Badinaia Karana Goadalaia Dalana
“Mauri matamata do umui atoa, dabua matamata umui atoa bamona. Inai mauri matamata dainai, emui toana be Dirava ena toana bamona, ia ese ia karaia gauna. Inai mauri matamata ena kara be maoromaoro, helaga bona momokani.”—EFESO 4:24.
BADINAIA karana be mai ena toana idauidau. Iehova Dirava ita badinaia be gau badana. Momokani, Iehova ena dagi bona ita totona ia karaia karadia dainai, bona ita gwauhamata henia vadaeni dainai, namona be ita badinaia. Edena dala amo ita hahedinaraia Iehova Dirava ita badinaia? Dalana badana be Iehova ena taravatu maoromaorodia ita badinaia.
2 Unai do ita karaia totona, namona be inai hereva 1 Petero 1:15, 16 ai ita badinaia: “To emui kara ibounai lalonai do umui helaga, umui ia boiria Diravana ese ia helaga hegeregerena. Badina be Buka Helaga lalonai Dirava sibona ia gwau, ‘Do umui helaga, badina lau be lau helaga noho.’ ” Iehova Dirava ita badinaia, anina be nega ibounai iena hereva do ita kamonai henia, bona iena ura helagana hegeregerena ita laloa, ita hereva, bona ita kara. Anina be iseda lalona ita naria, do idia goeva noho totona, 1 Timoteo 1:3-5 ena hahegani hegeregerena: “Lauegu oda [hadibaia hereva koikoi hadibaia lasi bona gori kamonai henidia lasi odana] ena anina korikori be, lau ura lalokau do ia vara, laloa goevagoeva, laloa maoromaoro bona abidadama korikori dekena amo.” Momokani, ita ibounai ita goevadae lasi, to namona be iseda diba hegeregerena ita hekwarahi unai bamona do ita karaia namonamo totona, ani?
3 Bema Iehova ita badinaia, iena taravatu maoromaorodia do ita utua lasi, siboda eda ura tahua totona. Salamo torea tauna ese Dirava badinaia karana ia laloa neganai, inai ane ia abia: “Lohiabada e, oiemu dala lau dekenai do oi hadibaia, bona lau be oiemu momokani lalonai do lau raka. Lauegu lalona do oi hatamonaia momokani, vadaeni lau ese oiemu ladana do lau matauraia bona gari henia.” (Salamo 86:11) Badinaia karana be ta ese inai bamona ia gwauraia: “Taunimanima ese ita idia fosia diba lasi do ita badinadia totona taravatudia, be do ita badinadia.”
4 Bema Iehova Dirava ita badinaia, iena ladana bona ena Basileia ena ladana hadikaia karana ta do ita karaia lasi. Hegeregere, nega ta ai Keristani taudia rua be gau ta idia hepapahuahulaia dainai, idia lao kota. Kota biaguna ia henanadai, ia gwau, ‘Umui ruaosi be Iehova ena Witness taudia, a?’ Toana be ia daradara, badina be idia lao kota dainai. Iehova ena ladana idia hadikaia unai! Bema unai tadikaka ruaosi ese Iehova Dirava idia badinaia, aposetolo Paulo ena sisiba idia badinaia, ia gwau: “Oibe, umui emui Keristani varavara tauna inai bamona umui kota henia ena anina korikori be inai: Emui Keristani mauri ia moru momokani. Haida ese umui idia hadikaia neganai, o emui gau idia henaoa neganai, umui haheauka diba lasi, a? Hisihisi umui ania diba lasi, a?” (1 Korinto 6:7) Momokani, Iehova Dirava badinaia dalana be, siboda eda gau ita haboioa, Iehova ena ladana bona iena orea ena do ita hadikaia garina.
5 Iehova Dirava ita badinaia ena anina ma ta be, taunimanima ita gari henia lasi. “Taunimanima do oi gari henia neganai, dika do oi davaria, tarapu lalonai oi moru bamona. To bema Lohiabada oi abidadama henia neganai, mauri do oi davaria noho.” (Aonega Herevadia 29:25) Unai hegeregerena, dagedage ia vara neganai Dirava badinaia karana ita negea lasi, to Iehova ena Witness taudia be guna idia gwauraia Soviet Union tanodia ai, Malawi ai, Ethiopia ai, bona ma tano momo ai idia kara hegeregerena do ita kara.
