Hevarivari ese Dahaka Ia Hahedinaraia?

HEVARIVARI vairanai oi gini. Dahaka oi itaia? Nega haida, emu vairana dekenai, do oi hemarailaia toana dikana ta be hevarivari ai oi itaia bona oi moale haida ese idia do itaia lasi lalonai oi hamaoromaoroa diba.

Baibel be hevarivari bamona. Ita ia durua mai momokani ida ita sibona eda toana do ita laloa, unai amo Dirava matanai iseda namo ena bada laloa bada herea​—eiava laloa maragi herea​—karana do ia koua. (Mataio 10:​29-31; Roma 12:3) Danu, Baibel ese iseda hereva, ita karaia karadia, eiava vaia iseda kara dekenai do ita hamaoromaoroa be namo gaudia ia hahedinaraia. Bema unai ia vara, unai hevarivari ese ia hahedinaraia gauna do oi laloa bada lasi, a?

Baibel torea tauna ta Iamesi ia gwau: “Bema tau ta be hereva ia kamonai sibona, to ia badinaia lasi, ia be sibona ena vairana ena toana hevarivari lalonai ia itaia bamona. Iena vairana ena toana korikori ia itaia, vadaeni ia raka siri, bona maoromaoro iena vairana ena toana ia laloaboio momokani.”​—Iamesi 1:​23, 24.

Iamesi be tau idauna ma ta ia herevalaia, “taravatu namona bona goevagoeva momokani. . . ia itaia namonamo noho, bona ia badinaia noho.” (Iamesi 1:25) Greek herevana idia hahanaia “itaia namonamo,” ena anina be badinai oi igo diho eiava emu tauanina oi hadihoa oi itaia totona. Theological Dictionary of the New Testament ia gwau: “Unai be itaia haraga sibona ia herevalaia lasi.” Unai hereva be hunia gauna ta oi tahua namonamo ia herevalaia. Baibel herevalaia tauna R. V. G. Tasker ia toretore, ia gwau: “Itaia tauna be ia ura mai anina bada gauna ta ia itaia, ena be nega tamona ai ibounai ia itaia bona ena anina ia abia be auka.”

Dirava ena Hereva, hevarivari unai, dekenai emu toana do oi itaia namonamo, bena oi karaia be namo karadia do oi karaia, a? Iamesi be ma ia gwau: “Ia kamonai kava lasi, to ia karaia momokani neganai, unai tau be namo.”​—Iamesi 1:25.