“Unai be Iehova Ena Gaukara”

Unai hereva be Mexico ena siti ta, Monterrey, ena niuspepa ladana El Norte ena sivarai ta ena hereva kwarana. Unai sivarai be Iehova ena Witness taudia edia Assembly Hall matamatana ta ia herevalaia.

Monterrey be siti ta Mexico ena not kahana ai; ena taunimanima ibounai be 2,300,000 (unai be siti murimurinai idia noho taudia danu), bona unuseniai Basileia harorolaia taudia be 19,200. Witness taudia be lagani ta mai kahana ta lalonai idia gaukara hebou, Assembly Hall namona bona hairaina ta mai ena helai gaudia 3,000 bona mai ena hodahoda haparakaia gauna idia haginia totona. Hakaua Oreana tauna ta ese Hall hahelagaia herevana ia henia neganai, unai gabu ena Witness taudia idia moale bada. Program lalonai be guna Monterrey ai gaukara idia hamatamaia ena sivarai idia kikilaia, bona unai ruma idia haginia taudia idia henanadai henidia. Bena unai murinai, idia hebou taudia 4,500 ese Hall hahelagaia herevana idia kamonai mai moale ida.

Unai be vanegai sibona Mexico ai idia haginia Assembly Hall ihatoina; haida ese unai gaukara idia gwauraia, “Kingdom Hall Bona Assembly Hall Badadia Bona Namodia Ma Haida” karaia gaukarana.

Mexico ai pablisa edia namba be 443,000 ia hanaia, bona 1995 ena Memorial ai idia hebou taudia edia namba be 1,492,500; unai ese ia hahedinaraia, momokani Assembly Hall matamatadia, Monterrey gauna hegeregerena, ese gaukara helagana do idia durua.