Greece Lalonai Haroro Gaukarana ai Idia Kwalimu

GREECE dekenai, nega daudau lalonai taunimanima ese Iehova ena Witness taudia idia inai henidia. Pulisi taudia haida, kota taudia haida, bona gavamani taudia haida ese Witness taudia idia dagedage henidia, bona nega momo unai bamona idia karaia badina be Greek Otodoks tomadihona ena pris taudia ese idia doridia dainai. Nega haida idia gwau unai idia karaia badina be Greece ena gavamani ese ta ena tomadiho haidaua toho karana ia taravatua dainai, bona nega haida idia gwau badina be Witness taudia ese Baibel ena hereva dainai idia tuari lasi bona rara idia dadaraia dainai.​—⁠Isaia 2:​2-5; Kara 15:28, 29.

Siahu taudia mai edia lalo-momokani Greece lalonai ese Witness taudia edia kara do idia lalo-pararalaia namonamo totona, Witness taudia 200, Greece ena gavamani ese ia gwauraia tomadiho ena haroro taudia, bona Witness taudia ma haida, loea taudia unai, ese unai tano ibounai lalonai buklet ta ladana Jehovah’s Witnesses in Greece, bona buka ta ladana Jehovah’s Witnesses​—Proclaimers of God’s Kingdom, idia hariharilaia. Pepapepa haida idia hariharilaia danu; unai pepapepa ese idia hahedinaraia Iehova ena Witness taudia dagedage henidia karana be mai ena badina maorona lasi gavamani ena taravatu ai. Witness taudia be pulisi biagudia, kaunsolo gunalaia taudia, bona kota taudia idia vadivadi henidia.

Dahaka ia vara? Sivarai namodia momo herea. Inai sivarai haida mani oi laloa.

Macedonia ena west kahana ena pulisi steiseni ta ena biaguna ese tadikaka ia abidia dae, bona ia gwau: “Nega daudau lalonai umui lau diba, . . . bona emui kara maoromaoro lau laloa bada. . . . Ta ena tomadiho haidaua toho karana idia taravatua taravatuna lau abia dae lasi, bona bema lau be mai egu siahu, unai taravatu do lau haorea.”

Siti momo ai, pulisi steiseni idauidau edia biagudia be inai bamona idia hereva: “Umui lau hanamoa, badina be taunimanima durudia gaukarana umui karaia dainai.” “Emui orea ese pulisi taudia ia hahekwarahia lasi; taunimanima durudia gaukarana umui karaia.” “Umui dainai ai hekwarahi lasi, lasi vaitani. Umui ai matauraia bona ai laloa bada.”

Piraeus ai, sekuriti pulisi oreana tauna badana ta be mai ena mata ranuna ida tadikaka ia hamaorodia, ia diba Iesu Keriso ladana ai Iehova Dirava ia guriguri henia be maoro. Witness taudia ese ena hereva ma ta idia hoalaia; ia gwau ia diba idia diba Aramagedono be do lasi neganai haida ese do idia dagedage henidia, bona ena ura be unai do ia vara neganai Dirava ese ia do ia gaukaralaia, do ia durudia totona! Tadikaka ese idia hamaoroa idia ura ia ida do idia herevahereva lou, bona ia hamaorodia ena lalona be hegeregere.

Gavamani Taudia Edia Hereva

Thessaly ai, kaunsolo gunalaia tauna ta ese Proclaimers bukana be inai bamona ia gwauraia: “Siti ena laiberi lalonai do ai atoa be maoro​—⁠do ia hedinarai goevagoeva gabuna ai!” Bena buka haida be pata ta amo ia kokidia bena Proclaimers bukana be edia gabu ai ia atoa, taunimanima ese ena kopina do idia itaia totona.

Greece ena not kahana ai, kaunsolo gunalaia tauna ta ese tadikaka ia abidia dae mai ena gado namo ida, ia gwau: “Umui be taunimanima namodia bona lau moale bada, egu taoni ai umui noho dainai.” Euboea ena not kahana ai, kaunsolo gunalaia tauna mai ena hebogahisi ese tadikaka ia hamaorodia, ia gwau: “Guna lau be tuari biaguna ta. To umui​—⁠lau hanamoa bada.” Witness taudia ese idia gwauraia herevadia ia abia dae mai ena moale ida. Watch Tower Society ese ia halasia bukadia haida be idia hahedinarai henia neganai, ia gwau: “Bema lau gwauhamata iboudiai do lau duahia, do umui henia lau, a? Idia gwau: “Oibe​—⁠idia be oiemu!” Ia moale bada bona ia ura lasi tadikaka ese do idia rakatania.

