Inai Nega Dikana Lalonai “Kudouna Ia Goeva” Noho
VANEGAI Italy dekenai Katolik Dubu lalonai matabodaga karadia idia vara dainai, La Stampa niuspepa lalonai Katolik ena nius gwauraia tauna Vittorio Messori ia gwau: “Ta ia gwau diba lasi Dubu dekenai kara miro be lasi. . . . Bona unai hekwakwanai hamaoromaoroa totona pris idia headava lasi taravatuna ita haidaua be hegeregere lasi, badina idia vara matabodaga karadia 80 pesen be pris taudia ese tatau bona memero idia matabodaga henidia.”
Kara dika ia bada ia lao dainai, unai ese ia hahedinaraia ita be tanobada ena “nega ena dokona” ai ita noho. (2 Tim. 3:1-5) Nius ripoti momo ese idia hahedinaraia hegeregerena, unai kara dikadia ese taunimanima ma haida edia lalohadai bona kara ia hadikaia sibona lasi, to sibona idia gwauraia Dirava idia hesiai henia taudia edia kara ia hadikaia danu. Edia kudouna ia goeva lasi dainai kara bodaga idia karaia. (Efe. 2:2) Badina namona dainai, Iesu ese inai sisiba ia henia: “Tau ena lalona dekena amo idia mai gaudia be inai: Laloa dikadia, taunimanima alaia, heudahanai, matabodaga, henaoa, samania koikoi, hereva dikadia.” (Mat. 15:19) To, Iehova Dirava ia ura iena hesiai taudia be “kudou goevana” idia ura henia. (Aon. 22:11, NW ) Unai dainai, edena dala ai inai nega dikana ai iseda kudou ia goeva noho diba?
Kudou Goevagoeva Ena Anina be Dahaka?
Baibel ai, nega momo inai hereva “kudouna” be laulau dalanai idia gaukaralaia. Buka ta ia gwau, inai Baibel herevana “kudouna” ena anina be “tau ta ena lalona” bona “unai be Dirava ese ia laloa bada gauna, badina kudouna amo Dirava ita tura henia bona kudouna amo kara maoromaoro ia vara.” Iseda kudouna ese ia hahedinaraia ita be edena bamona taudia. Unai buka ena hereva bamona, Iehova ese kudouna ia tahua bona unai hegeregerena ena hesiai taudia ia abia dae.—1 Pet. 3:4, NW.
Baibel ai, inai hereva “goeva” be tauanina o gabu ia goeva karana ia herevalaia. To unai hereva be iseda kara bona tomadiho ia goeva bona miro lasi karana ia herevalaia danu. Ororo Harorona ai, Iesu ia gwau: “Kudouna idia goeva taudia be idia moale.” Ia be edia lalona ia goeva taudia ia herevalaia. (Mat. 5:8, NW ) Edia hemami bona ura gaudia be goeva. Iehova ena kara namo idia laloa bada dainai, mai edia kudouna ibounai bona mai momokani ida Iehova idia lalokau henia. (Luka 10:27) Oi ura unai bamona oi goeva, ani?
Iseda Kudouna Ia Goeva Noho be Auka
Iehova ena hesiai tauna ta be “kara goevagoeva” ia hahedinaraia bona ena kudouna o “laloa ia goeva” be namo. (Sal. 24:3, 4) To hari inai negai, Dirava ena hesiai taudia edia “kudou ia goeva” noho totona be auka. Satani, ia lohiaia tanobadana bona eda goevadae lasi tauanina ese ita idia veria Iehova ita rakatania totona. Unai ita dadaraia totona, mai anina bada gauna be ita ura eda “kudouna ia goeva” bona ita gimaia. Unai ese ita ia durua Dirava ita tura henia noho totona. Edena dala ai iseda kudou ia goeva noho diba?
Heberu 3:12 (NW ) ai inai sisiba ia noho: “Tadikaka e, umui naria namonamo, badina mauri Diravana amo umui raka siri karana amo, abidadama lasi kudou dikana umui abia garina.” Bema abidadama be lasi, iseda kudouna do ia goeva lasi. Satani be dahaka lalohadai amo taunimanima ia koia Dirava idia abidadama henia lasi totona? Unai be evolusen lalohadaina, kara maoromaoro bona kara dika be lasi lalohadaina, bona Baibel be Dirava ena hereva lasi lalohadaina. Namona be unai lalohadai dikadia, mase idia havaraia diba gaudia ita dadaraia. (Kol. 2:8) Unai lalohadai ita dadaraia totona, dina ta ta ai Baibel ita duahia bona laloa dobu ese ita do ia durua. Baibel amo diba maoromaoro ita abia neganai, iseda lalokau Iehova dekenai do ia bada bona ia karaia gaudia do ita laloa bada. Unai bamona lalokau karana ita hahedinaraia be namo bema ita ura lalohadai kereredia ita dadaraia bona iseda abidadama Iehova dekenai ia goada noho, unai amo iseda kudouna ia goeva noho diba.—1 Tim. 1:3-5.
Tauanina Ena Ura Koua Daladia
Iseda kudouna ia goeva ia koua karana ta be tauanina ena ura bona kohu momo ura henia karana. (1 Ioa. 2:15, 16) Moni o kohu momo ura henia dikadika karana ese eda kudouna ia hamiroa diba, bona Keristani tauna ia hakaua kerere diba Dirava ia ura henia lasi karadia ia karaia totona. Haida be gaukara gabudiai koikoi karadia idia karaia, ma haida idia koia, o moni eiava gau ma haida idia henaoa.—1 Tim. 6:9, 10.
