Duahia Taudia Edia Henanadai

Lau laloa Greek herevana toʹte (bena) be kara ta murinai ia vara karana herevalaia totona idia gwauraia guna herevana. Vadaeni dahaka dainai Mataio 24:9 be ia gwau: “Unai neganai [“toʹte”] umui emui mase totona hereva do idia atoa, do idia hadikaia umui,” to unai sivarai tamona ena hereva Luka 21:12 ai ia gwau: “To unai gaudia do idia vara lasi neganai, idia ese umui do idia guia, hisihisi do idia henia umui dekenai”?

Unai be maoro, toʹte be kara ta murinai ia vara karana herevalaia totona oi gwauraia guna diba, edia nega ta ta ai idia vara hesiriu gaudia ta oi herevalaia bamona. To namona be ita diba danu Baibel ese unai hereva ia gaukaralaia dalana be unai sibona lasi.

Bauer, Arndt, bona Gingrich ese idia torea bukana, A Greek-English Lexicon of the New Testament and Other Early Christian Literature, ese ia hahedinaraia unai hereva toʹte be Baibel lalonai dala badadia rua ai idia gaukaralaia.

Dala ta be “unai nega ai.” Idia gaukaralaia diba “bena, guna nega ta ai.” Haheitalai ta be Mataio 2:​17 dekenai: “Unai neganai [Bena] Ieremia, peroveta tauna ena hereva ia momokani vadaeni.” Unai be edia nega ta ta ai idia vara hesiriu gaudia ta ia herevalaia lasi to guna negana ta, unai nega ai, ia vara gauna ta ia gwauraia. Unai hegeregerena ai, toʹte idia gaukaralaia diba “bena, vaira negana ta ai.” Haheitalai ta be 1 Korinto 13:12 dekenai: “Harihari ita be Dirava ena gaudia kahana sibona ita diba, bona ita itaia goeva lasi, hevarivari gunana lalonai gau ita itaia goeva lasi bamona. To nega gabeai [bena] ita ese Dirava ena vairana do ita itaia momokani. Unai neganai [bena] gau ibounai do ita diba momokani, Dirava ese hari ita ia diba momokani bamona.” Iniseniai Paulo ese toʹte ia gaukaralaia ‘vaira negana ta’ ia gwauraia totona.

Unai gado herevalaia bukana ia gwau toʹte gaukaralaia dalana ma ta be “nega ta lalonai ia vara gauna murinai ia vara gauna herevalaia totona idia gwauraia guna.” Unai buka ese ia gwauraia haheitalai momo be Iesu ese aposetolo taudia edia henanadai ia haerelaia ena sivarai toiosi lalonai idia noho.a “Nega ta lalonai ia vara gauna murinai ia vara gauna herevalaia totona idia gwauraia guna” dalana ai toʹte idia gaukaralaia ena haheitalai dekenai, unai buka ese ia gwauraia siridia be Mataio 24:​10, 14, 16, 30; Mareko 13:​14, 21; bona Luka 21:​20, 27. Edia hereva ibounai ita laloa neganai, ia hedinarai dahaka dainai nega ta lalonai gau ta murinai ia hesiriu gauna ta idia herevalaia be lalohadai maorona. Bona unai ese ita do ia durua Iesu ena peroveta hereva, nega vaira do idia vara karadia herevadia, ita lalo-pararalaia totona.

To do ita gwau lasi inai sivarai lalonai toʹte idia gaukaralaia negadia ibounai be murinai ia vara karana herevalaia totona idia gwauraia guna. Haheitalai ta be, Mataio 24:⁠7, 8 dekenai ita duahia Iesu be bese ta ta idia tuari heheni bona aniani do idia ore bona tano mareremarere ia perovetalaia. Mt 24 Siri 9 ia gwau: “Unai neganai [Bena] umui emui mase totona hereva do idia atoa, do idia hadikaia umui, do idia alaia mase umui. Lauegu ladana dainai bese ibounai ese umui do idia badu henia.” Anina be do ita laloa tuari, aniani lasi negana, bona tano mareremarere do idia vara, bena reana idia doko murinai dagedage do ia vara, a?

Unai be lalohadai maorona lasi, bona Keristani ginigunadia edia nega lalonai ena anina ia vara neganai, unai ia hedinarai lasi. Kara bukana ese ia hahedinaraia, Keristani ekalesia ginigunana taudia be idia haroro matamaia sibona murinai, dagedage bada idia davaria. (Kara 4:​5-​21; 5:​17-​40) Momokani, ita gwau diba lasi tuari, aniani lasi, bona tano mareremarere ibounai be dagedage ia do vara lasi neganai idia vara vadaeni. Lasi, to dagedage be unai Iesu ese ia gwauraia guna gaudia momo ‘idia do vara lasi neganai’ idia vara, Luka ese ia herevalaia hegeregerena, ia gwau: “To unai gaudia do idia vara lasi neganai, idia ese umui do idia guia, hisihisi do idia henia umui dekenai.” (Luka 21:12) Unai ese ia hahedinaraia Mataio 24:9 dekenai, toʹte idia gaukaralaia neganai, ena anina be “unai neganai.” Unai tuari, aniani lasi, bona tano mareremarere negana lalonai, o unai neganai, Iesu murinai idia raka taudia be do idia dagedage henidia.

[Footnotes]