Idia Maragi Negana amo Oi Hadibaia

HARI iseda nega ai diba idia tahua taudia idia davaria, “ia do vara lasi beibi be edia tauanina amo gadona idia kamonai ena toana idia hahedinaraia.” Winnipeg Free Press ia gwau, University of North Carolina diba tahua taudia be “idia davaria bema sina ese edia bogana lalonai ia do noho beibina dekenai hereva haida idia duahia, bena unai vara matamata beibi dekenai unai hereva haida idia duahia lou, toa ta idia hahedinaraia.” Hahine be idia rogorogo lalonai idia duahiduahi badabada neganai, reana edia natudia dekenai kara namo ena badina idia hadibaia matamaia. Baibel ia gwau Timoteo be ‘mero maragi neganai, Buka Helagadia dekenai ia manada momokani.’ (2 Timoteo 3:​14, 15) Ia maragi negana amo, iena sinana bona ena tubuna hahine idia diba idia hadibaia be mai anina, bona reana ia dekenai idia duahiduahi badabada danu.

Buka toretore tauna Jim Trelease ia gwau duahiduahi “be gau bada hereana ta iseda sosaiti lalonai.” Iseda gado bona ita gwauraia herevadia hanamoa dalana be ita duahiduahi badabada.

Aonega dalana be emu beibi dekenai oi hereva matamaia neganai, ia dekenai hereva oi duahia badabada danu. Ena be ia do vara lasi beibina o beibi matamatana ese emu hereva do ia lalo-pararalaia lasi, to gabeai emu hekwarahi dainai ahuna namona do oi abia. Aonega Herevadia 22:6 ia gwau: “Mero dekenai mauri dala maorona do oi hadibaia, vadaeni ia buruka neganai, unai dala do ia rakatania lasi.”

Edena gaudia oi duahia be namo bona do idia durua? Dina ta ta ai Baibel oi duahia badabada emu natuna dekenai. Danu, ma buka haida, hegeregere Hadibaia Tauna Badana Ita Kamonai Henia, Lau Egu Bible Sivarai Buka, Tau Hereadaena, bona Gima Kohorona bona Noga! herevadia oi duahia diba.

Momokani, oi hekwarahi neganai emu nega oi henia, to unai nega ese anina do ia havaraia. Unai dala amo do oi hamomokania emu natuna oi laloa bada bona ia oi lalokau henia.