Baibel Ena Peroveta Herevana ta Ia Guguru

ENGLAND ai, London ena Imperial War Museum lalonai, hora gauna idau hereana bona paua ai namba ia duahia gauna ta, taunimanima idia itaia totona idia hahedinaraia. Hora gauna ia giroa lalonai, sekeni 3.31 ibounai ta ta ai namba duahia gauna ia regerege. Regerege ta ta amo, namba ta ia atoa namba ibounai danu. Regerege tamona, namba tamona ese, tau ta, hahine ta, eiava natuna ta tuari dainai ia mase, lagani 1900 ema bona hari inai nega lalonai ia hahedinaraia.

June 1989 ai, duahia gauna be namba ia duahia hamatamaia bona idia laloa lagani 2000 ia do abia lasi ena hanuaboi momokani ai namba do ia duahia haorea. Unai neganai duahia gauna ai do ia hedinarai namba, be handred milioni ta​—lagani 1900 ela bona lagani 1999 lalonai tuari dainai idia mase taudia edia namba be unai bamona idia laloa.

Kahirakahira lagani 2,000 idia lao vadaeni, Iesu Keriso ia perovetalaia negana be ‘bese ta do ia toreisi bese ta do ia tuari henia bona basileia ta be do ia toreisi basileia ta do ia tuari henia’ negana. Unai hegeregerena, Iehova ena Witness taudia be nega daudau lalonai lagani 1900 amo ema bona hari idia vara tuari dikadia, tano mareremarere, daihanai goreredia, aniani lasi, bona ma gau haida ese idia hahedinaraia momokani ita be “nega ena dokona dekenai” ita noho idia harorolaia​—unai nega be lagani 1914 ai, Keriso be King dagina guba ai ia abia negana murinai ia matamaia.​—Luka 21:​10, 11; 2 Timoteo 3:⁠1.

Baibel ena hereva amo, Gima Kohorona ese Dirava ena Basileia be nega sisina murinai dagedage taudia do ia haoredia bona tanobada be paradaiso ai do ia halaoa ena sivarai namona ia gwauraia. Bona nega vaira ai dahaka do ia vara tuari dekenai? Baibel ia gwau: “Umui mai! Lohiabada ena gaukara do umui itaia. Tanobada dekenai hadikaia karadia momo ia karaia vadaeni. Tuari be Dirava ese ia hadokoa noho, tanobada kahana ibounai dekenai. Ia ese peva ia makohia noho, bona io be ia ese ia hakwaidua noho. Kariota be ia ese lahi dekenai ia gabua noho.”​—Salamo 46:​8, 9.

[Picture Credit Line on Page 32]

Clock: By Courtesy of the Imperial War Museum