba bada taudia idia laloa Krete motumotu (eiava Krete bona Aegean Motumotudia, badina nega momo taunimanima idia gwauraia tamona) reana be Kaftoro ena noho gabuna.”—Volume 1, page 610.
Unai hegeregerena, New World Translation of the Holy Scriptures lalonai Amos 9:7 ita duahia: “Iehova ia gwau: ‘Israel taudia e, umui be Etiopia taudia hegeregerena lau dekenai, ani? Israel taudia be Aigupito amo lau abia mai, bona Filistia taudia lau abia mai Krete amo, bona Suria taudia lau abia mai Kiri amo, ani?’ ”
Edena nega ai unai davara taudia be Krete dekena amo idia lao Kanana, idia diba lasi. Unai Iopa bona Gasa ihuanai kone kahirakahira gabuna be gabeai idia gwauraia Filistia. Abraham bona Isako edia nega lalonai, unai kone gabuna dekenai Filistia taudia idia noho vadaeni.—Genese 20:1, 2; 21:32-34; 26:1-18.
Ena be Israel taudia be Dirava ese ia gwauhamatalaia tanona idia noholaia daudau vadaeni, to Filistia taudia idia do noho bona edia siahu ia do bada. (Esodo 13:17; Iosua 13:2; Hahemaoro Taudia 1:18, 19; 3:3, 4; 15:9, 10; 1 Samuel 4:1-11; 7:7-14; 13:19-23; 1 Hanua Pavapavadia 16:15) Iuda pavapava Usia ena nega ai, Filistia siti Gata, Iabne, bona Asdod lalodiai Filistia taudia idia do noho. (2 Sisiga 26:6) Edia siti ma haida, Baibel ia gwauraia momo siti, be Ekron, Askelono, bona Gasa.
Alexander Badana ese Filistia siti Gasa ia hadarerea, to gabeai, Filistia taudia edia orea ia ore. Profesa Lawrence E. Stager be Biblical Archaeology Review (May/June 1991) lalonai ia torea, ia gwau: “Filistia taudia danu be Babulono dekenai idia laohaidia. . . . Dahaka ia vara inai Filistia taudia dekenai ita diba lasi badina be sivarai ta ia noho lasi. Nebukadnesara ia hadarerea murinai, Askelono dekenai idia noho Filistia taudia be gabeai idia gwauraia lou lasi. Unai negana amo edia sivarai ia ore.”
Hari idia gwauraia gabuna Palestine ena ladana be Latin bona Greek hereva amo idia abia, bona unai ladana be Heberu hereva idia hahanaia “Filistia” amo idia abia. Arab gado Baibel haida be hereva ta idia gaukaralaia “Filistia taudia” gwauraia totona bona ia be kahirakahira harihari Palestine taudia edia ladana bamona. To, Today’s Arabic Version Baibel be Arab gado herevana idauna ta ia gaukaralaia, unai amo Filistia taudia bona hari idia noho Palestine taudia, edia idau ia hahedinaraia.
[Picture on page 31]
Askelono dekenai ruma gunadia edia nadi
[Picture Credit Line on page 31]
Pictorial Archive (Near Eastern History) Est.