Noho Namo Momokanina—Harihari ela Bona Hanaihanai
ITA diba momokani Iehova Dirava ese ena taunimanima dekenai noho namo ia henia. Ia be “Siahu Ibounai Dirava.” (Salamo 68:14) Ia sibona ia abia ladana ena anina be “Ia ese Ia Havaraia.” Unai ladana ese ia hahedinaraia guba bona tanobada ai ia Sibona be iena gwauhamata hagugurua totona bona ena ura hamomokania totona, idia koua gaudia ibounai ia kokia diba. Dirava be sibona ia gwau: “Lau ese lau gwauraia hereva, be anina do ia havaraia, bona lau dekenai do ia giroa kava lasi. Lau siaia totona gaukarana be do ia karaia momokani.”—Isaia 55:11.
Dirava ese ia idia abidadama henia taudia dekenai noho namo ia henia. Iena Hereva ese unai ia hamomokania. Aonega tauna King Solomona be Dirava ena lauma ese ia hasiahua neganai, ia gwau: “Lohiabada be kohoro goadana hegeregerena. Kara maoromaoro taudia be unuseni do idia heau vareai, bona do idia mauri noho.” Ma ia gwau: “Lohiabada oi abidadama henia neganai, mauri do oi davaria noho.”—Aonega Herevadia 18:10; 29:25.
Noho Namo Dirava Ena Hesiai Taudia Totona
Hanaihanai Iehova be ia dekenai idia tabekau taudia dekenai noho namo ia henia. Hegeregere, peroveta tauna Ieremia ese Dirava ia henia noho namo ia moalelaia. Babulonia ami taudia ese hereva momokani ia rakatania siti Ierusalema idia koua hagegea neganai, ena taunimanima ‘ese aniani ena metau be sikele dekenai idia atoa guna, bena mai gari danu idia ania.’ (Esekiela 4:16) Unai neganai aniani be lasi vaitani dainai hahine haida ese edia natudia idia nadua bona idia ania. (Lalohisihisi ena Ane 2:20; 4:10) Ena be Ieremia ese mai gari lasi haroro gaukara ia karaia dainai dibura dekenai idia atoa, to Iehova ese ia naria, ‘beredi tamona ia dekenai idia henia, ela bona hanua ena beredi ibounai ia ore.’—Ieremia 37:21.
Babulonia taudia ese Ierusalema idia hamorua neganai, Ieremia idia hamasea lasi bona Babulonia dekenai idia veria lao lasi. To, ‘Babulonia gima taudia edia biaguna ese . . . aniani ia henia, bona harihari gauna ta danu, bona ia ruhaia.’—Ieremia 40:5.
Lagani handred momo murinai, Iesu Keriso ese Dirava ena hesiai taudia ia hagoadaia, ia gwau: “Unai dainai, emui lalona idia hekwarahi lasi. Umui hereva lasi, ‘Dahaka do ai ania?’ O, ‘Dahaka do ai inua?’ O, ‘Dahaka dabua do ai atoa?’ Bese idauidau taudia ese unai gau ibounai idia tahua noho. To emui Tamana guba dekenai ia noho be ia diba, umui ura gaudia ibounai be unai. To umui ese Dirava ena Basileia bona iena kara maoromaoro do umui tahua guna, vadaeni unai gau ibounai danu umui dekenai dohore ia henia.”—Mataio 6:31-33.
Unai hereva ena anina be Iehova ese ena hesiai taudia be hari iseda nega ai idia vara hekwakwanai ibounai amo do ia naridia, a? Lasi, ena anina be unai lasi. Abidadama taudia ese dika ibounai do idia reaia lasi. Keristani momokani taudia idia gorere, dagedage idia davaria, raskol ese idia kara dika henidia, aksiden lalonai idia mase, bona hisihisi idauidau idia do mamia.
Ena be Iehova be gau dikadia ibounai amo idia ia naria lasi, to ripoti ese idia hahedinaraia iena siahu ia gaukaralaia ena hesiai taudia edia mauri gaudia ia henia totona bona ia naridia totona. Keristani taudia ese hekwakwanai momo idia abia lasi, badina Baibel ena hakaua herevadia idia badinaia. (Aonega Herevadia 22:3) Danu, noho namo idia moalelaia edia tanobada ibounai oreana dainai; gau dikana ta ia vara neganai, edia lalokau tadikaka bona taihu ese idia durudia. (Ioane 13:34, 35; Roma 8:28, NW) Hegeregere, Iehova ena Witness taudia Europe dekenai be tuari gabuna Rwanda ai idia noho tadikaka dekenai dabua ena metau ton 65, bona muramura, aniani, bona ma gau haida, ibounai edia davana be K2,016,000, idia siaia.—Kara 11:28, 29 itaia.