Attica ena kahana ta ai, kaunsolo gunalaia tauna ta ese tadikaka idia henia toho bukadia ia abia dae mai ena moale ida, bona ia noidia Society ena buka bona magasin do idia mailaidia loulou. Idia rakatania gwauraia neganai, ia hamaorodia, ia gwau: “Taunimanima be politikol taudia dainai idia lalohisihisi, bona hereva momokani be gabu idauna ta amo idia tahua. Lau laloa inai nega amo do umui bisi bada herea, badina be hereva momokani be umui dekenai ia noho.”

Kota Taudia Edia Hereva

Greece ena not kahana ai tadikaka ese kota tauna ta idia vadivadi henia murinai; idia gwau: “Emai buka, magasin, bona hereva ia moalelaia, bona iseda orea taudia be rara dainai idia hekwarahi negadiai ita henidia heduruna ia laloa bada. Dokonai, ai ia tanikiu henia bona ai ia hanamoa badina be ai vadivadi henia bona ai hadibaia dainai. Gabeai, ai davaria lagani hani idia lao vadaeni ia ese pulisi taudia ia boiria bona ia haganidia, haroro gaukarana idia karaia tadikakadia rua do idia dogoatao.”

Athens ai, Witness taudia rua, idia be loea taudia danu, be kota taudia haida edia opesi dekenai idia lao neganai idia hoa, badina be kota tauna burukana ta mai ladana bada, taunimanima momo ese idia matauraia tauna, be idia dekenai ia raka mai. Ia hakaudia siri bena ia hamaorodia, ta ena tomadiho haidaua toho karana koua taravatuna be mai ena badina lasi bona Greece ena kota ai unai taravatu ese heiriheiri ia havaraia. Ia tanikiu henidia bona edia imadia ia udeudea mai ena momokani ida.

Greece ena not kahanai, kota tauna ta ese tadikaka ia gado namo henidia bona edia buka bona magasin ia abia dae. Buka ta ladana Memero Kekeni Edia Henanadai​—⁠Haere Maorodia ia kehoa bona ena anina ia itaia neganai, buka ese ia herevalaia gaudia idauidau ia hoalaia. Ia gwau: “Inai buka ese ia herevalaia gaudia be Otodoks tomadihona lalonai lau itaia lasi.”

Boeotia ai, kota tauna ta ia gwau, guna, ena be Witness taudia be rara idia ura lasi, to ia ese kota oda ia henia, doketa taudia ese rara do idia henidia. To tadikaka be ia ida unai gau idia herevaherevalaia murinai, ia gwau: “Gabeai, unai bamona oda do lau henia lou lasi!” Ia gwau Iehova ena Witness taudia edia Hospital Liaison Committee ida do idia herevahereva guna, rara ena gabu ai do idia gaukaralaia diba ranudia iboudiai do idia dibaia totona. Memero Kekeni Edia Henanadai bukana ia abia dae mai ena moale ida.

Laiberi Naria Taudia Edia Hereva

Buka bona magasin be laiberi naria taudia momo idia henidia. Athens ai, laiberi naria tauna ta mai ena hemataurai ese buka bona magasin ia abia dae, bona ia gwau: “Umui ese emui buka umui mailaidia be namo, badina be emai laiberi ai idia noho bukadia momo ese umui idia gwauraia dika. . . . Pris tauna ta be laiberi ai emui buka ia itaia neganai ia badu dikadika. . . . Ia namo. Taunimanima ese lalohadai iboudiai idia diba be namo.”

Crete ena laiberi ta ai, gavamani tauna ta, guna ami ena kamepa ta ai Iehova ena Witness taudia ia dibaia tauna, ese tadikaka ia hamaorodia, Witness taudia be tuari ai idia vareai lasi karana be ia laloa bada. Sibona ena lalona ai ia henanadai loulou, ‘Badina be dahaka inai taunimanima ese hisihisi idia ania?’ Tadikaka ese idia henia bukadia ia abia dae bona unai negai idia karaia gaukarana be inai bamona ia gwauraia: “Umui be gaukara namo hereana umui karaia, bona lagani momo idia lao vadaeni bema umui karaia unai be namo. . . . Greece lalonai lalo-dika be bada.” Ia ese tadikaka ia noidia, nega daudau lasi murinai do idia vadivadi henia lou.

Unai gaukara idauna karaia negana lalonai, tadikaka ese idia hariharilaia gaudia be inai: Proclaimers bukadia 1,000, Jehovah’s Witnesses in Greece buklet 1,600, bona buka idaudia bona magasin handred handred danu. Unai ia hereaia karana be Greece ena dagi bada taudia ida idia herevahereva. Iehova ena hesiai taudia mai edia kamonai Greece lalonai bona tanobada hegegemadai lalonai edia helaro be Greece ena siahu taudia mai edia lalo-momokani ese Iehova ena Witness taudia be maka tamona amo do idia lalodia.