6 Bema Iehova Dirava ita badinaia, iena inai taudia do ita tura henidia lasi. Unai dainai hahediba tauna Iamesi ia gwau: “Umui be headava kara ena taravatu umui makohia noho taudia bamona. Umui diba lasi, a, bema umui ura tanobada danu umui turana karaia neganai, inai be umui ese Dirava umui tuari henia noho?” (Iamesi 4:4) Namona be ita ura Dirava ita badinaia, King Davida ese ia badinaia hegeregerena, ia gwau: “Lohiabada e, oi dekenai idia badu noho taudia, be lau ese lau badu henidia noho! Oi dekenai idia dagedage henia taudia be lau ura henidia lasi. Lau ese lau badu henidia momokani, bona lau laloa idia be lau idia tuari henia taudia bamona.” (Salamo 139:21, 22) Ita ura lasi mai edia ura ida idia kara dika taudia ita tura henidia, badina be idia bona ita be gau ta ita lalo-tamonalaia lasi. Bema Dirava ita badinaia, unai bamona taudia, Iehova ena inai taudia, do ita tura henidia lasi, tauanina dalana ai eiava TV raraia karana amo, ani?
Iehova Ena Namo Gwauraia Hedinarai
7 Bema Iehova Dirava ita badinaia, do ita ura iena namo do ita gwauraia hedinarai. Elihu be haheitalai namona unai kara dekenai! Iobu 32:2, 3 ia gwau: “Elihu . . . ia badu. Ia ese Iobu ia badu henia, badina be ia sibona maoromaoro ia gwauraia, to ia ese Dirava be maoromaoro ia gwauraia lasi. Elihu ese danu Iobu ena turana toiosi dekenai ia badu, badina idia gwau Iobu be kerere, to ia dekenai idia haere henia dalana idia diba lasi.” Iobu karoa 32 ela bona 37 lalonai, Elihu ese Iehova ena namo ia gwauraia hedinarai. Hegeregere, ia gwau: “Iobu e, nega sisina ma lau dekenai do oi naria, bona oi do lau hadibaia, badina be Dirava ena ladana dekenai lau hereva noho. . . . Lau ese lau ia karaia Dirava ena kara maoromaoro, do lau gwauraia hedinarai. . . . Dirava ese kara maoromaoro taudia ia gimaia noho.”—Iobu 36:2-7.
8 Badina be dahaka Iehova ena namo ita gwauraia hedinarai be namo? Hari inai neganai, taunimanima be dala idauidau amo iseda Dirava Iehova ena ladana idia hadikaia. Idia gwau ia noho lasi, ia be Dirava Toi Tamona ena kahana ta, hel lahina lalonai taunimanima ia hahisidia ela bona hanaihanai, tanobada taudia ia veridia toho edia kara idia haidaua totona, to unai ia goadalaia lasi, taunimanima ia lalodia lasi, bona unai bamona herevadia ma haida danu. Inai dala amo ita hahedinaraia Iehova Dirava ita badinaia: Ena namo ita gwauraia hedinarai bona ita hamomokania ia noho; ma ita hamomokania ia be aonega, hahemaoro maoromaoro, siahu ibounai, bona lalokau Diravana; nega ia gwauraidia hidi, gau iboudiai karaia totona; bona nega korikori do ia ginidae neganai, dika ibounai do ia haorea bona tanobada ibounai be paradaiso ai do ia halaoa. (Hadibaia Tauna 3:1) Unai dainai, dala ita davaria negadia iboudiai, Iehova ena ladana bona ena Basileia ita gwauraia hedinarai be namo.
Iehova Ena Orea Badinaia Karana
9 Iehova ena tanobada oreana badinaia karana mani ita laloa. Momokani, iena orea ita badinaia be maoro, ia lalonai be ‘hesiai tauna mai ena kamonai bona mai ena kara maoromaoro,’ ia amo Keristani ekalesiana be lauma dalanai ia ubua oreana. (Mataio 24:45-47) Bema Watch Tower bukadia o magasinidia lalonai idia torea herevana ta ita lalo-pararalaia lasi eiava ita abia dae lasi, dahaka do ita karaia? Do ita badu bona orea do ita rakatania, a? Lagani momo idia lao vadaeni, Gima Kohorona ta ia gwau, gwauhamata matamatana ena anina be Lagani 1,000 Negana lalonai do ia vara. Unai bamona ia hereva neganai haida idia badu bona orea idia rakatania. Haida idia badu, Gima Kohorona ta ese gini siri karana ia gwauraia herevana ta dainai. Unai hereva dainai idia hekwakwanai taudia be orea bona edia tadikaka bema idia badinaia, do idia naria ela bona Iehova ese unai hereva ia hamaoromaoroa; ena nega korikori ai unai bamona ia karaia. Unai dainai, Dirava ena orea ita badinaia anina be ita naria mai eda haheauka ida ela bona hesiai tauna mai ena kamonai bona mai ena kara maoromaoro ese hereva ma haida do ia halasia.
