“Inai Bamona Gauna Lau Do Itaia Lasi!”

LAGANI 1993 lalonai, Watch Tower Society ena Argentina brens opesi idia noia, tadikaka 1000 idia abia hidi bona siaia Santiago, Chile ai, Iehova ena Witness taudia edia dina-hani “Dirava Ena Hahediba” Distrik Hebouhebou dekenai. Unai be nega ginigunana Argentina Witness taudia be gabu idauna ta amo unai bamona boiria mai herevana idia abia.a Dahaka ia vara? Revareva 8,500 idia abia bona unai amo do idia lao tadikakadia 1,039 idia abia hidi.

Unai kilomita 1,400 ena laolao, Buenos Aires ia lao Santiago karaia totona, basi 14 idia rentaia. Edia laolao ena hora ibounai 26 lalonai gabu idauidau edia toana namodia idia itaia. Andes Mountains idia hanaia neganai ororo bada hereana ta Aconcagua, ena lata be mita 6,960, idia itaia. Chile dekenai diho dalana be ataiai momokani bona gagevagageva; do idia laloaboio haraga lasi. Unai dala aukana dekenai basi taria taudia be mai edia diba bada ida basi idia taria dainai guia taudia ese idia hanamodia!

To, mai ena hairai bada toana be hebouhebou gabuna dekenai idia itaia. Unuseniai idau gabu o kopina idau inai henia karana ia noho lasi. Tadikaka 80,000, tano idauidau 24 amo idia mai​—momokani idia be tadikaka korikori! Edia lalo-tamona karana idia itaia neganai, basi taria taudia haida idia ura Iehova ena Witness taudia edia orea ia heau dalana idia dibaia. Idia ta ia gwau. “Inai bamona gauna lau do itaia lasi!”

[Footnotes]