Ita Nihi be Namo

NEGA haida oi nihi, a? Momokani oi nihi, badina be, ena be reana ita haida ita gwau ita nihi lasi, to ita ibounai ita nihi, ita mahuta negadiai. Idia gwau taunimanima ese edia nihi kahirakahira iboudiai, 95 pesen bamona, idia laloaboio. Edena oi laloatao? Ita laloatao nihi be iseda noga be kahirakahira neganai ita nihilaia gaudia.

Nihi karana tahua taudia ese idia davaria, iseda mahuta hora ginigunadia lalonai ita mahuta mase, bena unai murinai iseda mahuta be idau. Iseda mahuta lalonai, iseda matadia idia marere haraga negadia ta ta lalodiai ita nihi momo. Miniti 90 bamona lalonai unai bamona idia marere lasi murinai, idia marere; unai bamona ia vara loulou nega 5 eiava 6, ela bona iseda noga negana be kahirakahira momokani.

Bema oi laloa oi mahuta lalonai emu kwara harana ia gaukara sisina sibona, oi kerere unai. Idia davaria vadaeni, ta ia nihi noho lalonai, ena kwara harana ia gaukara momo, ia noga noho negadia haida ia hereaia; gau tamona, harana ena kahana tamona gaudia, kamonai bona laloatao naria gaudia, be idia gaukara lasi. Toana be mata marere haraga mahuta lalonai unai gau idia laga-ani. To kwara harana ena kahana oredia be idia gaukara hebou hanaihanai.

Iseda kwara harana be hoa gaudia; ta ta be mai edia kahana bilioni momo, sekeni tamona lalonai toa handred ta o rua o toi idia havaraia noho. Taunimanima tamona ena kwara harana ena kahana edia momo ese tanobada taudia iboudiai edia momo ia hereaia. Unai idia tahua taudia haida idia gwau ena kahana be reana bilioni 20 bona 50 padadiai. Unai ese Baibel torea tauna Davida ena hereva ia hamomokania; taunimanima ena tauanina ia gwauraia, ia gwau: “Oi lau tanikiu henia, badina mai hoa danu lau oi karaia. Oiemu kara ibounai be mai hoa bona gari danu.” —Salamo 139:14.

Nihi Edia Oromadia

Ita noga noho lalonai, gau idauidau ita itaia, ita kamonaia, ita bonaia, ita mamia, bona ita daua toho dainai, iseda kwara harana ese diba bona laulau idia abia. Ena be mahuta negana be unai bamona lasi, to unai nega lalonai kwara harana sibona ese laulau ia havaraia. Unai dainai, nega haida nihi lalodiai hoa gaudia ita itaia bona hoa karadia ita karaia. Reana ita be manu bamona ita roho diba eiava ororo ta amo ita moru neganai ita bero lasi. Reana nega gunana ta ita itaia, iseda matana ai ia be hari inai nega bamona. Eiava bema ita heau oho toho, toana be iseda aena ita biagudia diba lasi​—⁠idia ura lasi do idia marere. Ita noga noho lalonai ita laloa momo gaudia eiava ita dekenai idia vara gaudia ese momokani iseda nihi edia oromana idia havaraia diba. Tuari ena dagedage karadia idia hisihisilaia vadaeni taudia ese idia laloaboio haraga diba lasi, bona raskol taudia ese idia heatu henia taudia haida ese unai dika ena mamina idia laloaboio diba lasi. Unai hisihisi idauidau, ita noga lalonai ita davaria gaudia, be iseda nihi lalodiai idia hedinarai lou diba bona ita idia hagaria diba. Idia vara loulou diba gaudia danu, mahuta totona ita hekure neganai ita laloa gaudia, be iseda nihi lalonai idia hedinarai diba.

Nega haida, bema hekwakwanai ta hanaia dalana ita laloa davaria toho, mahuta lalonai ia mai ita dekenai. Reana unai ese ia hahedinaraia mahuta ibounai be nihi sibona lasi. Ena kahana ta be laloa karana.

Buka ta, nihi bona iseda kwara harana ia gwauraia gauna, be ia gwau: “Mahuta lalonai ta ena darana ese ia karaia momo karana be nihi lasi, to laloa karana. Mahuta ena laloa karana lalonai gau ta ena mamina ia abia lasi bona hoa gaudia ia itaia lasi. Nega momo unai be ia dekenai varani idia vara gaudia o kerukeru do idia vara gaudia laloa loulou karana bona anina lasi karana.”

Taunimanima haida idia laloa edia nihi ese mai anina bada gaudia idia hadibaia. Nihi edia anina do idia davaria totona, toretore pepana ta be edia mahuta patana badinai idia atoa, do idia noga neganai do idia torea totona. Buka haida ese nihi edia toana edia anina idia gwauraia toho; unai buka be Ann Faraday ese ena buka ladana The Dream Game lalonai inai bamona ia gwauraia: “Nihi bukadia danu, idia lalodiai nihi edia sivarai bona edia toana edia anina oi tahua gaudia, be anina lasi; idia lalodiai sene herevadia eiava lalohadai matamatana herevadia idia torea be herevana.”

Nihi be kwara harana lalonai idia vara, unai dainai namona be ita laloa lasi idia amo ta ese anina bada gaudia be ita dekenai ia hadibaia. Namona be ita laloa idia be kwara harana ena gaukara korikorina ta ena anina, unai gaukara dainai ia namo noho.

To haida idia gwau edia varavara ta o edia turana ta ena mase idia nihilaia bena kerukeru ena mase herevana idia kamonai. Unai be edena bamona? Unai ese ia hahedinaraia nihi ese nega vaira gaudia idia hahedinaraia, a? Hereva gabena lalonai, peroveta nihidia ia havaraia gauna do ita laloa.