10 Iehova ena orea tanobada ai ita badinaia anina ma ta be hereva momokani idia negea taudia ita dadaraia vaitani. Dirava ena orea idia badinaia Keristani taudia ese unai bamona taudia edia hereva do idia tahua lasi. Momokani, Iehova Dirava ese ena gaukara tanobada ai do idia biagua totona ia gaukaralaia taudia be idia goevadae lasi. To Dirava ena Hereva ese ita be dahaka ia hamaoroa? Ia gwau Dirava ena orea do ita rakatania, a? Lasi. Bema iseda tadikaka ita lalokau henidia, iena orea do ita badinaia noho, bona ‘ta ta do ita lalokau henia, mai eda lalona ibounai’ ida.—1 Petero 1:22.
Iehova Ena Orea Idia Badinaia Elda Taudia Oi Badinadia
11 Kongregesen lalonai ta ena hereva eiava ena kara ta bema ita daradaralaia, orea ita badinaia dainai unai tadikaka ena lalohadai o ena ura do ita gwauraia dika lasi, to do ita laloa unai be ia sibona ena gau. Elda taudia bona iseda orea taudia oredia edia kara namo ita laloa loulou be namo, to edia manoka ita laloa loulou be dika, ani? Oibe, namona be ita naria namonamo, haida do ita lalo-dika henidia garina, badina be unai bamona karana be orea badinaia lasi karana hegeregerena! Orea badinaia karana ese ita do ia durua, Paulo ena sisiba do ita badinaia totona, ia gwau: ‘Umui ese tau ta do umui gwauraia dika lasi.’—Tito 3:1, 2.
12 Badinaia karana ai, elda taudia be mai edia maduna idaudia. Ta be hereva hehunidia gwauraia hedinarai lasi karana. Reana kongregesen tauna ta ese gau ta be elda tauna ta ia hamaorolaia. Bema elda tauna ese unai tadikaka ia badinaia, ia hamaorolaia herevana be do ia gwauraia hedinarai lasi. Aonega Herevadia 25:9 ena sisiba do ia badinaia: “Tau ta dekenai, oiemu badibadinai tauna ena hunia hereva do oi hamaoroa lasi.” Anina be sibona ena adavana danu do ia hamaoroa lasi!
13 Elda taudia ese Dirava ena orea badinaia karana ai hetoho ma haida idia davaria. Taunimanima hamoaledia taudia ai do idia lao a, eiava sisiba idia abia be namo taudia be do idia sisiba henidia mai edia manau bona mai edia boga auka ida, herevana idia be edia varavara korikoridia eiava edia turadia? Elda taudia be Iehova ena orea idia badinaia dainai, lauma dalanai heduru idia abia be namo taudia do idia durua toho. (Galatia 6:1, 2) Elda taudia do idia kara namo heheni, to bema idia ta be sisiba ia abia be namo, namona be Dirava ena orea badinaia karana dainai ena bamona ese unai sisiba do idia henia, Paulo ese aposetolo Petero ia sisiba henia hegeregerena. (Galatia 2:11-14) To namona be elda taudia idia naria namonamo, aonega lasi dalanai do idia kara, eiava tadikaka be maka idauidau amo idia kara henidia, eiava dala idauna ta ai edia siahu idia gaukaralaia kerere, bena idia naria taudia ese Dirava ena orea do idia badinaia be auka garina.—Filipi 4:5.
14 Kongregesen bona ena elda taudia be dala ma haida ai ita badinaia be namo. Bema kongregesen lalonai hekwakwanai haida idia vara, unai neganai ita hahedinaraia diba Iehova bona ena ladana ai idia gaukara taudia ita badinaia. (The Watchtower, June 15, 1987 gauna, rau 15-17 itaia.) Elda taudia ese ta be orea murimurinai idia atoa neganai, kongregesen ita badinaia dainai edia kara ita maumauraia lasi, to ita abia dae.
15 Kongregesen ita badinaia ena anina ma ta be, pura ta ta iboudiai kongregesen heboudia imaosi ita lao henidia, eda noho bona eda goada hegeregerena. Anina ma ta be, ita lao henidia loulou sibona lasi, to idia totona ita hegaegae bona dala ia hekeho negadiai hagoadaia herevadia ita gwauraia danu.—Heberu 10:24, 25.