Ena be Iehova ese Keristani taudia momokanidia dekenai idia vara hetoho iboudiai ia koua lasi, to idia diba ia ese goada, heduru, bona aonega do ia henia idia haheauka totona. Iena abidadama tamona taudia dekenai aposetolo Paulo ia torea, ia gwau: “Umui davaria hedibagani [hetoho] iboudiai be taunimanima ese idia davaria vadaeni. To Dirava be momokani, ia ese umui do ia naria emui goada ia hanaia hedibagani [haheauka ia tohoa gauna] ta ese umui ia abia garina, to hedibagani [hetoho] negana lalona ia ese emui roho mauri dalana do ia kehoa, unai amo umui haheauka diba.”—1 Korinto 10:13; The Emphatic Diaglott.
Dirava ese Iena Taunimanima Totona Ia Karaia Gaudia
Hari iseda nega ai, taunimanima milioni momo be mai moale ida Dirava ena ura idia karaia. Ta ese ia doridia lasi Dirava idia hesiai henia totona; idia karaia badina ia idia diba bona idia lalokau henia. Danu, badina be Iehova ese iena kamonai hesiai taudia ia lalokau henia, iena ura be tanobada be paradaiso ai do ia halaoa bona kamonai taudia ese maino, gorere lasi, bona noho namo maurina do idia moalelaia ela bona hanaihanai.—Luka 23:43.
Dirava ese ena guba gavamanina bona ia abia hidi King, Iesu Keriso, ena lohia amo, unai do ia havaraia. (Daniela 7:13, 14) Baibel ese unai gavamani ia gwauraia “Dirava ena Basileia” eiava “Guba Basileia.” (1 Korinto 15:50; Mataio 13:44) Dirava ena Basileia ese taunimanima edia gavamani ibounai edia gabu do ia abia. Unai dainai tanobada ai gavamani momo do idia noho lasi, to gavamani tamona sibona do ia noho. Tanobada ibounai do ia lohiaia mai ena kara maoromaoro ida.—Salamo 72:7, 8; Daniela 2:44.
Iehova ese taunimanima ibounai ia boiria Basileia henunai do idia noho. Iena boiria dalana ta be Baibel hariharilaia bada gaukarana amo; unai buka ese ia hahedinaraia Basileia be dahaka do ia karaia tanobada taudia totona. Baibel be tanobada ibounai lalonai idia hariharilaia momo bukana, bona hari Baibel ibounai eiava ena kahana, be gado 2,000 mai kahana ai idia halasia vadaeni.
Iehova Dirava be mai ena lalokau ida taunimanima ia durua Baibel ena hahediba Basileia dekenai idia lalo-pararalaia totona. Iena karaia dalana be taunimanima ia hadibaia bona ia siaia ma haida dekenai Baibel siridia idia hahedinaraia totona. Iehova ena Witness taudia milioni ima ia hanaia ese Dirava ena Basileia ena sivarai namona idia harorolaia tano 230 bona ma haida ai.
Noho Namo Momokanina Ibounai Totona, A?
Taunimanima ibounai ese Dirava ena boiboi do idia abia dae bona iena kara maoromaoro taravatudia badinaia amo do idia hahedinaraia iena Basileia henunai idia ura idia noho, a? Lasi, badina be taunimanima momo idia ura lasi Dirava ena ura idia karaia. Edia mauri ia hanamoa diba heduruna idia dadaraia. Momokani idia hahedinaraia idia be Iesu ese ia herevalaia taudia hegeregerena, ia gwau: “Inai bese taudia edia lalona idia dibura, edia taiana idia kudima, bona edia matana idia koua. Unai be edia matana dekena amo do idia itaia garina, bona edia taiana dekena amo do idia kamonai garina, edia lalona do idia kehoa garina, edia lalona do idia giroa, bona lau [Dirava] ese do lau hamauridia garina.”—Mataio 13:15.
Tanobada dekenai noho namo momokani be edena bamona do ia vara diba bema Dirava ena kara maoromaoro idia dadaraia taudia idia do noho? Ia vara diba lasi. Dirava idia dadaraia taudia ese Iehova idia ura hesiai henia taudia edia noho namo idia hadikaia.
