Kara Momokani—Oi Karaia Kava Eiava Oi Abia Hidi Karana?
“ENA be kara momokani be vaia egu kara lasi, to nega haida unai bamona lau karaia kava sibona.” Unai be kara momokani lasi tauna Autolycus ena hereva, William Shakespeare ia torea bukana The Winter’s Tale lalonai. Unai ese taunimanima edia manoka ta ia hahedinaraia, kara dika do ita karaia haraga unai, ‘kudouna mai koikoi bada’ amo ia mai gauna. (Ieremia 17:9; Salamo 51:5; Roma 5:12) To anina be ita be dala lasi kara ta ita abia hidi totona, a? Kara goeva be ta ese ia karaia kava sibona, a? Lasi vaitani!
Israela besena be Gwauhamata Tanona ai idia do vareai lasi neganai, Mose ese ia hereva henidia Moaba ena tano palakana dekenai. Idia edia vairanai do idia abia hidi daladia rua ia hahedinaraia. Dirava ena hahegani idia badinaia diba bena hahenamo do idia davaria eiava do idia dadaraia bena edia kara dika edia davana dikana do idia davaria. (Deuteronomi 30:15-20) Idia ese do idia abia hidi.
Ita be ura kwalimu taudia dainai, ita danu be dala do ita abia hidi. Ma ta—Dirava danu—ese ita ia doria lasi kara namo ita karaia eiava kara dika ita karaia totona. To, reana haida do idia henanadai, ‘Bema iseda kudouna be kara dika ia ura henia, kara namo be edena bamona ita karaia diba?’ Isena hanamoa doketa be isena ia itaia namonamo, ena dika o bodaga be ia do bada lasi neganai do ia davaria totona. Unai hegeregerena, namona be ita ese eda kudouna do ita tahua namonamo, ena manoka bona ura goevadia idia bodaga idia lao eiava lasi ita diba totona. Badina be dahaka? Badina be Iesu ia gwau: “Tau ena lalona dekena amo idia mai gaudia be inai: Laloa dikadia, taunimanima alaia, heudahanai, matabodaga, henaoa, samania koikoi, hereva dikadia.”—Mataio 15:18-20.
Isena ta naria totona, isena hanamoa doketa be bodaga gaudia ibounai ia kokia. Unai hegeregerena, namona be kara ta do ita karaia, kudouna amo “laloa dikadia” bona ura kereredia ita kokia totona. Dirava ena Hereva, Baibel, ita duahia bona laloa loulou neganai, ita ia Havaraia Tauna ena dala ita diba sibona lasi to do ita karaia kara maorodia be ita diba danu.—Isaia 48:17.
Israela ena King Davida be anina bada heduru ma haida ia tahua, ia idia durua kara maorodia do ia karaia totona. Ia guriguri, ia gwau: “Dirava e, lauegu kudouna lalonai laloa goevagoeva do oi havaraia, bona lauma matamatana bona maoromaorona, be egu lalona dekenai do oi atoa.” (Salamo 51:10) Oibe, mai guriguri ida Iehova Dirava dekenai ita tabekau neganai, ita danu be dika karaia haraga lalohadaina do ita dadaraia diba bona kara namo karaia ena “lauma matamatana” do ita habadaia. Unai dala amo, kara momokani be do ita karaia kava lasi. To ia be ita abia hidi karana.
[Picture on page 21]
Davida dekenai ia vara bamona, guriguri ese ita ia durua diba ita kara namo totona