Adavana Badinaia Karana
16 Daika danu ita badinaia be maoro? Bema ita be headava taudia, namona be eda headava gwauhamatana hegeregerena, eda adavana ita badinadia. Bema eda adavana ita badinadia, do ita kara namo henidia bada, tatau o hahine idaudia do ita kara namo henidia bada lasi. Eda adavana ita badinadia, anina ma ta be edia kerere o edia manoka be ma haida ita hamaorolaia lasi. Iseda adavana be ma haida dekenai ita maumauraidia be haraga, idia ida ita herevahereva hebou dalana ita naria namonamo be auka, to Iesu ena hahegani hereadaena hegeregerena unai bamona ita kara be namo. (Mataio 7:12) Momokani, headava ese ita ia tohoa, Keristani dalanai iseda adavana do ita badinadia eiava.
17 Iseda adavana do ita badinadia totona, namona be ita naria namonamo, kara dika rohorohona do ita karaia garina, bona namona be eda lalohadai bona eda lalona ena mamina ita naria namonamo danu. (Salamo 19:14) Hegeregere, bema iseda lalona mai koikoidia ese moale idia ura henia dikadika, mai eda moale ida ita raraia tauna o hahinena ita gahusia be haraga. King Solomona ese tatau ia sisiba henidia, ia gwau: “Oiemu adavana korikori dekenai do oi kara momokani, bona ia sibona do oi ura henia.” (Aonega Herevadia 5:15) Bona Iesu ia gwau: “Tau ta ese hahine ta do ia itaia noho matana dekenai, ela bona iena lalona dekenai do ia ura dikadika, iena kudouna dekenai unai tau be ia heudahanai vadaeni.” (Mataio 5:28) Matabodaga sivaraidia idia duahia o matabodaga laulaudia idia raraia tataudia be unai sivarai o laulau ese idia ha-uradia diba do idia heudahanai totona, unai amo edia adavadia idia koia bona idia badinaia lasi. Unai hegeregerena, bema hahine ta ese TV ena anina lasi dramadia, taunimanima edia heudahanai sivaraidia idia hahedinaraia gaudia, ia raraia momo, idia ha-uraia diba do ia heudahanai bona ena adavana do ia badinaia lasi. To, bema iseda adavana ita badinadia momokani, eda headava varona ita ha-aukaia, bona Iehova Dirava hamoalea karana ai ita heduru heheni.
Ita Idia Durua Gaudia
18 Dahaka ese ita do ia durua, Iehova bona ena orea bona kongregesen bona eda adavana do ita badinaia totona? Heduru gauna ta be inai: Ita diba badinadia karana be mai anina, Iehova ena lohia siahuna hamomokania karana ai. Oibe, Iehova badinaia karana amo ita hahedinaraia ita laloa ia be guba bona tanobada edia Pavapava Badana. Unai dainai ia vairanai ita hemarai lasi bona mauri hanaihanai Iena tanobada matamatana ai ita naria diba. Iehova ena kara, ia idia badinaia taudia ia rakatania lasi o negea lasi karana, bema ita laloa, bona taunimanima ese Iehova bona ma haida idia badinaia karadia sivaraidia, Baibel bona Watch Tower bukadia bona magasinidia, bona Yearbook danu, lalodiai idia noho sivaraidia namodia, bema ita laloa, unai ese ita do ia durua, Iehova bona ma haida do ita badinaia totona.
19 Bema Iehova Dirava ita abidadama henia goada bona ena lalona do ita hahisia garina ita gari, unai ese ita do ia durua, ia do ita badinaia totona. Dirava ena Hereva stadilaia goadagoada karana amo bona Keristani haroro gaukarana karaia karana amo, Iehova ita abidadama henia karana bona ita gari henia karana ita hagoadaia. Unai ese ita do ia durua, Paulo ena sisiba hegeregerena do ita kara totona; Efeso 4:23, 24 ai ia gwau: “Umui emui laloa bona emui kudouna do umui hamatamataia, be gau badana. Mauri matamata do umui atoa, dabua matamata umui atoa bamona. Inai mauri matamata dainai, emui toana be Dirava ena toana bamona, ia ese ia karaia gauna. Inai mauri matamata ena kara be maoromaoro, helaga bona momokani.”