To, bema Iehova ita gari henia, kara maoromaoro ita ura henia, bona lalomamina goevana ita dogoatao noho, ita hahedinaraia ita ura iseda “kudouna ia goeva.” Unai ura ese ita ia doria ‘mai momokani ida gau ibounai ita karaia’ totona. (Heb. 13:18) Kara maoromaoro ita badinaia neganai, haroro namona ita henia diba. Italy ai, Witnes tadikaka ta ladana Emilio be PMV basi taria tauna. Dina ta ia ese paosi ta ia davaria, ia lalonai 1,720 kina ($680 U.S.) ia noho. Ena gaukara turadia idia hoa, badina unai paosi be ena biaguna dekenai ia henia, bona biaguna ese unai paosi ia haboioa tauna dekenai ia henia lou. Emilio ena turadia haida be ena kara dainai Baibel ena hereva idia abia dae bona idia stadi matamaia. Unai kara dainai, ruma bese rua amo taunimanima 7 be hereva momokani idia abia dae. Oibe, iseda kudouna ia goeva bona mai momokani ida ita kara neganai, ma haida edia lalona do ita veria Dirava idia hanamoa totona.—Tito 2:10.
Keristani tauna ta ena kudou goevana ia hamiroa diba gauna ma ta be lalohadai mirodia. Momo idia laloa idia headava lasi to idia mahuta hebou diba, heudahanai bona tatau ese tatau (o hahine ese hahine) idia sihari henia karana be dika lasi. Unai lalohadai ese Keristani tauna ena kudouna ia hamiroa diba. Matabodaga karadia ia karaia tauna be mai koikoi ida mauri dala rua ia badinaia bona ena kara dika ia hunia diba. Unai ese ia hahedinaraia iena kudouna be ia goeva lasi.
Gabriele ena mauri lagani be 15 neganai, ia bapatiso bona painia gaukara ia karaia. To, gabeai ia be hebamo dikadia ia bamoa matamaia bona disko rumadia dekenai ia lao. (Sal. 26:4) Unai nega amo ia be matabodaga karadia bona mauri dikana ia badinaia, bona Keristani kongrigeisen amo idia atoa siri. Iehova amo matahakani ia abia dainai, ia laloparara ia be kara dika badana ia karaia. Gabriele ia gwau: “Guna lau laloa bada lasi gaudia be hari lau karaia matamaia. Dina ta ta Baibel lau duahia, lau ura Iehova ena hereva ena anina lau diba, bona buka bona magasin lau stadilaia namonamo. Lau davaria sibona egu stadi karana ese lau ia durua bona moale ia havaraia, bona Baibel duahiduahi bona guriguri karana ese lau ia hagoadaia.” Unai ese Gabriele ia durua matabodaga karadia ia rakatania bona ena hetura karana Iehova ida ia hagoadaia lou.
Hari, Gabriele be ena adavana ida painia gaukara ia karaia lou. Gabriele ena sivarai ese ia hamomokania Baibel bona hesiai tauna mai ena kamonai bona mai ena kara maoromaoro amo idia mai buka bona magasin stadilaia karana ese ta ia durua diba, kudou goevana ia abia bona matabodaga karadia ia dadaraia totona.—Mat. 24:45; Sal. 143:10.
Hahetoho Ita Davaria Negadiai
Dagedage taudia edia hagaria karadia, moni ena hekwakwanai, bona gorere badadia be Dirava ena hesiai taudia haida edia lalona ia hametaua. Nega haida Dirava idia hesiai henia taudia be idia lalomanoka. King Davida be unai ia mamia danu, ia gwau: “Egu lalona ia metau dainai, lau ese laloa dika lau davaria vadaeni. Egu lalona ia hisihisi, dika momokani, mai gari danu.” (Sal. 143:4) Dahaka ese ia durua unai bamona negadia ia hanaia totona? Davida be Dirava ese ena hesiai taudia dekenai ia karaia karadia ia laloatao bona Dirava ese ia hamauria karana ia laloa danu. Davida be Iehova ese Iena ladana hahelagaia totona ia karaia gaudia ia laloa dobu. Davida be Dirava ena gaukara sibona ia laloa bada. (Sal. 143:5) Unai hegeregerena, iseda Havaraia Tauna, ia karaia gaudia ibounai bona vaira nega ai do ia karaia gaudia ita laloa dobu neganai, unai ese ita do ia durua hahetoho ita haheaukalaia totona.
Bema haida ese ita idia kara dika henia, do ita badu. To, bema unai kara ita laloa loulou, iseda tadikaka do ita inai henia. Reana ma haida do ita dadaraia bona ita ura lasi ita hereva henidia. To bema unai bamona ita karaia, iseda kudouna be ia goeva, a? Hekwakwanai ta ia vara neganai, iseda Keristani tadikaka ita kara henia dalana ese do ia hahedinaraia iseda kudou ia goeva eiava lasi.
Inai matabodaga bona kara gageva tanobadana ai, ita Keristani taudia be ma haida amo ita idau badina iseda kudouna ia goeva. Dirava ena ura ita karaia dainai, iseda mauri lalonai maino korikorina ita davaria bona ita moale. Bona gau badana be, iseda Havaraia Tauna, Iehova Dirava ida eda hetura karana ita moalelaia, badina ia be “kudouna ia goeva” taudia ia lalokau henia. (Sal. 73:1) Oibe, ita be idia moale taudia huanai ita noho diba, badina Iesu ia gwauhamata, idia ese “Dirava do idia itaia,” badina Dirava be edia “kudouna idia goeva” taudia totona kara ta do ia karaia.—Mat. 5:8, NW.