Dirava ese taunimanima ia doria lasi edia mauri idia haidaua totona, to kara dika karadia do ia haheaukalaia lasi ela bona hanaihanai. Ena be Iehova be mai ena haheauka ida iena Witness taudia be taunimanima dekenai ia siaia noho iena dala bona ura idia hadibalaia totona, to do ia karaia noho daudau lasi. Iesu Keriso ia peroveta, ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.”—Mataio 24:14.
“Dokona” ena anina be dahaka Dirava ena taravatu idia dadaraia taudia dekenai? Ena anina be do ia hahemaoro henidia bona do ia hadikadia ore. Baibel ia gwau, “Dirava ese ia idia ura lasi taudia, bona Lohiabada Iesu ena Sivarai Namona idia abia dae lasi taudia dekenai davana metau do ia henidia. Edia davana be inai: . . . do ia hadikaia ore momokani, bona inai bamona do idia noho hanaihanai.”—2 Tesalonika 1:6-9.
Vadaeni—Noho Namo Momokanina ela Bona Hanaihanai!
Iehova ena maino daladia idia dadaraia taudia ia hadikaia ore murinai, Dirava ena Basileia ese kara maoromaoro taudia totona tanobada ai noho namo negana hereadaena do ia havaraia. (Salamo 37:10, 11) Unai tanobada matamatana be hari ita noholaia tanobadana amo do ia idau vaitani!—2 Petero 3:13.
Doe bona hitolo do idia ore. Dohore taunimanima ibounai be mai edia aniani bada. Baibel ia gwau, ‘tanobada ena bese idauidau ibounai ese aniani namodia’ do idia moalelaia. (Isaia 25:6) Aniani do ia ore lasi, badina be “ororo gabudia danu dekenai, uiti bona aniani avadia do idia tubu namonamo.”—Salamo 72:16.
Taunimanima be ruma dikadia bona setelmen dikadia ai do idia noho lasi. Dirava ena Basileia henunai, ibounai be mai edia ruma namodia, bona edia tano ia havaraia aniani do idia ania. Baibel ena gwauhamata be inai: “Idia ese edia ruma do idia haginia, bona unai ruma lalonai do idia noho. Idau taudia ese edia ruma do idia abia lasi. Bona idia ese vain umadia do idia hadoa, vadaeni vain ena anina, uaina do idia inua.”—Isaia 65:21, 22.
Hari taunimanima momo be moni gaukara idia davaria lasi, to unai neganai namo ia havaraia gaukara, ia amo taunimanima ese ahuna namona do idia abia gaukaradia, do idia karaia. Dirava ena Hereva ia gwau: “Lauegu abia hidi taudia ese, edia imana gaukara dekenai idia karaia gaudia do idia moalelaia. Do idia hekwarahi kava lasi.”—Isaia 65:22, 23.
Dirava ena Basileia henunai, taunimanima be gorere dainai do idia hisihisi lasi bona do idia mase lasi. Dirava ena Hereva ia gwau: ‘Idia noho taudia ta ese do ia gwau lasi, “Lau gorere.” ’—Isaia 33:24.
Tanobada Paradaisona be kahirakahira do ia vara, bena hisihisi, daradoko, bona mase be do idia ore. Oibe, mase danu! Paradaiso lalonai taunimanima do idia mauri ela bona hanaihanai! Baibel ese ita ia hamaoroa Dirava ese “matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.”—Apokalupo 21:4.
“Maino ena Lohia,” Iesu Keriso, ena lohia siahuna henunai, tanobada ai noho namo momokanina do ia vara. Momokani, tanobada hegegemadai noho namo momokanina do ia vara mai kara maoromaoro bona mai lalokau gavamanina tamona henunai—Dirava ena Basileia unai.—Isaia 9:6, 7; Apokalupo 7:9, 17.
[Blurb on page 4]
“Taunimanima idia noho namo neganai ia hahedinaraia idia be nega vairai idia gari henia lasi . . . bona idia laloa gavamani [idia abidadama henia] do ia ia moru lasi bona moni gaukara do idia davaria diba.”—Asia dekenai ia noho hahinena ta.
[Blurb on page 5]
“Iseda noho namo ia hadikaia gauna badana be dagedage bona raskol karadia.”—South America dekenai ia noho tauna ta.
[Blurb on page 6]
“Lau be . . . tuari lalonai noho namo lau davaria lasi. Bema emu tano dekenai idia tuari, taunimanima be edena bamona idia noho namo diba?”—Praimeri sikuli natuna ta, Middle East dekenai.
[Blurb on page 7]
“Noho namona do lau abia lasi ela bona lau diba hanuaboi ai lau raka loaloa diba bona ta ese lau do ia hadikaia lasi.”—Sikuli kekenina ta, Africa dekenai.