20 Iehova ena kara bema ita lalodia bada, unai ese ita do ia durua ia do ita badinaia totona. Unai ia hereaia karana be, iseda Tamana guba ai ese ita dainai ia karaia karadia bema ita lalodia bada bona ia ita lalokau henia mai eda lalona ibounai, mai eda mauri ibounai, mai eda darana ibounai, bona mai eda goada ibounai, unai ese ita do ia durua, ia do ita badinaia totona. Inai danu, Iesu ia gwau iseda lalokau dainai taunimanima do idia diba ita be iena orea taudia—unai lalokau ese ita do ia durua, Keristani taudia iboudiai kongregesen lalonai bona iseda ruma bese lalonai do ita badinadia totona. Bema ita badinadia lasi, anina be siboda eda ura ita tahua. Bema ita badinadia, anina be siboda eda ura ita tahua lasi.—Mareko 12:30, 31; Ioane 13:34, 35.
21 Inai hereva ibounai ena anina be inai: Iehova Dirava ese ena hesiai taudia korikoridia ia rakatania lasi, bona Iesu Keriso bona idia iboudiai ese Iehova idia badinaia. Iehova Dirava do ita tura henia namonamo totona, namona be ita badinaia, iena taravatu maoromaorodia ita badinaia, iena inai taudia ita dadaraia vaitani, bona iseda haroro gaukarana ai, ruma ta ruma ta ai bona gabu idaudia ai, Iehova ena namo ita gwauraia hedinarai. Namona be Iehova ena orea tanobada ai ita badinaia. Namona be iseda kongregesen bona eda adavana ita badinaia. Bema Dirava bona ma haida ita badinaia goevagoeva, unai amo Iehova ena lohia siahuna hamomokania karana ita durua, bona ita hahedinaraia ita be iena kahana ai ita gini. Unai dainai, ita do ia lalo-namo henia, bona ita ese davana namona, mauri hanaihanai, do ita abia. Aposetolo Paulo ese Dirava badinaia karana ia herevalaia. Ia be mai ena namo inai mauri lalonai bona mauri gabena lalonai danu.—Salamo 18:25; 1 Timoteo 4:8.
Edena Bamona Do Oi Haere?
◻ Edena dala amo ita hahedinaraia diba Dirava ita badinaia?
◻ Iehova ena orea ita badinaia, anina be dahaka ita karaia?
◻ Elda taudia ese Dirava bona ena orea badinaia karana be edena bamona idia kwalimulaia diba?
◻ Headava Keristani taudia ese edia adavadia idia badinaia karana be dahaka ese ia tohoa?
◻ Edena kara ese ita do idia durua, Iehova bona ita badinaia be maoro taudia iboudiai do ita badinaia totona?
[Study Questions]
1. Badina be dahaka Iehova Dirava ita badinaia be maoro?
2, 3. Kara maoromaoro dekenai Dirava badinaia karana ena anina be dahaka?
4, 5. Bema Dirava ita badinaia, do ita naria namonamo dahaka do ita karaia garina?
6. Bema Dirava ita badinaia, daidia do ita bamoa lasi?
7. Bema Iehova ita badinaia, ia dainai dahaka do ita karaia, Elihu ese ia karaia hegeregerena?
8. Badina be dahaka Iehova ena namo ita gwauraia hedinarai be namo?
9. Dahaka hereva dainai haida ese Dirava ena orea idia badinaia noho lasi?
10. Bema Iehova ena orea ita badinaia, daidia edia hereva do ita tahua lasi?
11. Bema elda taudia ita badinaia, dahaka do ita laloa loulou lasi?
12, 13. Elda taudia ese dahaka dahaka idia hekwarahilaia?
14, 15. Kongregesen taudia ese Iehova bona ena orea idia badinaia karana be dahaka dahaka ese idia tohoa reana?
16, 17. Headava Keristani taudia ese edia adavadia idia badinaia karana be dahaka dahaka ese idia tohoa?
18. Namona be dahaka ita diba, bena unai ese ita do ia durua Iehova bona ma haida do ita badinaia totona?
19. Dirava ita badinaia karana dekenai abidadama ena anina be dahaka?
20. Dahaka kara badana ese ita do ia durua, Iehova bona ita badinaia be maoro taudia ma iboudiai do ita badinaia totona?
21. Iehova bona ma haida ita badinaia karana ena anina be edena bamona ita gwauraia diba?
[Picture on page 17]
Bema elda taudia ese kongregesen taudia idia badinaia, hereva hehunidia do idia gwauraia hedinarai lasi
[Pictures on page 18]
Bema ta ese ena adavana ia badinaia, unai ese edia headava varona ia ha-aukaia