Noho Namo Momokanina—Davaria Haraga Lasi Gauna
ARNOLD be iena gadara gauna, taiga ta, ia ura henia bada merona. Gabu ibounai dekenai iena gadara gauna ia veria lao—gadara gabuna, aniani patana, bona ena mahuta patana dekenai. Ia dekenai, unai taiga ese lalo-maino bona noho namo hemami ia havaraia. To dina ta ai, hekwakwanai badana ta ia vara. Taiga ia boio!
Arnold ia taitai noho lalonai, iena sinana, tamana, bona kakadia toi be edia ruma badana lalonai taiga idia tahua. Gabeai idia ta ese ia davaria doroa ta lalonai. Guna Arnold ese ia atoa, to edeseniai ia atoa ia laloaboio haraga. Taiga idia henia lou, bona Arnold be ena mata ranu ia dahua. Ia moale lou bona noho namo ia mamia lou.
Bema iseda hekwakwanai ibounai ita haorea mai hekwarahi lasi ida—unai doroa dekenai ia noho gadara gauna idia davaria haraga hegeregerena—do ita moale bada! To taunimanima momo dekenai, noho namo davaria daladia be auka bona mai ena hekwarahi. Gabu ibounai dekenai taunimanima idia laloa, ‘Lau dekenai henaohenao eiava dagedage do ia vara, a? Egu moni gaukara do lau haboioa, a? Egu famili edia aniani do ia hegeregere, a? Egu tomadiho eiava egu bese dainai, taunimanima ese lau do idia dadaraia, a?’
Noho namo idia moalelaia lasi taudia edia momo be bada herea. United Nations ia gwau, taunimanima kahirakahira bilioni toi ese medikal heduruna idia abia diba lasi bona muramura idia abia diba lasi danu. Taunimanima bilioni ta ia hanaia be idia ogogami bada herea. Taunimanima bilioni ta, ena be idia gaukara diba, to ful-taim, eiava moni ia hegeregere gaukarana idia davaria diba lasi. Edia tano idia heautania taudia edia momo ia bada daekau noho. Lagani 1994 ena dokona ai, tanobada taudia ibounai 115 115 amo ta ta be edia vara gabuna idia heautania vadaeni. Lagani ta ta ai drag dikadia hoia taudia ese kina bilioni 625 idia abia edia hoihoi karadia amo. Unai dainai drag ania kava taudia milioni momo edia mauri ia hadikaia, bona raskol karana bona dagedage ia havaraia danu. Tuari ese taunimanima milioni momo edia mauri ia hadikaia. Lagani 1993 sibona lalonai, tano 42 dekenai tuari badadia idia vara, ma tano 37 ai politikol karadia dainai dagedage ia vara.
Tuari, ogogami, raskol karadia, bona taunimanima edia noho namo idia hadikaia gaudia ma haida edia badina be tamona, bona edia momo be idia bada daekau. Hanamoa haraga daladia be lasi; taiga be doroa lalonai idia davaria haraga bamona. Momokani, taunimanima ese idia ibounai do idia hanamoa diba lasi.
Dirava ena Hereva, Baibel ena sisiba ia gwau: “King taudia do umui abidadama henia lasi, badina taunimanima ese umui do idia hamauria diba lasi.” Vadaeni, daika ita abidadama henia diba? Baibel ma ia gwau: “Iakobo ena Dirava ese ia durua noho taudia, be idia moale noho. Lohiabada ese guba bona tanobada bona davara, bona idia lalonai gaudia ibounai ia karaia.”—Salamo 146:3-6.
Dahaka dainai Iehova ita abidadama henia diba, inai tanobada dekenai noho namo do ia havaraia totona? Hari inai negai, noho namona bona moale ita davaria diba, a? Dirava be edena dala amo taunimanima edia noho namo idia hadikaia gaudia do ia kokia?